ပျဉ်းမနားမြို့နယ် ကူးတို့ဆိပ်ကျေးရွာအုပ်စုရှိ တောင်သူများ စိုက်ပျိုးရေလုံလောက်စွာ ရရှိစေရေးအတွက် ကိုယ့်အားကိုယ်ကိုးဆည် (၄) ခု ဖြစ်သည့် နှမ်းတောဆည်၊ ကြခတ်ဆည်၊ ဇီးရိုင်းဆည်နှင့် ကျောက်ဆည်တို့အား ပြန်လည်တူးဖော်ပြုပြင်ရေးလုပ်ငန်းများကို ၂၀၂၇-၂၀၂၈ ဘဏ္ဍာနှစ်အတွင်း ရန်ပုံငွေရရှိမှုအပေါ် မူတည်၍ အကောင်အထည်ဖော် ဆောင်ရွက်သွားမည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်က ပြောကြားသည်။
ဇွန် ၅ ရက်က ကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး တတိယနေ့တွင် ပျဉ်းမနားမဲဆန္ဒနယ်မှ ဦးခင်မောင်ဌေး၏ မေးခွန်းကို ဖြေကြားရာ၌ ဒုတိယဝန်ကြီးက ယင်းသို့ ထည့်သွင်းပြောကြားခဲ့ခြင်းဖြစ်သည်။
ဒုတိယဝန်ကြီး၏ ပြောကြားချက်အရ ဇီးရိုင်းချောင်းပေါ်ရှိ ဇီးရိုင်းဆည်၊ ကျောက်ဆည်ရေလွှဲဆည်နှင့် ကြခတ်ရေလွှဲဆည်တို့တွင် သဲနုန်းတူးဖော်ခြင်း၊ ရေကာပေါင်ပြုပြင်ခြင်းနှင့် ရေပေးမြောင်းများအတွင်း သဲနုန်းဖယ်ရှားခြင်းလုပ်ငန်းများ ဆောင်ရွက်ရန် လိုအပ်နေကြောင်း သိရသည်။
ယင်းကြောင့် တောင်သူများ စိုက်ပျိုးရေ လုံလောက်စွာ အသုံးပြုနိုင်ရေးအတွက် ရေလွှဲဆည်များ ပြုပြင်မွမ်းမံခြင်းလုပ်ငန်းကို ၂၀၂၇-၂၀၂၈ ဘဏ္ဍာနှစ် နေပြည်တော်ကောင်စီရန်ပုံငွေ သို့မဟုတ် သင့်လျော်သည့် ရန်ပုံငွေမှ တင်ပြတောင်းခံကာ ရန်ပုံငွေရရှိမှုအပေါ် မူတည်၍ ဆောင်ရွက်ပေးသွားမည်ဖြစ်ကြောင်း ၎င်းက ဆိုသည်။
အလားတူ ပျဉ်းမနားမြို့နယ် နှမ်းတောချောင်းပေါ်ရှိ နှမ်းတောရေလွှဲဆည် (ညောင်ပင်ဝိုင်းရေလွှဲဆည်) တွင်လည်း ရေလွှဲဆည်၏ အထက်ပိုင်း၊ အောက်ပိုင်းနှင့် ရေပေးမြောင်းများ၌ သဲနုန်းပို့ချတိမ်ကောမှုများ ဖြစ်ပေါ်နေသဖြင့် သဲနုန်းတူးဖော်ခြင်းနှင့် ရေပေးမြောင်းပြုပြင်ခြင်းလုပ်ငန်းများကို ၂၀၂၆-၂၀၂၇ ဘဏ္ဍာနှစ် နေပြည်တော်ကောင်စီရန်ပုံငွေဖြင့် ဆောင်ရွက်သွားမည်ဖြစ်ကြောင်း သိရသည်။
အဆိုပါ လုပ်ငန်းများ အကောင်အထည်ဖော်နိုင်ပါက ပျဉ်းမနားမြို့နယ်အတွင်းရှိ စိုက်ပျိုးရေးလုပ်ငန်းများအတွက် ရေပေးဝေမှု ပိုမိုကောင်းမွန်လာပြီး တောင်သူများ၏ စိုက်ပျိုးထုတ်လုပ်မှု တိုးတက်လာစေရန် အထောက်အကူပြုမည်ဖြစ်ကြောင်း လွှတ်တော်အစည်းအဝေးတွင် တင်ပြဆွေးနွေးခဲ့ကြသည်။