ရှေ့လတွင် စတင်ကျင်းပမည့် မကွေးတိုင်းဒေသကြီး မင်းဘူး (စကု) မြို့နယ်ရှိ ရွှေစက်တော်ဘုရားပွဲအတွက် ခရီးသွားဘုရားဖူးပြည်သူများ ဘေးကင်းစေရန် စီမံဆောင်ရွက်ထားပြီး လုံခြုံရေးများလည်းတိုးမြှင့်ချထားမည်ဖြစ်ကြောင်း မန်းရွှေစက်တော်ရာဘုရား ဂေါပကအဖွဲ့ထံမှ သိရသည်။
“အသေးစိတ်တော့ ပြောလို့အဆင်မပြေဘူးနော်၊ မနှစ်ကထက် လုံခြုံရေးအင်အားပိုများပြီး ဘုရားပွဲ အဆင်ပြေအောင်မြင်စွာ ပြီးမြောက်နိုင်ဖို့ စီစဉ်ထားကြပါတယ်” ဟု မန်းရွှေစက်တော်ရာဘုရား ဂေါပကအဖွဲ့မှ တာဝန်ရှိသူတစ်ဦးက ပြောသည်။
လက်ရှိတွင် ရွှေစက်တော် ဘုရားအနီး၌ အေးအေးချမ်းချမ်းရှိသည့်အပြင် ယခုကတည်းကပင် နယ်ဝေးဘုရားဖူးသူများလည်း လာရောက်မှုရှိနေကြောင်း ၎င်းက ဆိုသည်။
ရွှေစက်တော်ဘုရားပွဲကို ဖေဖော်ဝါရီ (၂)ရက်နေ့တွင် စတင်ကျင်းပမည်ဖြစ်ပြီး ဧပြီလ (၁၇) ရက်အထိ (၇၅) ရက်တိုင်တိုင် ကျင်းပသွားမည်ဖြစ်သည်။
အနယ်နယ်အရပ်ရပ်မှ လာရောက်ကြမည့် ဘုရားဖူးပြည်သူများအတွက် အခန်း (၆၀၀) ကျော်ပါသည့် တည်းခိုခန်း (၅၄) လုံး ၊ ဈေးဆိုင်ခန်း (၈၀၀) ကျော် ဆောက်လုပ်ထားပေးမည်ဖြစ်ကြောင်းလည်း သိရသည်။
နှစ်စဉ် အစဉ်အလာမပြတ် ကျင်းပမြဲဖြစ်သည့် မန်းရွှေစက်တော်ရာ ဘုရားပွဲကို ၂၀၂၄ ခုနှစ်ကလည်း ၆၄ ရက်ကြာ ကျင်းပခဲ့ကြောင်း သိရသည်။