ရန်ကုန်၊ စက်တင်ဘာ ၂၅
နိုင်ငံတော်ဩဝါဒါစရိယ၊ ရွှေကျင်နိကာယ ရတ္တညူမဟာနာယက၊ ချမ်းမြေ့ရိပ်သာကျောင်းတိုက် ဦးစီးပဓာနမဟာနာယက ချမ်းမြေ့ဆရာတော်ဘုရားကြီး ဘဒ္ဒန္တဇနကာဘိဝံသ၏ အန္တိမအဂ္ဂိဈာပန သာဓုကီဠနပူဇာကို ယနေ့ စက်တင်ဘာ ၂၅ ရက်တွင် ရန်ကုန်မြို့၌ ကျင်းပမည်ဖြစ်သည်။
ဆရာတော်ဘုရားကြီး၏ ကြွင်းကျန်ရစ်သည့် ဥတုဇရုပ်ကလာပ်တော်ကို ယနေ့ မွန်းလွဲ ၂ နာရီတွင် မရမ်းကုန်းမြို့နယ်ရှိ ချမ်းမြေ့ရိပ်သာကျောင်းတိုက်မှ သင်္ဃန်းကျွန်းမြို့နယ်၊ သံသုမာလမ်းရှိ သုဝဏ္ဏဘူမိ EVENT PARK သို့ ပင့်ဆောင်မည်ဖြစ်သည်။
အန္တိမအဂ္ဂိဈာပန အခမ်းအနားကို မွန်းလွဲ ၃ နာရီခွဲတွင် စတင်ကျင်းပမည်ဖြစ်ပြီး ညနေ ၄ နာရီခွဲတွင် ဆရာတော်ဘုရားကြီး၏ ဥတုဇရုပ်ကလာပ်တော်ကို မီးပူဇော်မည်ဖြစ်ကြောင်း သိရသည်။
သက်တော် ၉၉ နှစ်၊ သိက္ခာဝါတော် ၇၉ ဝါရှိ ချမ်းမြေ့ဆရာတော်ဘုရားကြီးသည် စက်တင်ဘာ ၁၉ ရက် နံနက် ၁၁ နာရီ ၃ မိနစ်တွင် ဘဝနတ်ထံ ပျံလွန်တော်မူခဲ့ခြင်းဖြစ်သည်။
ဆရာတော်ဘုရားကြီးသည် ပြည်တွင်း၊ ပြည်ပတွင် ဗုဒ္ဓသာသနာပြုလုပ်ငန်းများကို ဆောင်ရွက်တော်မူခဲ့သည့် ဆရာတော်ကြီးတစ်ပါးဖြစ်ပြီး ယနေ့ကျင်းပမည့် အန္တိမအဂ္ဂိဈာပန သာဓုကီဠနပူဇာသို့ ကြွရောက်၍ ဆရာတော်ဘုရားကြီးအား ရည်စူးကာ ကုသိုလ်ယူနိုင်ရန် ကျင်းပရေးကော်မတီက ဖိတ်ကြားထားကြောင်း သိရသည်။