မြန်မာ့ကမ်းလွန်ပင်လယ်ပြင်တွင် အလားအလာကောင်းမွန်သော ဧရာမ သဘာဝဓာတ်ငွေ့သိုက်သစ်များ ရှာဖွေတွေ့ရှိ၊ တနင်္သာရီကမ်းလွန်တွင် ၉၅ ထရီလီယံကုဗပေခန့်အထိ ထွက်ရှိနိုင်ခြေရှိ

မြန်မာ့ကမ်းလွန်ပင်လယ်ပြင် ရေနက်ပိုင်းဒေသများတွင် ပမာဏအလွန်ကြီးမားပြီး စီးပွားဖြစ်ထုတ်လုပ်ရန် အလားအလာကောင်းမွန်သည့် သဘာဝဓာတ်ငွေ့သိုက်သစ်များကို ထပ်မံရှာဖွေတွေ့ရှိထားပြီး လက်ရှိတွင် စီးပွားဖြစ် တူးဖော်ထုတ်လုပ်နိုင်ရေး လုပ်ငန်းစဉ်များကို စတင်ဆောင်ရွက်နေပြီဖြစ်ကြောင်း သိရသည်။

လက်ရှိတွင် မြန်မာနိုင်ငံ၌ ရတနာ၊ ဇောတိက၊ ရွှေ နှင့် ရဲတံခွန် ကဲ့သို့သော ကမ်းလွန်သဘာဝဓာတ်ငွေ့စီမံကိန်း (၄) ခုကို အကောင်အထည်ဖော် ဆောင်ရွက်လျက်ရှိသည်။ အဆိုပါ စီမံကိန်းများမှ ထွက်ရှိသည့် သဘာဝဓာတ်ငွေ့များကို နိုင်ငံတော်၏ လျှပ်စစ်ဓာတ်အား ထုတ်လုပ်မှုကဏ္ဍ၊ စိုက်ပျိုးရေးအတွက် မရှိမဖြစ်လိုအပ်သည့် ဓာတ်မြေဩဇာ ထုတ်လုပ်မှု လုပ်ငန်းများနှင့် ပြည်တွင်းစက်မှုကုန်ထုတ်လုပ်ငန်းများတွင် အဓိကမောင်းနှင်အားအဖြစ် အားထားအသုံးပြုလျက်ရှိသည်။ ယခုအခါ ပြည်တွင်းစွမ်းအင် လိုအပ်ချက်ကို ပိုမိုဖြည့်ဆည်းပေးနိုင်ရန်နှင့် ပို့ကုန်ကဏ္ဍမြှင့်တင်ရန်အတွက် စီမံကိန်းအသစ် (၄) ခုကို ထပ်မံဖော်ဆောင်လျက်ရှိရာ ယင်းတို့အနက် လုပ်ကွက်ကြီး (၂) ခုတွင် အလားအလာကောင်းများ ထူးထူးခြားခြား တွေ့ရှိလာရခြင်းဖြစ်သည်။

အလားအလာအကောင်းဆုံး ကမ်းလွန်ရေနက်လုပ်ကွက်ကြီး (၂) ခု၏ အခြေအနေ

ယခုထပ်မံတိုးချဲ့နေသည့် စီမံကိန်းသစ် (၄) ခုအနက် ဧရာဝတီကမ်းလွန်ဒေသနှင့် တနင်္သာရီကမ်းလွန်ဒေသ စီမံကိန်းများသည် ဓာတ်ငွေ့သိုက်ပမာဏ အလွန်ကြီးမားကြောင်း တွေ့ရှိရပြီး အသေးစိတ်အခြေအနေမှာ အောက်ပါအတိုင်း ဖြစ်သည် –

ဧရာဝတီကမ်းလွန်ဒေသလုပ်ကွက်စီမံကိန်း

ဧရာဝတီကမ်းလွန် ရေနက်ပိုင်းတွင် တည်ရှိပြီး သဘာဝဓာတ်ငွေ့ ၁၄ ထရီလီယံ ကုဗပေခန့် အထိ ထွက်ရှိရန် အလားအလာရှိသည်။ လက်ရှိတွင် အစမ်းတွင်းနှင့် အတည်ပြုတွင်းများ တူးဖော်ကာ စီးပွားဖြစ် စတင်ထုတ်လုပ်နိုင်ရေး လုပ်ငန်းစဉ်များကို အရှိန်အဟုန်ဖြင့် စတင်ဆောင်ရွက်နေပြီ ဖြစ်သည်။

တနင်္သာရီကမ်းလွန်ဒေသလုပ်ကွက်စီမံကိန်း

တနင်္သာရီကမ်းလွန် ရေနက်ပိုင်းတွင် တည်ရှိပြီး သဘာဝဓာတ်ငွေ့ ၉၅ ထရီလီယံ ကုဗပေခန့် အထိ ထွက်ရှိနိုင်သည့် အလားအလာအလွန်ကောင်းသော ဓာတ်ငွေ့သိုက်ကြီးဖြစ်သည်။ လက်ရှိတွင် အစမ်းတွင်းများကို ဆက်လက်တူးဖော်သွားမည်ဖြစ်ပြီး ဓာတ်ငွေ့ခိုအောင်းနေမှု ပမာဏ တိကျသေချာစွာ သိရှိရသည်နှင့်တစ်ပြိုင်နက် စီးပွားဖြစ် တူးဖော်ထုတ်လုပ်နိုင်ရေး ဆက်လက်ဆောင်ရွက်သွားမည် ဖြစ်သည်။

စီးပွားရေးနှင့် စွမ်းအင်ကဏ္ဍအပေါ် သက်ရောက်မှု အလားအလာ

အဆိုပါ ကမ်းလွန်ရေနက်လုပ်ကွက်သစ်များမှ သဘာဝဓာတ်ငွေ့များ စီးပွားဖြစ် အောင်မြင်စွာ တူးဖော်ထုတ်လုပ်နိုင်ပါက ရေရှည်တွင် ပြည်တွင်းလျှပ်စစ်ဓာတ်အား ပုံမှန်ရရှိရေးအတွက် များစွာအထောက်အကူပြုနိုင်မည် ဖြစ်သည်။ ထို့ပြင် နိုင်ငံခြားဝင်ငွေ ရှာဖွေပေးနိုင်မည့် မဟာဗျူဟာမြောက် စွမ်းအင်စီမံကိန်းသစ်များ ဖြစ်လာနိုင်ကြောင်း စွမ်းအင်ကဏ္ဍ လေ့လာသူများက သုံးသပ်ထားကြသည်။