စားအုန်းဆီသိုလှောင်ကန်များ လုံခြုံရေးနှင့် အရေးပေါ်တုံ့ပြန်နိုင်ရေး ကွင်းဆင်းစစ်ဆေး

စားအုန်းဆီသိုလှောင်ကန်များ၏ လုံခြုံရေးနှင့် သဘာဝဘေးအန္တရာယ်များ ကြုံတွေ့လာပါက အရေးပေါ်တုံ့ပြန်ဆောင်ရွက်နိုင်ရေးအတွက် ကြိုတင်ပြင်ဆင်ထားရှိမှုများကို သက်ဆိုင်ရာတာဝန်ရှိသူများက ကွင်းဆင်းစစ်ဆေးခဲ့ကြောင်း မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းထံမှ သိရသည်။

ရန်ကုန်တိုင်းဒေသကြီးအစိုးရအဖွဲ့၏ လမ်းညွှန်မှုဖြင့် သက်ဆိုင်ရာဌာနများနှင့် အဖွဲ့အစည်းများမှ တာဝန်ရှိသူများသည် ကြည့်မြင်တိုင်မြို့နယ်နှင့် သန်လျင်မြို့နယ်ရှိ စားအုန်းဆီသိုလှောင်ကန်များသို့ သွားရောက်ကာ ကွင်းဆင်းစစ်ဆေးခဲ့ခြင်းဖြစ်သည်။

ထိုသို့ စစ်ဆေးရာတွင် စားအုန်းဆီသိုလှောင်ကန်များ၏ လုံခြုံရေးဆိုင်ရာ ဆောင်ရွက်ထားရှိမှုအခြေအနေများ၊ မီးဘေးအန္တရာယ်ကြိုတင်ကာကွယ်ရေး အစီအမံများ၊ သဘာဝဘေးအန္တရာယ်များ ဖြစ်ပေါ်လာပါက အရေးပေါ်တုံ့ပြန်နိုင်ရေး ပြင်ဆင်ထားရှိမှုများနှင့် သက်ဆိုင်ရာ စည်းမျဉ်းစည်းကမ်းများကို လိုက်နာဆောင်ရွက်နေမှု အခြေအနေများအား အသေးစိတ် ကြည့်ရှုစစ်ဆေးခဲ့ကြောင်း သိရသည်။

ထို့ပြင် တာဝန်ရှိသူများက လုပ်ငန်းခွင်အတွင်း တွေ့ရှိရသည့် လိုအပ်ချက်များကို ဖြည့်စွက်ဆောင်ရွက်နိုင်ရေး၊ လုံခြုံရေးနှင့် မီးဘေးကာကွယ်ရေး အစီအမံများ ပိုမိုကောင်းမွန်စေရေးနှင့် သဘာဝဘေးအန္တရာယ်များ ကြုံတွေ့လာပါက ထိရောက်စွာ တုံ့ပြန်နိုင်ရေးအတွက် သက်ဆိုင်ရာ လုပ်ငန်းရှင်များနှင့် ညှိနှိုင်းဆွေးနွေးကာ လိုအပ်သည့် အကြံပြုချက်များကို ပေးအပ်ခဲ့ကြောင်း သိရသည်။

မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းကလည်း စားအုန်းဆီသိုလှောင်ကန်များ၏ လုံခြုံရေးနှင့် ဘေးအန္တရာယ်စီမံခန့်ခွဲမှုဆိုင်ရာ လုပ်ငန်းစဉ်များကို စဉ်ဆက်မပြတ် မြှင့်တင်ဆောင်ရွက်သွားမည်ဖြစ်ကြောင်း သိရသည်။