လူမှုဝန်ထမ်းဦးစီးဌာနလက်အောက်ရှိ မူလတန်းကြိုကျောင်းများတွင် ကလေးတစ်ဦးလျှင် တစ်ရက်တာ အာဟာရဖြည့်စွက်စရိတ်အဖြစ် သတ်မှတ်ထားသည့် ၅၀၀ ကျပ်နှုန်းကို လက်ရှိကုန်ဈေးနှုန်းနှင့်အညီ တိုးမြှင့်ပေးရန် သို့မဟုတ် တိုင်းဒေသကြီးအစိုးရ၏ သီးခြားရန်ပုံငွေဖြင့် ထပ်ဆောင်းထောက်ပံ့ပေးရန် အစီအစဉ်မရှိသေးကြောင်း ရန်ကုန်တိုင်းဒေသကြီးအစိုးရအဖွဲ့က ဖြေကြားခဲ့သည်။
ယင်းမေးခွန်းကို ဒဂုံမြို့သစ် (မြောက်ပိုင်း) မြို့နယ် မဲဆန္ဒနယ်အမှတ် (၁) တိုင်းဒေသကြီးလွှတ်တော်ကိုယ်စားလှယ် ဒေါ်ဇာခြည်လင်းက တိုင်းဒေသကြီးလွှတ်တော်အစည်းအဝေးတွင် မေးမြန်းခဲ့ခြင်းဖြစ်သည်။
ဒေါ်ဇာခြည်လင်းက ၂၀၁၀ ခုနှစ်ဝန်းကျင်ကာလများတွင် မူလတန်းကြိုကျောင်းများရှိ ကလေးငယ်များအတွက် တစ်ဦးလျှင် ၅၀၀ ကျပ်နှုန်းဖြင့် သင့်တင့်မျှတသည့် နေ့လယ်စာနှင့် အာဟာရဖြည့်စွက်စာများ စီစဉ်ပေးနိုင်ခဲ့သော်လည်း လက်ရှိကုန်ဈေးနှုန်း မြင့်တက်လာမှုကြောင့် ၂၀၂၅ ခုနှစ် နိုဝင်ဘာလမှစတင်ကာ ကလေးများအနေဖြင့် အိမ်မှ ထမင်းချိုင့်ယူဆောင်လာရသည့် အခြေအနေသို့ ရောက်ရှိလာကြောင်း ထောက်ပြပြောကြားခဲ့သည်။
ထို့ပြင် လက်ရှိသတ်မှတ်ထားသည့် ၅၀၀ ကျပ်နှုန်းဖြင့် ကလေးတစ်ဦးအတွက် အာဟာရပြည့်ဝစေမည့် နို့၊ ကြက်ဥ၊ အသီးအနှံများ ဝယ်ယူကျွေးမွေးရန် မလုံလောက်တော့ဘဲ ကစီဓာတ်များသည့် တန်ဖိုးနည်း မုန့်အမျိုးအစားများကိုသာ ကျွေးမွေးနိုင်သည့် အခြေအနေဖြစ်နေကြောင်း၊ ယင်းသည် ရေရှည်တွင် ကလေးငယ်များ၏ အာဟာရချို့တဲ့မှုကို ဖြစ်ပေါ်စေနိုင်ကြောင်း ၎င်းက ဆွေးနွေးခဲ့သည်။
ထို့ကြောင့် ရန်ကုန်တိုင်းဒေသကြီးအစိုးရနှင့် လူမှုဝန်ထမ်းဦးစီးဌာနအနေဖြင့် ကလေးတစ်ဦးအတွက် သတ်မှတ်ထားသည့် အာဟာရဖြည့်စွက်စရိတ် ၅၀၀ ကျပ်နှုန်းကို ကာလပေါက်ဈေးနှင့်အညီ တိုးမြှင့်သတ်မှတ်ပေးရန် သို့မဟုတ် တိုင်းဒေသကြီးအစိုးရ၏ သီးခြားရန်ပုံငွေဖြင့် ထပ်ဆောင်းထောက်ပံ့ပေးရန် အစီအစဉ်ရှိ၊ မရှိ မေးမြန်းခဲ့သည်။
ယင်းမေးခွန်းနှင့်ပတ်သက်၍ ရန်ကုန်တိုင်းဒေသကြီးအစိုးရအဖွဲ့၏ ပြန်ကြားရေး၊ ကယ်ဆယ်ရေးနှင့် သာသနာရေးဝန်ကြီး ဦးနေလင်းထွန်းက ရန်ကုန်တိုင်းဒေသကြီးအတွင်း မြို့နယ် ၂၄ မြို့နယ်တွင် လူမှုဝန်ထမ်းဦးစီးဌာန၏ ကြီးကြပ်မှုဖြင့် မူလတန်းကြိုကျောင်း ၃၆ ကျောင်း ဖွင့်လှစ်ထားရှိပြီး လူမှုဝန်ထမ်း ၂၁၃ ဦးမှ ကလေးငယ်များအား ပြုစုသင်ကြားပေးလျက်ရှိကြောင်း ပြောကြားခဲ့သည်။
ထို့နောက် မူကြိုကလေးငယ်များအား အာဟာရကျွေးမွေးမှုအစီအစဉ်များကို ယခင်ကတည်းက တိုင်းဒေသကြီးအစိုးရ၏ ရန်ပုံငွေဖြင့် ဆောင်ရွက်ခဲ့ခြင်းမဟုတ်ဘဲ ပြည်ထောင်စုအစိုးရ၏ ရန်ပုံငွေဖြင့်သာ ဆောင်ရွက်ခဲ့ခြင်းဖြစ်ကြောင်း၊ ထို့ကြောင့် တိုင်းဒေသကြီးအစိုးရ၏ သီးခြားရန်ပုံငွေဖြင့် ထပ်ဆောင်းထောက်ပံ့ပေးရန် အစီအစဉ်မရှိသေးကြောင်းနှင့် လိုအပ်ချက်များကို လူမှုဝန်ထမ်းဦးစီးဌာနမှတစ်ဆင့် ပြည်ထောင်စုအစိုးရထံ တင်ပြဆောင်ရွက်သွားရမည်ဖြစ်ကြောင်း ပြန်လည်ဖြေကြားခဲ့သည်။
