အင်ဒိုနီးရှားနိုင်ငံ၌ မေလ (၂၉) ရက်မှ (၃၁)ရက်အထိ ကျင်းပပြုလုပ်ခဲ့သည့် Jakarta International Roller Skating Championships 2026 တွင် သွားရောက်ယှဉ်ပြိုင်ခဲ့သော မြန်မာနိုင်ငံကိုယ်စားပြု စကိတ်အားကစားအသင်းသည် ရွှေတံဆိပ် (၃) ခုနှင့် ကြေးတံဆိပ် (၁) ခု ဆွတ်ခူးရရှိကာ ရန်ကုန်မြို့သို့ ပြန်လည်ရောက်ရှိလာပြီဖြစ်သည်။
မြန်မာစကိတ်အသင်းသည် အာရှအဆင့်ပြိုင်ဘက်ကောင်းများနှင့် ယှဉ်ပြိုင်ကာ မီတာ (၅၀၀) တစ်ဦးချင်းပြိုင်ပွဲ၏ စီနီယာတန်း၊ အသက် (၁၆) နှစ်အောက်တန်းနှင့် အသက် (၁၈) နှစ်အောက်တန်းတို့တွင် ရွှေတံဆိပ်တစ်ခုစီ ဆွတ်ခူးခဲ့သည်။
အလားတူမီတာ (၁၀,၀၀၀) Relay (လက်ဆင့်ကမ်း)အသင်းလိုက်ပြိုင်ပွဲတွင် ကြေးတံဆိပ် (၁) ခုကိုထပ်မံဆွတ်ခူးပေးခဲ့သည်။
နိုင်ငံတကာ အားကစားသမားတစ်ထောင်ကျော် ပါဝင်ယှဉ်ပြိုင်သည့် ယင်းပြိုင်ပွဲတွင် မြန်မာနိုင်ငံက အဆင့် (၆) နေရာ၌ ရပ်တည်နိုင်ခဲ့သည်။
အသင်းလိုက် ကြေးတံဆိပ်ရရှိရန် ခြေစစ်ပွဲတွင် စင်္ကာပူ၊ အင်ဒိုနီးရှားတို့ကဲ့သို့ အသင်းများကို ကျော်ဖြတ်ခဲ့ရပြီး ဗိုလ် လုပွဲတွင် ကာဇက်စတန်၊ အိန္ဒိယတို့နှင့် အကြိတ်အနယ်ယှဉ်ပြိုင်ခဲ့ရခြင်းလည်း ဖြစ်သည်။
မြန်မာနိုင်ငံကိုယ်စားပြုအသင်းကို နည်းပြ/ကစားသမား ကိုဟိန်းဇော်သိန်းက ဦးဆောင်ပြီး၊ သာကေတမြို့နယ် အထက (၃)မှ ကျောင်းသားအားကစားသမားများဖြစ်ကြသော မောင်စစ်ပိုင်မှူး နှင့် မောင်ဇေယျာလင်းတို့ ပါဝင်ယှဉ်ပြိုင်ခဲ့ကြသည်။
ရန်ကုန်အပြည်ပြည်ဆိုင်ရာလေဆိပ်သို့ ပြန်လည်ရောက်ရှိလာသည့် အဆိုပါအောင်ပွဲရအသင်းကို မြန်မာနိုင်ငံစကိတ်အဖွဲ့ချုပ် ဒုတိယဥက္ကဋ္ဌများဖြစ်ကြသော ဦးလွင်လတ်၊ ဦးအောင်မြင့်ထွန်းနှင့် တာဝန်ရှိသူများ၊ အားကစားနှင့်ကာယပညာဦးစီးဌာနမှ တာဝန်ရှိသူများ၊ နည်းပြများနှင့် အားကစားသမားမိဘဆွေမျိုးများက ဂုဏ်ပြုကြိုဆိုခဲ့ကြကြောင်း သိရသည်။
အဆိုပါပြိုင်ပွဲသို့ မြန်မာနိုင်ငံအပြင် အိန္ဒိယ၊ ကိုရီးယား၊ တရုတ်(တိုင်ပေ)၊ မွန်ဂိုလီးယား၊ စင်္ကာပူ၊ ဗီယက်နမ်နှင့် ကာဇက်စတန်နိုင်ငံတို့မှ ထိပ်သီးအားကစားသမားများစွာ ပါဝင်ယှဉ်ပြိုင်ခဲ့ကြခြင်းဖြစ်သည်။