လူမှုဖူလုံရေးအကျုံးဝင်မြို့နယ် (၁၂၈) မှ အလုပ်ဌာန (၃၅,၀၀၀) ကျော်ရှိ အာမခံအလုပ်သမား (၁ ဒသမ ၃၆)သန်းကျော်အတွက် ကျန်းမာရေးစောင့်ရှောက်မှုပေးခြင်းနှင့် ငွေကြေးအကျိုးခံစားခွင့်များကို ခွင့်ပြုထုတ်ပေးဆောင်ရွက်လျက်ရှိပြီး အလုပ်ရှင်၊ အလုပ်သမားများ ယုံကြည်အားထားရသည့် အဖွဲအစည်းတစ်ခုအဖြစ် အခိုင်အမာရပ်တည်နိုင်ရေး ဆက်လက်ကြိုးပမ်းဆောင်ရွက်နေကြောင်း အလုပ်သမားဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုးက ပြောသည်။
ယမန်နေ့က လှိုင်သာယာမှာကျင်းပသည့် ရန်ကုန်တိုင်းဒေသကြီးအတွင်းရှိ အာမခံအလုပ်သမားများ၏ သားသမီးများအား ပညာသင်စရိတ်ဆိုင်ရာ မိသားစုထောက်ပံ့မှု အကျိုးခံစားခွင့်ပေးအပ်ခြင်းနှင့် ကျန်ရစ်သူအကျိုးခံစားခွင့်ပေးအပ်ခြင်းအခမ်းနားတွင် ပြည်ထောင်စုဝန်ကြီး ဦးအောင်ကျော်ဟိုးက အထက်ပါအတိုင်း ပြောကြားခဲ့ခြင်းဖြစ်သ ည်။
ထို့ပြင် ၂၀၁၂ ခုနှစ် လူမှုဖူလုံရေး ဥပဒေပါ အာမခံစနစ် (၆)မျိုးအနက် နိုင်ငံ၏ အခြေအနေနှင့် ကိုက်ညီသော ကျန်းမာရေးနှင့် လူမှုရေးစောင့်ရှောက်မှု အာမခံစနစ်၊ လုပ်ငန်းခွင်ထိခို-က်မှု အကျိုးခံစားခွင့်အာမခံစနစ်နှင့် မိသားစုထောက်ပံ့မှု အာမခံစနစ်တို့အတွက် သဘာဝဘေးအန္တရာယ်ကျရောက်မှုဆိုင်ရာ အကျိုးခံစားခွင့်နှင့် ပညာသင်စရိတ်ခံစားခွင့်များကို ရရှိမည်ဖြစ်ကြောင်း ပြည်ထောင်စုဝန်ကြီးက ပြောကြားခဲ့သည်။
လက်ရှိ မန္တလေးတိုင်းဒေသကြီးနှင့် ပဲခူးတိုင်းဒေသကြီးအတွင်း ပညာသင်စရိတ်လျှောက်ထားလာသည့် အာမခံအလုပ်သမား (၈,၆၁၁) ဦး၏ သားသမီး (၁၁,၄၈၉) ဦးတို့အတွက် ပညာသင်စရိတ် စုစုပေါင်း ကျပ်သန်း (၄၅၉ ဒသမ ၁၆၂) ကို Online Payment စနစ်ဖြင့် ထုတ်ပေးထားပြီးဖြစ်ကြောင်း သိရသည်။
ကျန်ရှိသည့် တိုင်းဒေသကြီး/ ပြည်နယ်များအတွက်လည်း ထုတ်ပေးနိုင်ရေး ဆောင်ရွက်နေပြီး ရန်ကုန်တိုင်းဒေသကြီးအတွင်းက ပညာသင်စရိတ် လျှောက်ထားလာသည့် အလုပ်သမား (၂၆,၆၇၀) တို့၏ သားသမီး (၃၃,၉၁၂) ဦးအား ပညာသင်စရိတ်နှင့် လုပ်ငန်းခွင်၌ ထိခို-က်သေဆုံးခဲ့သည့် အာမခံအလုပ်သမား (၅)ဦးတို့အတွက် ကျန်ရစ်သူအကျိုးခံစားခွင့် ငွေများကို ထုတ်ပေးမည်ဖြစ်ကြောင်း သိရသည်။
လက်ရှိအချိန်ထိ ပညာသင်စရိတ်ဆိုင်ရာ မိသားစုထောက်ပံ့ငွေကျပ်သန်း (၁၉၁၄ ဒသမ ၄၇၇) ကို ခွင့်ပြုပေးထားကြောင်းလည်း သိရသည်။