မန္တလေးမြို့၏ နေ့ခင်းအချိန်၌ပင် ဆိုင်ကယ်မောင်းနှင်လာသူတစ်ဦးကို လုယက်မှုကျူးလွန်သူ တရားခံများကို ဖမ်းမိပြီဖြစ်ကြောင်း ရဲတပ်ဖွဲ့ သတင်းအရ သိရသည်။
ထိုလုယက်ခံရသည့် ရုပ်သံဖိုင်သည် လူမှုကွန်ယက်ပေါ် ဝေဖန်မှု မြင့်တက်ခဲ့ပြီး သုံးရက်အကြာတွင် ကျူးလွန်ခဲ့သည့် တရားခံလေးဦးကို ဖမ်းမိခြင်း ဖြစ်သည်။
အမှုဖြစ်စဉ်နှင့် ပတ်သက်၍ ပြည်ကြီးတံခွန်မြို့မရဲစခန်းတွင် (ပ) ၈၄/၂၀၂၆၊ ရာဇသတ်ကြီးပုဒ်မ ၃၈၂/၁၁၄ ဖြင့် အမှုဖွင့်လှစ်ကာ မဟာအောင်မြေခရိုင် မှုခင်းနှိမ်နင်းရေးအဖွဲ့မှ ဒုရဲမှူး လွင်အောင် ဦးစီးသည့် ပူးပေါင်းအဖွဲ့က လိုက်လံစုံစမ်းခဲ့ခြင်းဖြစ်သည်။
စုံစမ်းချက်အရ ဇွန်လ ၉ ရက်နေ့ နေ့လယ် ၃ နာရီခွဲခန့်တွင် ချမ်းမြသာစည်မြို့နယ်၊ ၄၉ လမ်းနှင့် ၁၁၆ လမ်းထောင့်ရှိ ပုဂံဘီယာဆိုင်၌ လုယက်သူများအနက် အသက် ၂၀ အရွယ် တရားခံ မျိုးသန့်ဇော် (ခ) သီဟဇော် (ခ) ဒီဒိုင်း ဆိုသူကို စတင်ဖမ်းဆီးရမိခဲ့သည်ဟု ဆိုသည်။
စစ်ဆေးဖော်ထုတ်ချက် ကွင်းဆက်အရ ထိုနေ့ည ၈ နာရီအချိန်တွင် အဆိုပါဘီယာဆိုင်၌ပင် ပုန်းအောင်းသောက်စားနေသည့် ကျန်ရှိသော ပူးပေါင်းကျူးလွန်သူများဖြစ်ကြသည့် အောင်သူရကျော် (ခ) ဖိုးချစ် (၁၉ နှစ်)၊ စိုင်းသူရထွန်း (ခ) ဟုတ်ပ (၂၀ နှစ်) နှင့် စိုင်းဇူးဇူးမောင် (၂၀ နှစ်) တို့ ၃ ဦးကို ထပ်မံဖမ်းဆီးရမိခဲ့သဖြင့် စုစုပေါင်း တရားခံ ၄ ဦးကို ဖော်ထုတ်နိုင်ခဲ့ခြင်းဖြစ်ကြောင်း သိရသည်။