ရန်ကုန်တွင်တည်ဆောက်မည့်မိုးပျံအမြန်လမ်းမကြီးကိုနိုင်ငံတော်ဘဏ္ဍာမသုံးဘဲသုံးနှစ်အတွင်းအပြီးတည်ဆောက်သွားမည်

ရန်ကုန်တွင်တည်ဆောက်မည့်မိုးပျံအမြန်လမ်းမကြီးကိုနိုင်ငံတော်ဘဏ္ဍာမသုံးဘဲသုံးနှစ်အတွင်းအပြီးတည်ဆောက်သွားမည်
July 30, 2018 AsianFame MediaGroup

2:41 pm
ရန်ကုန်တွင်တည်ဆောက်မည့်မိုးပျံအမြန်လမ်းမကြီးကိုနိုင်ငံတော်ဘဏ္ဍာမသုံးဘဲသုံးနှစ်အတွင်းအပြီးတည်ဆောက်သွားမည်

37981323_1897530633624226_1241175858404655104_n

နေပြည်တော် ဇူလိုင် ၃၀

ရန်ကုန်မိုးပျံအမြန်လမ်းမကြီး(Inner Ring Road)ကိုလာမည်(၂၀၁၉)ခုနှစ်မှစတင်ကာသုံးနှစ်အတွင်းအပြီးတည်ဆောက်သွားမည်ဖြစ်ပြီးနိုင်ငံဘဏ္ဍာအသုံးပြုမည်မဟုတ်ကြောင်းဆောက်လုပ်ရေးဝန်ကြီးဌာနဒုတိယဝန်ကြီးဦးကျော်လင်းကယနေ့ကျင်းပသောပြည်သူ့လွှတ်တော်တွင်ပြောကြားခဲ့သည်။

၎င်းကကျောက်တံတားမဲဆန္ဒနယ်မှဦးနေမျိုးထက်မေးမြန်းသောInner Ring Roadကိုမည်ကဲ့သို့အစီအမံချပြီးလုပ်ဆောင်နေပါကြောင်းမည်သည့်အချိန်တွင်စတင်ပြီးမည်သည့်အချိန်တွင်ပြီးဆုံးအောင်လုပ်ဆောင်မည်ဖြစ်ကြောင်းနှင့်ခိုင်ခံ့ပြီးအရည်အသွေးကောင်းမွန်သောလမ်းမများဖြစ်စေရန်မည်ကဲ့သို့စီမံဆောက်လုပ်နေသည်ကိုသိလိုခြင်းမေးခွန်းများကိုပြန်လည်ဖြေကြားရာ၌ထည့်သွင်းပြောကြားခဲ့ခြင်းဖြစ်သည်။

ဒုတိယဝန်ကြီးဦးကျော်လင်းက”စိစစ်ရွေးချယ်ခြင်းအဆင့်ဆင့်ကိုစနစ်တကျဆောင်ရွက်သွားမှာဖြစ်ပြီးတော့နောက်ဆုံးပိတ်အောင်မြင်တဲ့ကုမ္ပဏီအနည်းဆုံးတစ်ဖွဲ့(သို့မဟုတ်)အများဆုံးလေးဖွဲ့အတွင်းမှအတည်ပြုရွေးချယ်ပြီးတော့(၂၀၁၉)ခုနှစ်အစပိုင်းမှာပဲInner Ring Roadကိုစတင်အကောင်အထည်ဖော်ဆောင်ရွက်သွားမှာဖြစ်ပါတယ်။စတင်အကောင်အထည်ဖော်ဆောင်ရွက်သည့်အချိန်မှစပြီးတော့သုံးနှစ်အတွင်းမှာအပြီးတည်
ဆောက်သွားမှာဖြစ်ပြီးတော့ဒီစီမံကိန်းလုပ်ငန်းကိုနိုင်ငံတော်ဘဏ္ဍာငွေဖြင့်တည်ဆောက်သွားမှာမဟုတ်ပဲနဲ့နိုင်ငံတကာကုမ္ပဏီများ၏ကိုယ်ပိုင်အရင်းအနှီးဖြင့်ထည့်ဝင်ဆောင်ရွက်သွားစေမှာဖြစ်ပါတယ်”ဟုဆိုသည်။

