ဘင်္ဂလားဒေ့ရှ်နိုင်ငံ ဒါကာမြို့ရှိ Hotel Sheraton ၌ ၂၀၂၆ ခုနှစ် ဇွန်လ ၈ ရက်က ကျင်းပသည့် ဘင်းမ်စတက် (BIMSTEC) အဖွဲ့ တည်ထောင်ခြင်း (၂၉) နှစ်ပြည့် အထိမ်းအမှတ်အခမ်းအနားသို့ ဘင်္ဂလားဒေ့ရှ်နိုင်ငံဆိုင်ရာ မြန်မာသံအမတ်ကြီး ဦးကျော်စိုးမိုး တက်ရောက်ခဲ့ကြောင်း သိရသည်။
အခမ်းအနားသို့ ဘင်္ဂလားဒေ့ရှ်နိုင်ငံ နိုင်ငံခြားရေးဝန်ကြီးဌာနမှ Hon’ble State Minister H.E. Ms. Shama Obaed Islam က အထူးဧည့်သည်တော်အဖြစ် တက်ရောက်ခဲ့ပြီး ဒါကာမြို့အခြေစိုက် ဘင်းမ်စတက်အဖွဲ့ဝင်နိုင်ငံများ၏ သံရုံးအကြီးအကဲများ၊ သံရုံးယာယီတာဝန်ခံများနှင့် သံတမန်များ စုစုပေါင်း ၂၅၀ ခန့် တက်ရောက်ခဲ့ကြကြောင်း သိရသည်။
အခမ်းအနားတွင် အထူးဧည့်သည်တော် H.E. Shama Obaed Islam နှင့် ဘင်းမ်စတက်အတွင်းရေးမှူးချုပ် H.E. Indra Mani Pandey တို့က အမှာစကားများ အသီးသီး ပြောကြားခဲ့ကြသည်။
ထို့နောက် အထူးဧည့်သည်တော်၊ ဘင်းမ်စတက်အတွင်းရေးမှူးချုပ်နှင့် အဖွဲ့ဝင်နိုင်ငံများ၏ သံရုံးအကြီးအကဲများက ဘင်းမ်စတက်နေ့ အထိမ်းအမှတ် ကိတ်မုန့်ကို ပူးပေါင်းဖြတ်တောက်ကာ အမှတ်တရဓာတ်ပုံများ ရိုက်ကူးခဲ့ကြသည်။
အခမ်းအနားအတွင်း မြန်မာသံရုံးနှင့် မြန်မာစစ်သံရုံးတို့က မြန်မာ့ရိုးရာလက်မှုပစ္စည်းများ၊ ယွန်းထည်လက်ရာများကို ပြသခဲ့ပြီး မြန်မာနိုင်ငံအလံ ဝှေ့ယမ်းချီတက်သည့် သရုပ်ပြအစီအစဉ်များလည်း ပါဝင်ခဲ့ကြောင်း သိရသည်။
အဆိုပါ အခမ်းအနားသည် ဘင်းမ်စတက်အဖွဲ့ဝင်နိုင်ငံများအကြား ချစ်ကြည်ရင်းနှီးမှုနှင့် ဒေသတွင်း ပူးပေါင်းဆောင်ရွက်မှုများ ပိုမိုတိုးတက်ခိုင်မာလာစေရေး ရည်ရွယ်ကျင်းပခြင်းဖြစ်ကြောင်း သိရသည်။