ရန်ကုန်၊ ဇူလိုင်-၁၇
ကမ္ဘာ့ရေနံစိမ်းဈေးနှုန်း မြင့်တက်လာမှု၏ သက်ရောက်မှုကြောင့် ပြည်တွင်းစက်သုံးဆီ ရည်ညွှန်းဈေးနှုန်းများတွင် ဓာတ်ဆီဈေး ဆက်လက်ကျဆင်းခဲ့သော်လည်း ဒီဇယ်နှင့် ပရီမီယံဒီဇယ်ဈေးနှုန်းများမှာ အနည်းငယ် ပြန်လည်မြင့်တက်လာကြောင်း စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ ဇူလိုင် ၁၇ ရက် ထုတ်ပြန်ချက်အရ သိရသည်။
ကမ္ဘာ့ရေနံဈေးအနေဖြင့် ယခင်တစ်ပတ်က ရေနံစိမ်းတစ်စည်လျှင် ၇၁ ဒေါ်လာ ဝန်းကျင်သာရှိခဲ့သော်လည်း ယနေ့တွင် ရေနံစိမ်းတစ်စည်လျှင် ဒေါ်လာ ၈၀ ဝန်းကျင်အထိ မြင့်တက်လာသည်။
ကမ္ဘာ့ရေနံဈေးမြင့်တက်လာသဖြင့် ပြည်တွင်းစက်သုံးဆီဈေးတွင် ဒီဇယ်တစ်လီတာ ၃၈၉၅ ကျပ်အထိ မြင့်တက်ခဲ့ပြီး ဓာတ်ဆီတစ်လီတာ ၃၂၁၀ ကျပ်အထိ ကျဆင်းခဲ့သည်။
စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ယနေ့ (ဇူလိုင် ၁၇ ရက်) တွင် ထုတ်ပြန်လိုက်သည့် ရည်ညွှန်းဈေးနှုန်းများအရ ရန်ကုန်မြို့တွင် စက်သုံးဆီဈေးနှုန်းများမှာ တစ်လီတာလျှင် –
ဓာတ်ဆီ 92 Ron: ၃,၂၁၀ ကျပ်၊
ဓာတ်ဆီ 95 Ron: ၃,၂၈၅ ကျပ်၊
ဒီဇယ် (HSD 500 ppm): ၃,၁၇၅ ကျပ်၊
ပရီမီယံဒီဇယ် (HSD 50 ppm/10 ppm): ၃,၈၉၅ကျပ်အထိ ဖြစ်သည်။ ဇူလိုင် ၂၃ ရက်အထိ ယင်းဈေးနှုန်းအတိုင်းသာ ရှိနေမည်ဖြစ်သည်။
ယခုတစ်ပတ်စက်သုံးဆီဈေးနှုန်းကို ယခင်တစ်ပတ်ဈေးနှုန်းနှင့် နှိုင်းယှဉ်ပါက
ဓာတ်ဆီ 92 Ron: တစ်လီတာလျှင် ၄၀ ကျပ်နှင့် ဓာတ်ဆီ 95 Ron: တစ်လီတာလျှင် ၂၅ ကျပ် ထပ်မံကျဆင်းခဲ့သည်။
ဒီဇယ်တစ်လီတာလျှင် ၈၀ကျပ်နှင့် ပရီမီယံဒီဇယ်တစ်လီတာလျှင် ၁၀၅ ကျပ် ဈေးတက်လာခဲ့သည်။
သို့သော် သင်္ကြန်ကျော်ကာလဈေးနှုးနှင့် နှိုင်းယှဉ်ပါက စက်သုံးဆီဈေးနှုန်းသည် (၁၃)ပတ်ဆက်တိုက် ကျဆင်းလာခဲ့သည်။
ဧပြီ ၂၄ ရက် ရည်ညွှန်းဈေးနှုန်းများနှင့် နှိုင်းယှဉ်ပါက သီတင်းပတ်(၁၃)ပတ်အတွင်း –
ဓာတ်ဆီ 92 Ron တစ်လီတာလျှင် ၁၅၂၅ ကျပ်၊
ဓာတ်ဆီ 95 Ron တစ်လီတာလျှင် ၁၆၆၀ ကျပ်၊
ဒီဇယ် တစ်လီတာလျှင် ၃၃၁၀ ကျပ်၊
ပရီမီယံဒီဇယ် တစ်လီတာလျှင် ၃၈၆၀ ကျပ် စျေးကျလာခဲ့သည်။
စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီအနေဖြင့် စက်သုံးဆီဈေးနှုန်းများကို MOPS ဈေးနှုန်းပေါ်တွင် အခြေခံ၍ နေ့စဉ်တွက်ချက်ထုတ်ပြန်ပေးလျက်ရှိပြီး၊ သတ်မှတ်ရည်ညွှန်းဈေးထက် ပိုမိုရောင်းချခြင်း သို့မဟုတ် ဈေးနှုန်းမမှန်ကန်ခြင်းများရှိပါက ကော်မတီ၏ ဖုန်းနံပါတ်များဖြစ်သော ၀၁-၄၀၀၃၉၇၃ နှင့် ၀၉-၂၅၄၅၂၅၄၇၇ တို့သို့ ဆက်သွယ်တိုင်ကြားနိုင်ကြောင်း အသိပေးထားသည်။