ပြန်လည်ရရှိမည့်ငွေကြေးစနစ်အနေဖြင့်Inner Ring Roadကိုအသုံးပြုသွားလာမည့်မော်တော်ယာဉ်များထံမှလမ်းဖြတ်သန်းခကောက်ခံပြီးအရင်းကြေရန်နှင့်အကျိုးအမြတ်ရရန်စီမံဆောင်ရွက်သွားမည်ဖြစ်ကြောင်းသိရသည်။

အဆိုပါစီမံကိန်းနှင့်ပတ်သတ်ပြီးလုပ်ငန်းစဉ်အဆင့်အလိုက်တစ်ဆင့်ချင်းအကောင်အထည်ဖော်ဆောင်ရွက်လျှက်ရှိပါကြောင်းနှင့်အသေးစိတ်အစီအစဉ်များကိုတစ်ဆင့်ချင်းထုတ်ပြန်ကြေညာပေးသွားမည်ဖြစ်ကြောင်းဒုတိယဝန်ကြီးကဖြေကြားခဲ့သည်။

ရန်ကုန်မြို့တွင်းယာဉ်ကြောကြပ်တည်းမှုပြသနာများကိုဖြေရှင်းရန်ရန်ကုန်မိုးပျံအမြန်လမ်းမကြီးဆောက်လုပ်ရန်အတွက်ဂျပန်နိုင်ငံအပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ(JICA)မှပဏာမအဆိုပြုတင်ပြခဲ့ခြင်းဖြစ်ကြောင်းသိရသည်။

ရန်ကုန်မိုးပျံအမြန်လမ်းမကြီးစီမံကိန်းမှာဗိုလ်တစ်ထောင်ဘုရားလမ်းနှင့်ကမ်းနားလမ်းထောင့်မှစတင်၍ဗိုလ်တစ်ထောင်ဘုရားလမ်းဗိုလ်ချုပ်လမ်းပုဇွန်တောင်မြောက်ဥက္ကလာခရေပင်လမ်းအောက်မင်္ဂလာဒုံလမ်းဘုရင့်နောင်လမ်းကြည့်မြင်တိုင်လမ်းတို့ကိုဖြတ်သန်းပြီးပန်းလှိုင်လမ်းတွင်ပြီးဆုံးမည်ဖြစ်ကြောင်းဦးကျော်လင်းကဆိုသည်။

မိုးပျံလမ်းတစ်ခုလုံး၏အရှည်မှာ(၄၇)ကီလိုမီတာခန့်ရှိမည်ဖြစ်ပြီးစီမံကိန်းလုပ်ငန်းပထမအဆင့်အနေဖြင့်(၁၈.၅.၂၀၁၈)တွင်စိတ်ဝင်စားမှုဖော်ပြခြင်းလျှောက်လွှာကိုတင်သွင်းရန်နိုင်ငံပိုင်သတင်းစာများတွင်ကြော်ငြာခဲ့ပြီး(၂၉.၆.၂၀၁၈)ရက်နေ့တွင်တင်ဒါပိတ်ခဲ့ကြောင်းသိရသည်။

မေးခွန်းမေးမြန်းခဲ့သူဦးနေမျိုးထက်က”ဆောက်လုပ်ရေးဝန်ကြီးဌာနရဲ့အဖြေအရဆိုရင်တော့ဒါတွေကသူတို့ဆောက်လုပ်ရေးဝန်ကြီးဌာနကလုပ်တာမဟုတ်ဘူး။World Bankကရယ်နိုင်ငံတကာအဖွဲ့အစည်းတွေကနေလုပ်တာ။အရည်အသွေးတွေကောင်းအောင်သူတို့လုပ်မယ်။ပြီးတော့နိုင်ငံတကာဈေးနှုန်းအတိုင်းတစ်မိုင်ကိုဘယ်လောက်နှုန်းလဲဆိုတာသူတို့နိုင်ငံတကာစံနှုန်းတွေရှိပါတယ်။အဲ့ဒီဟာနဲ့တွက်မယ်”ဟုအစည်းအဝေးအပြီးတွင်မီဒီယာများကိုဖြေကြားခဲ့သည်။

၎င်းအနေဖြင့်လာမည့်(၂၀၂၂)ခုနှစ်ခန့်တွင်ရန်ကုန်မြို့အတွင်းယာဉ်ကြောကြပ်တည်းမှုများအထိုက်အလျှောက်ပြေလျော့သွားမည်ဟုခန့်မှန်းထားကြောင်းသိရသည်။

ဖူးဖူးအောင်

Comments (0)

Leave a reply

Your email address will not be published. Required fields are marked *

*