1:31 pm
နေပြည်တော် သြဂုတ် ၁၀
မိုးရွာသွန်းစဉ်ဓါတ်ကြိုးပြတ်တောက်မှုကြောင့် လူသေဆုံးမှုဖြစ်ပေါ်ခဲ့ပြီး ၎င်းဖြစ်စဉ်များအပေါ် လျှပ်စစ်နှင့်စွမ်းအင်ဝန်ကြီးဌာနမှ ဝန်ထမ်းစည်းမျဉ်းစည်းကမ်းများအတိုင်း ခုံရုံးဖွဲ့စစ်ဆေးမှုများပြုလုပ်နေပြီး မကြာခင်အဖြေထွက်ပေါ်လာမည်ဟု လျှပ်စစ်နှင့်စွမ်းအင်ဝန်ကြီးဌာန တာဝန်ရှိသူများက ဆိုသည်။
ယနေ့ နေပြည်တော် လျှပ်စစ်နှင့်စွမ်းအင်ဝန်ကြီးဌာနတွင် ပြုလုပ်သည့်သတင်းစာရှင်းလင်းပွဲ၌ ဓါတ်ကြိုးပြတ်တောက်မှုကြောင့် လူသေဆုံးမှုများဖြစ်ပွားရာတွင် မည်သူ့တွင်တာဝန်ရှိပါသလဲဆိုသည့် Popular News ၏မေးမြန်းမှုကို တာဝန်ရှိသူများက ယခုလို ပြန်လည်ဖြေကြားခဲ့ခြင်းဖြစ်သည်။
“ဝန်ထမ်းဖြစ်တဲ့အတွက် ဝန်ထမ်းစည်းမျဉ်းစည်းကမ်းကိုလိုက်နာရပါတယ်။ဖြစ်စဉ်တစ်ခုဖြစ်ပြီးဖြစ်ပြီဆိုရင် EIကနေစစ်တာရှိပါတယ်။ ဝန်ကြီးဌာနကလည်း ထင်နေကြသလိုလက်လွတ်စပယ်မလုပ်ထားဘူးဘယ်သူ့မှာတာဝန်ရှိလဲတာဝန်ရှိတဲ့ပေါ်မူတည်ပြီးအတိမ်အနက်ပေါ်မူတည်ပြီးအရေးယူပါမယ်။ ဖြစ်စဉ်အမှန်ကိုဖော်ထုတ်မယ် ခုံရုံးတွေဖွဲ့ထားပြီးစစ်ဆေးနေပါတယ်။မကြာခင်မှာအဖြေပေါ်လာမယ်၊ဓါတ်လိုက်တယ်၊သေဆုံးတယ်၊သေပေါ့ကွာဆိုတာမျိုးလက်လွှတ်စပယ်လုပ်တာမျိုးလုံးဝမရှိပါဘူး” ဟု လျှပ်စစ်နှင့်စွမ်းအင်ဝန်ကြီးဌာနမှ ဒုတိယအမြဲတမ်းအတွင်းဝန်ဦးဌေးအောင်ကဆိုသည်။
ထို့အပြင် လျှပ်စစ်နှင့်စွမ်းအင်ဝန်ကြီးဌာနမှ ဒုတိယအမြဲတမ်းအတွင်းဝန်ဦးစိုးမြင့်ကလည်း ဓါတ်လိုက်မှုဖြစ်စဉ်များ အပေါ်တွင် လျှပ်စစ်နှင့်စွမ်းအင်ဝန်ကြီးဌာန၏ တာဝန် ရှိသည့်အပိုင်းကိုလည်း ယခုလို ဖြေကြားခဲ့သည်။
“ဓါတ်လိုက်တယ်ဆိုတာနဲ့လျှပ်စစ်စွမ်းအင်ဝန်ကြီးဌာနက တာဝန်ရှိလားဆိုတော့ တာဝန်တော့ရှိပါတယ်။ သို့ပေမယ့်အပိုင်းလေးနှစ်ပိုင်းရှိပါတယ်။ကျွန်တော်တို့လျှပ်စစ်နဲ့စွမ်းအင်ဝန်ကြီးဌာနက တာဝန်ယူထားတယ်ဆိုတာက ဟိုးစက်ရုံကြီးတွေကထွက်လာတဲ့ဓါတ်အာတွေကိုသယ်လာတယ်။ လိုင်းတွေနဲ့သယ်လာတယ်မြို့ထဲရောက်တယ်နောက်အိမ်ထိပ်မီတာဝအထိကကျွန်တော်တို့တာဝန်ပါ။ ဆိုလိုတဲ့သဘောက လမ်းထဲမှာဖြစ်တယ်လမ်းပေါ်မှာဖြစ်တယ်ဆိုရင်ကျွန်တော်တို့တာဝန်ပါ။ အိမ်ထဲမှာဖြစ်တယ်ဆိုရင်သက်ဆိုင်ရာသုံးတဲ့သူ userရဲ့တာဝန်ပါ။ ကျွန်တော်တို့မှာတာဝန်မရှိဘူးလားဆိုတော့ တာဝန်မဲ့တဲ့စကားကျွန်တော်ပြောတာမဟုတ်ပါဘူး။ အိမ်ထဲမှာသုံးတဲ့လျှပ်စစ်ပစ္စည်းမီးကြိုးစတာတွေကလည်း အရည်သွေးမှဖြစ်ဖို့လိုပါတယ်။ ဒါကြောင့်ဓါတ်လိုက်မှုတစ်ခုဖြစ်ရင်မီတာဝအထိကျွန်တော်တို့တာဝန်ဖြစ်ပြီးမီတာဝကနေ အိမ်ထဲမှာဖြစ်တာကတော့သုံးစွဲသူUserရဲ့တာဝန်ပါ” ဟု ယနေ့ နေပြည်တော် လျှပ်စစ်နှင့်စွမ်းအင်ဝန်ကြီးဌာနတွင် ပြုလုပ်သည့်သတင်းစာရှင်းလင်းပွဲ၌ ဖြေကြားခဲ့သည်။
အောင်ပြည့်စုံ
