အားကစားရေးရာဝန်ကြီးဌာန၊ အားကစားနှင့်ကာယပညာဦးစီးဌာန၏ လမ်း ညွှန်မှုဖြင့် မြန်မာနိုင်ငံကျွမ်းဘားအဖွဲ့ချုပ်မှ ကြီးမှူးကျင်းပသည့် ယခုနှစ် အပြည်ပြည်ဆိုင်ရာ အိုလံပစ်နေ့အထိမ်းအမှတ် ကျွမ်းဘားပြိုင်ပွဲဖွင့်ပွဲနှင့် ဆုချီးမြှင့်ခြင်းအခမ်းအနားကို ဇွန်လ (၂၁) ရက်နေ့ နံ နက်ပိုင်းက ရန်ကုန်မြို့၊ တာမွေမြို့နယ်၊ ကျိုက္ကဆံအားကစားကွင်းရှိ မြန်မာနိုင်ငံကျွမ်းဘားအဖွဲ့ချုပ် လေ့ကျင့်ရေးအား ကစားရုံ၌ ကျင်းပခဲ့သည်။
အဆိုပါ အခမ်းအနားသို့ မြန်မာနိုင်ငံကျွမ်းဘားအဖွဲ့ချုပ်ဥက္ကဋ္ဌ ဦးကောင်းဇော်နှင့် ဒုတိယဥက္ကဋ္ဌများ၊ အားကစားနှင့်ကာယပညာသိပ္ပံ (ရန်ကုန်) မှ ဒုတိယညွှန်ကြားရေးမှူးများ၊ အတွင်းရေးမှူးနှင့် အလုပ်အမှုဆောင်များ၊ နိုင်ငံကျော်တေးသံရှင် နီနီခင်ဇော်၊ ပြိုင်ပွဲဝင်အားကစားသမားများနှင့် မိဘအုပ်ထိန်းသူများတက်ရောက်ခဲ့ကြကြောင်း သိရသည်။
အဆိုပါ အခမ်းအနားတွင် မြန်မာနိုင်ငံကျွမ်းဘားအဖွဲ့ချုပ်ဥက္ကဋ္ဌ ဦးကောင်းဇော်က ပြိုင်ပွဲအဖွင့်အမှာစကား ပြောကြားခဲ့ကာ နိုင်ငံကျော်တေးသံရှင် နီနီခင်ဇော်က တက်ရောက်လာသူများကို တေးသီချင်းများဖြင့် သီဆိုဖျော်ဖြေခဲ့သည်။
ထို့နောက်လူငယ်လက်ရွေးစင် အားကစားသမားများက အဆင့်မြင့် ကျွမ်းဘားအကွက်များဖြင့် သရုပ်ပြကစားခဲ့ကြပြီးနောက် အမျိုးသား/အမျိုးသမီး သက်တမ်းအလိုက် ပြိုင်ပွဲအမျိုးအစားများကို ဆက်လက်ကျင်းပခဲ့သည်။
ပြိုင်ပွဲများပြီးဆုံးချိန်တွင် ထူးချွန်စွာ ဆုရရှိခဲ့ကြသည့် ပထမဆု၊ ဒုတိယဆုနှင့် ပူးတွဲတတိယဆု ရရှိသူများကိုမြန်မာနိုင်ငံကျွမ်းဘားအဖွဲ့ချုပ်ဥက္ကဋ္ဌ ဦးကောင်းဇော်၊နိုင်ငံကျော်တေးသံရှင် နီနီခင်ဇော်၊မြန်မာနိုင်ငံကျွမ်းဘားအဖွဲ့ချုပ် အတွင်းရေးမှူးနှင့် တာဝန်ရှိပုဂ္ဂိုလ်များက ဆုများကို အသီးသီး ပေးအပ်ချီးမြှင့်ခဲ့ကြကြောင်း သိရသည်။