ထရမ့်ပ်နှင့် ဇလန်းစကီးဆွေးနွေးမှု အချေအတင်ဖြစ်ကာ အဆုံးသတ်

အမေရိကန်သမ္မတ၏ ရုရှားနှင့် သဘောတူညီချက်ရရန် ကြားဝင်ကြိုးပမ်းခြင်းဖြင့် ရေရှည်တည်တံ့သော ငြိမ်းချမ်းရေး ဖြစ်ထွန်းနိုင်မည်လားဆိုသည့် ယူကရိန်းသမ္မတ၏ သံသယကြောင့် အမေရိကနှင့် ယူကရိန်းအကြား အရေးပါသော ဓါတ်သတ္ထု့ဆိုင်ရာ သဘောတူညီချက်တစ်ရပ်ကို လက်မှတ်ရေးထိုးရေး စီစဉ်ထားသော ဒေါ်နယ်ထရမ့်ပ်နှင့် ဇလန်းစကီးတို့၏ တွေ့ဆုံဆွေးနွေးမှုသည် ရုတ်ချည်း အပြန်အလှန် ပြစ်တင်ပြောဆိုခြင်းများဖြစ်ပေါ်ခဲ့ကာ အစီအစဉ်ပျက်ပြယ်သွားခဲ့သည်။

လူသိရှင်ကြား ဆွေးနွေးပွဲတွင် စကားများခဲ့ပြီးနောက် ဇလန်းစကီးသည် စီစဉ်ထားသော လက်မှတ်ရေးထိုးမှုနှင့် သတင်းစာရှင်းလင်းပွဲကို ဖျက်သိမ်းကာ အိမ်ဖြူတော်မှ ထွက်သွားခဲ့သည်။

ရုရှားသမ္မတ ဗလာဒီမာပူတင်နှင့် သဘောတူညီချက်တစ်ခုရရန် ကြားဝင်ဆောင်ရွက်ပေးနေသော မစ္စတာထရမ့်ပ်က အမေရိက၏ ထောက်ပံ့မှုအတွက် တုန့်ပြန်ပေးဆပ်ရမည့် အချက်တစ်ခုဖြစ်သော သတ္ထု့တွင်းထွက်ဆိုင်ရာ သဘောတူညီချက်ကို လက်မှတ်မထိုးဘဲ ဇလန်းစကီး ထွက်သွားခဲ့ခြင်းဟု အမေရိကန်အရာရှိများက ပြောဆိုသည်။

“အမေရိကန်ပြည်ထောင်စုရဲ့ အလေးအမြတ်ထားရာ ဘဲဥပုံရုံးခန်းကို သူ က မလေးမစားလုပ်ခဲ့တယ်။ ငြိမ်းချမ်းရေးအတွက် အသင့်ဖြစ်ပြီဆိုမှပဲ သူ ပြန်လာလို့ ရပါမယ်” ဟု ဇလန်းစကီး ထွက်ခွာသွားပြီး မကြာမီတွင် ထရမ့်ပ်က ဆိုရှယ်မီဒီယာပေါ် ပို့စ်တင် ပြောဆိုခဲ့သည်။

စီစဉ်ထားသည့် သဘောတူညီချက်သည် ရုရှား၏ ရန်လိုမှုကို ဟန့်တားနိုင်လောက်သည့် အနေအထားရှိသည်ဟု သူ မယုံကြည်ကြောင်း ယူကရိန်းသမ္မတက ပြောဆိုကာ ထရမ့်ပ်နှင့် ဒုတိယ သမ္မတ ဂျေဒီ ဗန့်စ်တို့ကို ဒေါသထွက်ခဲ့သည်။

“ပူတင်က ဘယ်တော့မှ ရပ်မှာ မဟုတ်ဘူး၊ဒီထက်ပို ဆက်လုပ်သွားမှာ” ဟု သူက ပြောဆိုခဲ့ပြီး ရုရှားခေါင်းဆောင်သည် ယူကရိန်းနိုင်ငံသားများကို မုန်းတီးနေကြောင်းနှင့် တိုင်းပြည်ကို ဖျက်ဆီးလိုနေကြောင်း ဆိုခဲ့သည်။ ငါတို့ လုပ်နိုင်ပါတယ်၊ “ဒါပေမဲ့ ဒီဟာလောက်နဲ့တော့ မရသေးဘူး” ဟု သူက သဘောတူညီချက်နှင့်ပတ်သက်၍ ဆက်လက် ပြောကြားခဲ့သည်။

မစ္စတာ ဇလန်းစကီးသည် သူ၏ သဘောထားရပ်တည်ချက်ကို ရှင်းပြရန် ကြိုးစားရင်း မစ္စတာ ထရမ့်ပ်နှင့် မစ္စတာ ဗန့်စ်တို့နှင့် အငြင်းအခုံများဖြစ်ခဲ့ကာ ဘဲဥပုံရုံးခန်းတွင် သူ၏ ရှင်းလင်းတင်ပြချက်များသည် အရိုအသေကင်းမဲ့ကာ သုံးနှစ်ကြာစစ်ပွဲ အဆုံးသတ်ရေးကို အဟန့်အတားဖြစ်စေခဲ့သည်ဟု ဆိုသည်။

Ref: သည်စထရိတ်တိုင်းမ်စ်