ပါရီအစည်းအဝေးတစ်ခုမှာ ယူကရိန်းသို့ တပ်တွေစေလွှတ်ရေးကို ရွေးချယ်စရာအချက်တစ်ခုအဖြစ် ဖော်ပြလာခဲ့ပြီးနောက် ဒီကိစ္စကို မစဉ်းစားဘူးလို့ ပိုလန်နဲ့ ချက်နိုင်ငံတို့က ပြောဆိုလိုက်ကြောင်း သိရပါတယ်။ သို့ပေမယ့် ကိဗ်အတွက် ခဲယမ်းမီးကျောက်တွေ ပိုမိုဝယ်ယူရေး ပူးပေါင်းဆောင်ရွက်ဖို့ကိုတော့ ၎င်းတို့က သဘောတူခဲ့ကြပါတယ်။
တနင်္လာနေ့က အစည်းအဝေးအတွင်း ဥရောပနိုင်ငံတွေက ယူကရိန်းသို့ တပ်တွေစေလွှတ်ပေးပို့ရေး ဖြစ်နိုင်ချေအပေါ် ပြင်သစ်သမ္မတ မီမန်နူရယ်မက်ခရွန်က စကားလမ်းကြောင်းခဲ့တာဖြစ်ပြီး “ဘာကိုမှ ချန်လှပ်မထားသင့်ဘူး” လို့ သူက ပြောဆိုခဲ့တာပါ။ သို့သော်လည်း ဒီအဆင့်မှာတော့ သဘောတူညီချက် မရရှိခဲ့ကြောင်းနဲ့ ရုရှားရဲ့ ကျူးကျော်စစ် သုံးနှစ်မြောက်ကာလကို ဝင်ရောက်လာချိန်မှာ ယူကရိန်းကို ခဲယမ်း မီးကျောက်တွေ ပိုမိုထောက်ပံ့ရေး တိုးမြှင့်ဆောင်ရွက်သွားကြဖို့ မဟာမိတ်တွေ သဘောတူခဲ့ကြတယ်လို့ မက်ခရွန်က ဆိုပါတယ်။
နေတိုးရဲ့ ဥရောပအဖွဲ့ဝင်နိုင်ငံတွေက ယူကရိန်းကို တပ်ဖွဲ့တွေ စေလွှတ်ခဲ့မယ်ဆိုပါက ရုရှားနဲ့ အမေရိကန်ဦးဆောင်သော နေတိုးစစ်မဟာမိတ်အကြား ပဋိပက္ခကို ရှောင်လွှဲလို့ရမှာမဟုတ်ကြောင်း ရုရှားက အင်္ဂါနေ့မှာ သတိပေးခဲ့ပါတယ်။
မက်ခရွန်ရဲ့ ပြောဆိုချက်နဲ့ ပတ်သက်ပြီး ချက်ဝန်ကြီးချုပ် Petr Fiala နဲ့ ပိုလန်ဝန်ကြီးချုပ် Donald Tusk တို့ကို မေးမြန်းခဲ့ရာမှာ တပ်တွေ စေလွှတ်ရေးအချက်ကို သူတို့အစိုးရတွေက စဉ်းစားခြင်းမရှိဘူးလို့ ဖြေကြားခဲ့ကြကြောင်း သိရပါတယ်။
Ref: U.S. News
