နီပေါက ဒေသတွင်းချိတ်ဆက်မှု၊ ရာသီဥတုပြောင်းလဲမှု တုံ့ပြန်ရေးနှင့် နီပေါ-တရုတ် ပူးပေါင်းဆောင်ရွက်မှု မြှင့်တင်ရေး ဆွေးနွေး

ရှီးဇန်း၊ ဇူလိုင် ၁၇

တရုတ်နိုင်ငံ၊ ရှီးဇန်း (တိဘက်) ကိုယ်ပိုင်အုပ်ချုပ်ခွင့်ရဒေသ၊ လင်ကျီး (Nyingchi) မြို့တွင် ဇူလိုင်လ ၁၇ ရက် နေ့က ကျင်းပသည့် (၁၅) ကြိမ်မြောက် တရုတ်-ရှီးဇန်း Trans-Himalaya အပြည်ပြည်ဆိုင်ရာ ပူးပေါင်းဆောင်ရွက်ရေးဖိုရမ် ဖွင့်ပွဲအခမ်းအနား၌ နီပေါနိုင်ငံ အောက်လွှတ်တော် ဒုတိယဥက္ကဋ္ဌ ဒေါ် ရူဘီ ကူမာရီ (Rubi Kumari) က မိန့်ခွန်းပြောကြားခဲ့ပြီး ဒေသတွင်း ချိတ်ဆက်ဆောင်ရွက်မှု မြှင့်တင်ရေး၊ ရာသီဥတုပြောင်းလဲမှုဆိုင်ရာ စိန်ခေါ်မှုများကို ပူးပေါင်းတုံ့ပြန်ရေးနှင့် နီပေါ-တရုတ် နှစ်နိုင်ငံ ချစ်ကြည်ရင်းနှီးမှု ဆက်လက်တိုးမြှင့်ရေးတို့ကို အလေးထား ပြောကြားခဲ့သည်။

အဖွဲ့ဝင် (၅) ဦးပါ နီပေါလွှတ်တော်ကိုယ်စားလှယ်အဖွဲ့ကို ဦးဆောင်တက်ရောက်လာသည့် ဒုတိယဥက္ကဋ္ဌ ရူဘီ ကူမာရီက Trans-Himalaya ဒေသသည် ရှေးဟောင်းယဉ်ကျေးမှု၊ ကုန်သွယ်ရေး၊ ယဉ်ကျေးမှုဖလှယ်ရေးနှင့် ပြည်သူချင်းချိတ်ဆက်မှုများ အစဉ်အလာကြီးမားသည့် ဒေသတစ်ခုဖြစ်ကြောင်း ပြောကြားခဲ့သည်။

ထို့ပြင် ဟိမဝန္တာတောင်တန်းများသည် နိုင်ငံများကို ခွဲခြားထားခြင်းမဟုတ်ဘဲ အပြန်အလှန်ယုံကြည်မှု၊ ပူးပေါင်းဆောင်ရွက်မှုနှင့် အတူယှဉ်တွဲနေထိုင်ရေးကို ချိတ်ဆက်ပေးသည့် တံတားတစ်စင်းအဖြစ် ရပ်တည်လျက်ရှိကြောင်းလည်း ၎င်းက ဆိုသည်။

ရာသီဥတုပြောင်းလဲမှုသည် ဟိမဝန္တာဒေသအတွက် အရေးပေါ်ရင်ဆိုင်နေရသည့် စိန်ခေါ်မှုဖြစ်ကြောင်း၊ ရေခဲတောင်များ အလျင်အမြန် အရည်ပျော်လာခြင်း၊ ရေခဲကန်ပေါက်ကွဲရေလွှမ်းမိုးမှုများ၊ ဇီဝမျိုးစုံကွဲပြားမှု လျော့နည်းလာခြင်းနှင့် ရေအရင်းအမြစ်ဆိုင်ရာ ပြဿနာများကို ဒေသတွင်းနိုင်ငံများ ပူးပေါင်းဖြေရှင်းရန် လိုအပ်ကြောင်းလည်း ပြောကြားခဲ့သည်။

ယင်းအပြင် ဟိမဝန္တာဒေသ၏ သဘာဝပတ်ဝန်းကျင်၊ ရေအရင်းအမြစ်များနှင့် ရိုးရာအသိပညာများ၊ အထူးသဖြင့် Amchi ရိုးရာတိုင်းရင်းဆေးပညာစနစ်ကို ထိန်းသိမ်းနိုင်ရေးအတွက် ပညာရေးနှင့် သုတေသနအဖွဲ့အစည်းများအကြား ပူးပေါင်းသုတေသနများ ဆောင်ရွက်သင့်ကြောင်း တိုက်တွန်းခဲ့သည်။

