ဆော်ဒီအာရေးဗီးယားနဲ့ တောင်ကိုရီးယား ကုမ္ပဏီတွေပိုင်တဲ့ ရေနံတင်သင်္ဘောကြီး နှစ်စီးဟာ ဟော်မုဇ်ရေလက်ကြားမှာ ပစ်ခတ်ခံခဲ့ရတယ်လို့ ရေကြောင်းလုံခြုံရေး အတိုင်ပင်ခံကုမ္ပဏီ Marisks ကို ကိုးကားပြီး Bloomberg သတင်းမှာ ဖော်ပြထားပါတယ်။
ဆော်ဒီ Bahri ကုမ္ပဏီရဲ့ Sidr လို့ခေါ်တဲ့ ရေနံစိမ်းတင်သင်္ဘောကြီးက အိုမန်နိုင်ငံ၊ Khasab မြို့ရဲ့ အရှေ့မြောက်ဘက်ကို သွားနေချိန်မှာ အပစ်ခံရတာပါ။ တောင်ကိုရီးယား Sinokor Group ရဲ့ Senegal Prosperity သင်္ဘောကတော့ အရှေ့ဘက်ကို သွားနေချိန်မှာ ၃ ချက်တိတိ ပစ်ခတ်ခံခဲ့ရတယ်လို့ ဆိုပါတယ်။ သင်္ဘောနှစ်စီးလုံး ပါရှန်းပင်လယ်ကွေ့ကနေ ထွက်လာကြတာလို့ Marisks က ပြောပါတယ်။
ဒီသင်္ဘောကြီးနှစ်စီးစလုံးဟာ သူတို့ဘယ်နေရာရောက်နေလဲဆိုတာ ပြပေးတဲ့ AIS စနစ်တွေကို ပိတ်ထားခဲ့ကြတယ်လို့ အဆိုပါ ရေကြောင်းလုံခြုံရေး အတိုင်ပင်ခံက ပြောပါတယ်။
အရှေ့အလယ်ပိုင်းက ရေနံထုတ်လုပ်တဲ့ နိုင်ငံကြီးတွေက တိတ်တဆိတ် သွားလာပို့ဆောင်ပေးနေလို့ စစ်မဖြစ်ခင်က ပမာဏရဲ့ တစ်ဝက်လောက်အထိ ပြန်နာလန်ထလာတဲ့ ဒီအရေးပါတဲ့ ရေလက်ကြားက ရေနံတင်ပို့မှုတွေဟာ အခုလို ထပ်မံတိုက်ခိုက်ခံရမှုတွေကြောင့် ခြိမ်းခြောက်ခံနေရတယ်လို့ ဆိုပါတယ်။
ဒီဒေသတွင်းမှာ အခြေအနေတွေ ပိုဆိုးလာတာနဲ့အမျှ လန်ဒန် ICE စတော့အိတ်ချိန်းမှာ နိုဝင်ဘာလအတွက် ပေးပို့ရမယ့် ဘရန့်(Brent) ရေနံစိမ်းဈေးဟာ ဩဂုတ်လ ၂၅ ရက်နေ့နောက်ပိုင်း ပထမဆုံးအကြိမ်အဖြစ် တစ်စည်ကို ၉၂ ဒေါ်လာအထက်ကို ရောက်သွားတယ်လို့ အရောင်းအဝယ် စာရင်းတွေအရ သိရပါတယ်။