နေပြည်တော်၊ ဇူလိုင်-၁၇
အဆိပ်ရှိပစ္စည်းများဖြစ်သော Thiamethoxam နှင့် Clothianidin ပိုးသတ်ဆေးများကို မြန်မာနိုင်ငံအတွင်း (၂)နှစ်ကြာ သုံးစွဲခွင့်တားမြစ်ပိတ်ပင်သည့် ပိုးသတ်ဆေးများ (Banned Pesticides) အဖြစ် သတ်မှတ်မည်ဖြစ်ကြောင်း မြန်မာနိုင်ငံ ပိုးသတ်ဆေးမှတ်ပုံတင်အဖွဲ့က ဇူလိုင် ၁၆ ရက်ထုတ် နိုင်ငံပိုင်သတင်းစာမှတစ်ဆင့် အသိပေးထုတ်ပြန်ထားသည်။
ယင်းဆုံးဖြတ်ချက်မှာ ဇူလိုင် ၇ ရက်က ကျင်းပခဲ့သည့် (၄၈)ကြိမ်မြောက် ပိုးသတ်ဆေးမှတ်ပုံတင်အဖွဲ့အစည်းအဝေး၏ ဆုံးဖြတ်ချက်အရ ဆောင်ရွက်ခြင်းဖြစ်ပြီး လယ်ယာထွက်ကုန်များတွင် ဓာတ်ကြွင်းကင်းစင်စေရေးအတွက် လိုအပ်သည့်အတွက် Thiamethoxam နှင့် Clothianidin ပိုးသတ်ဆေးများကို ဇူလိုင် ၁၅ ရက်မှစတင်ကာ (၂) နှစ်တာ တားမြစ်ပိတ်ပင်သွားမည်ဖြစ်ကြောင်း သိရသည်။
ထို့ပြင် ကုမ္ပဏီများ၊ အရောင်းကိုယ်စားလှယ်များ၊ တောင်သူလယ်သမားများနှင့် အရောင်းဆိုင်များအနေဖြင့် လက်ကျန် Thiamethoxam နှင့် Clothianidin ပိုးသတ်ဆေးများကို ဇူလိုင်လကုန်နောက်ဆုံးထား၍ နီးစပ်ရာ စိုက်ပျိုးရေးဦးစီးဌာနရုံးများသို့ အပ်နှံရမည်ဖြစ်ကြောင်းလည်း အသိပေးထားသည်။
တားမြစ်ကာလ (၂) နှစ်အတွင်း အဆိုပါပိုးသတ်ဆေးများကို မည်သည့်အစိုးရဌာန၊ အဖွဲ့အစည်း သို့မဟုတ် ပုဂ္ဂလိကလုပ်ငန်းကမျှ မှတ်ပုံတင်ခြင်း၊ တင်သွင်းခြင်း၊ သိုလှောင်ခြင်း၊ ဖော်စပ်ခြင်း၊ ပြန်လည်ထုပ်ပိုးခြင်း၊ ရောင်းချခြင်းနှင့် သုံးစွဲခြင်းများကို ခွင့်ပြုမည်မဟုတ်ဘဲ စစ်ဆေးတွေ့ရှိပါက ပိုးသတ်ဆေးဥပဒေအရ ထိရောက်စွာ အရေးယူသွားမည်ဖြစ်ကြောင်း မြန်မာနိုင်ငံ ပိုးသတ်ဆေးမှတ်ပုံတင်အဖွဲ့က ထုတ်ပြန်ထားသည်။
ယင်းပိုးသတ်ဆေး (၂) မျိုးကို တားမြစ်ပိတ်ပင်မည်ဖြစ်ကြောင်း အမိန့်ကြော်ငြာစာအမှတ် ၁၉/၂၀၂၅ ဖြင့် ၂၀၂၅ ခုနှစ် ဒီဇင်ဘာ ၉ ရက်ကပင် ထုတ်ပြန်ကြေညာထားပြီးဖြစ်ကြောင်း သိရသည်။
Thiamethoxam နှင့် Clothianidin သည် Neonicotinoid ဓာတုဗေဒမိသားစုဝင် ပိုးသတ်ဆေးများဖြစ်ပြီး စားသုံးသီးနှံများရှိ ပိုးမွှားများကို ထိန်းချုပ်ရာတွင် စိုက်ပျိုးရေးကဏ္ဍ၌ ကျယ်ကျယ်ပြန့်ပြန့် အသုံးပြုလေ့ရှိသော်လည်း အဆိပ်အာနိသင်နှင့် ဓာတ်ကြွင်းဆိုင်ရာ စိုးရိမ်မှုများကြောင့် နိုင်ငံအချို့တွင် သုံးစွဲမှုကို ကန့်သတ်ခြင်းနှင့် တားမြစ်ခြင်းများ ဆောင်ရွက်လျက်ရှိသည်။