ဒေသတွင်း ဖွံ့ဖြိုးတိုးတက်ရေးအတွက် လမ်းပန်းဆက်သွယ်ရေး၊ ရထားလမ်း၊ လေကြောင်း၊ စွမ်းအင်ကွန်ရက်နှင့် ဒစ်ဂျစ်တယ်အခြေခံအဆောက်အအုံများ အပါအဝင် ဘက်စုံချိတ်ဆက်မှုသည် အခြေခံအုတ်မြစ်ဖြစ်ကြောင်း၊ နီပေါနိုင်ငံသည် တောင်အာရှ၊ အရှေ့အာရှ၊ အရှေ့တောင်အာရှနှင့် အလယ်အာရှတို့ကို ဆက်သွယ်ပေးသည့် သဘာဝတံတားတစ်စင်းဖြစ်ကြောင်းလည်း ပြောကြားခဲ့သည်။

နီပေါနိုင်ငံသည် ရပ်ဝန်းနှင့်လမ်းမ (BRI) စီမံကိန်းတွင် ပါဝင်ဆောင်ရွက်လျက်ရှိပြီး အခြေခံအဆောက်အဦ၊ ကုန်သွယ်ရေး၊ ရင်းနှီးမြှုပ်နှံမှု၊ စွမ်းအင်၊ ခရီးသွားလုပ်ငန်းနှင့် ပြည်သူချင်းဖလှယ်ရေးကဏ္ဍများတွင် လက်တွေ့ကျသည့် ပူးပေါင်းဆောင်ရွက်မှုများကို ဆက်လက်တိုးချဲ့သွားမည်ဖြစ်ကြောင်းလည်း ၎င်းက ပြောကြားခဲ့သည်။

ထို့အပြင် နီပေါနိုင်ငံ၏ လူမှုစီးပွားဖွံ့ဖြိုးတိုးတက်ရေးအတွက် တရုတ်နိုင်ငံ၏ ဆက်လက်ပံ့ပိုးကူညီမှုများကို ကျေးဇူးတင်ရှိကြောင်း၊ နှစ်နိုင်ငံ သမိုင်းဝင်ယဉ်ကျေးမှုဆက်ဆံရေးတွင် မင်းသမီး ဘရိကူတီ (Bhrikuti) နှင့် ပညာရှင် အာနီကို (Arniko) တို့၏ အခန်းကဏ္ဍကိုလည်း အမှတ်တရ ပြောကြားခဲ့သည်။

“လူနှင့်သဘာဝ သဟဇာတအတူယှဉ်တွဲနေထိုင်ရေး၊ ပူးပေါင်းဖွံ့ဖြိုးတိုးတက်မှု အကျိုးရလဒ်များကို မျှဝေရေး” ဟူသည့် ခေါင်းစဉ်ဖြင့် ဇူလိုင်လ ၁၆ ရက် နေ့မှ ၁၈ ရက်နေ့အထိ ကျင်းပလျက်ရှိသည့် အဆိုပါဖိုရမ်တွင် စိမ်းလန်းဖွံ့ဖြိုးတိုးတက်ရေးနှင့် သဘာဝပတ်ဝန်းကျင်ထိန်းသိမ်းရေးဆိုင်ရာ ကိစ္စရပ်များကို အဓိကဆွေးနွေးလျက်ရှိကြောင်း သိရသည်။

ဖိုရမ်ကာလအတွင်း ဒုတိယဥက္ကဋ္ဌ ရူဘီ ကူမာရီသည် ရှီးဇန်းကိုယ်ပိုင်အုပ်ချုပ်ခွင့်ရဒေသ ပါတီကော်မတီအတွင်းရေးမှူး ဝမ်ကျွင်းကျန့် (Wang Junzheng) နှင့်လည်း သီးခြားတွေ့ဆုံဆွေးနွေးခဲ့ကြောင်း သိရပြီး နီပေါကိုယ်စားလှယ်အဖွဲ့သည် ဇူလိုင်လ ၂၀ ရက်နေ့တွင် ကတ်မန်ဒူးမြို့သို့ ပြန်လည်ထွက်ခွာမည်ဖြစ်ကြောင်း သိရသည်။