မြန်မာ့ထမနဲကို UNESCO သို့ တင်ပြနိုင်ရေး ဆောင်ရွက်လျက်ရှိဟု ဒုတိယသမ္မတ ပြောကြား

မြန်မာ့ယဉ်ကျေးမှုအမွေအနှစ်များ ထိန်းသိမ်းမြှင့်တင်ရေး အလေးထားဆောင်ရွက်ရန် တိုက်တွန်း

မြန်မာ့ရိုးရာအစားအစာတစ်မျိုးဖြစ်သည့် မြန်မာ့ထမနဲကို UNESCO ၏ လူသားမျိုးနွယ်ဆိုင်ရာ ဒြပ်မဲ့ယဉ်ကျေးမှုအမွေအနှစ်စာရင်းတွင် ထည့်သွင်းအသိအမှတ်ပြုနိုင်ရေး ဆောင်ရွက်လျက်ရှိကြောင်း မြန်မာနိုင်ငံအမျိုးသားယဉ်ကျေးမှုဗဟိုကော်မတီဥက္ကဋ္ဌ ဒုတိယသမ္မတ ဒေါ်နန်းနီနီအေးက ပြောကြားခဲ့သည်။

မြန်မာနိုင်ငံအမျိုးသားယဉ်ကျေးမှုဗဟိုကော်မတီ နဝမအကြိမ်အစည်းအဝေးကို ဇွန် ၁၉ ရက် မွန်းလွဲပိုင်းက နေပြည်တော်ရှိ ယဉ်ကျေးမှုရတနာခန်းမ၌ ကျင်းပရာ ဒုတိယသမ္မတ ဒေါ်နန်းနီနီအေးက အဖွင့်အမှာစကား ပြောကြားစဉ် ထည့်သွင်းပြောကြားခဲ့ခြင်းဖြစ်သည်။

ဒုတိယသမ္မတက မြန်မာ့ယဉ်ကျေးမှုအမွေအနှစ်များနှင့် တိုင်းရင်းသားလူမျိုးများ၏ ရိုးရာဓလေ့ထုံးတမ်းများကို ရှာဖွေဖော်ထုတ်ထိန်းသိမ်းရန်နှင့် တိမ်မြုပ်ပျောက်ကွယ်နေသည့် ဒြပ်ရှိ၊ ဒြပ်မဲ့ ယဉ်ကျေးမှုအမွေအနှစ်များကို သုတေသနပြု ဖော်ထုတ်ထိန်းသိမ်းရန် လိုအပ်ကြောင်း ပြောကြားခဲ့သည်။

ထို့ပြင် အမျိုးသားယဉ်ကျေးမှုအမွေအနှစ်များသည် နိုင်ငံ၏ ဂုဏ်ယူဖွယ်ပုံရိပ်များဖြစ်သည့်အတွက် မျိုးဆက်သစ်များထံ လက်ဆင့်ကမ်းနိုင်ရေးနှင့် ရေရှည်တည်တံ့စေရေးအတွက် ထိန်းသိမ်းစောင့်ရှောက်ရေးလုပ်ငန်းများကို အလေးထားဆောင်ရွက်ကြရန် တိုက်တွန်းခဲ့သည်။

အစည်းအဝေးတွင် ရှေးပျူမြို့ဟောင်းများဖြစ်သည့် ဟန်လင်း၊ ဗိဿနိုး နှင့် သရေခေတ္တရာ တို့ကို ၂၀၁၄ ခုနှစ်တွင် UNESCO ကမ္ဘာ့အမွေအနှစ်စာရင်းဝင်အဖြစ် အသိအမှတ်ပြုခဲ့ပြီး ပုဂံယဉ်ကျေးမှုအမွေအနှစ်ဒေသ ကို ၂၀၁၉ ခုနှစ်တွင် ကမ္ဘာ့အမွေအနှစ်အဖြစ် သတ်မှတ်ခဲ့ကြောင်းလည်း ပြန်လည်ပြောကြားခဲ့သည်။

ထို့အပြင် မြန်မာ့ရိုးရာနှစ်သစ်ကူး အတာသင်္ကြန်ပွဲတော်ကို UNESCO ၏ လူသားမျိုးနွယ်ဆိုင်ရာ ဒြပ်မဲ့ယဉ်ကျေးမှုအမွေအနှစ်အဖြစ် အသိအမှတ်ပြုထားပြီး မြန်မာ့သနပ်ခါးယဉ်ကျေးမှုဓလေ့နှင့် မြန်မာ့လက်ဖက်ယဉ်ကျေးမှုတို့ကိုလည်း UNESCO သို့ တင်သွင်းထားကြောင်း၊ မြန်မာ့ထမနဲကို ဆက်လက်တင်ပြနိုင်ရေးအတွက် လိုအပ်သည့် လုပ်ငန်းစဉ်များ ဆောင်ရွက်လျက်ရှိကြောင်း ပြောကြားခဲ့သည်။

ယဉ်ကျေးမှုအမွေအနှစ်များကို ထိရောက်စွာ ကာကွယ်စောင့်ရှောက်နိုင်ရန် ဥပဒေ၊ နည်းဥပဒေများ ပြင်ဆင်ထုတ်ပြန်သွားမည်ဖြစ်ကြောင်းနှင့် ဆိုရှယ်မီဒီယာများမှတစ်ဆင့် ဝင်ရောက်လာသည့် ပြည်ပယဉ်ကျေးမှုလွှမ်းမိုးမှုများကြားတွင် မြန်မာ့ယဉ်ကျေးမှုလက္ခဏာများ မပျောက်ပျက်စေရေးကိုလည်း အလေးထားဆောင်ရွက်ရန် လိုအပ်ကြောင်း ဒုတိယသမ္မတက တိုက်တွန်းပြောကြားခဲ့သည်။

ထို့နောက် မြန်မာနိုင်ငံအမျိုးသားယဉ်ကျေးမှုဗဟိုကော်မတီ ဒုတိယဥက္ကဋ္ဌနှင့် တာဝန်ရှိသူများက ကော်မတီ၏ လုပ်ငန်းဆောင်ရွက်မှုအခြေအနေများ၊ ယခင်အစည်းအဝေးဆုံးဖြတ်ချက်များအပေါ် အကောင်အထည်ဖော်ဆောင်ရွက်ပြီးစီးမှုများနှင့် ရှေ့ဆက်ဆောင်ရွက်မည့် လုပ်ငန်းစဉ်များကို ရှင်းလင်းတင်ပြခဲ့ကြကြောင်း သိရသည်။