နေပြည်တော်၊ စက်တင်ဘာ ၁၅
မြန်မာနိုင်ငံ၏ သာယာလှပမှု၊ လုံခြုံစိတ်ချရမှုနှင့် ပကတိအခြေအနေမှန်များကို မျက်မြင်ကိုယ်တွေ့ သိရှိစေရန် ဗီယက်နမ်နိုင်ငံမှ ခရီးသွားကုမ္ပဏီများနှင့် သတင်းမီဒီယာများကို ရင်းနှီးကျွမ်းဝင်မှုဆိုင်ရာ ခရီးစဉ် (FAM Trip) များ စီစဉ်ဖိတ်ခေါ်သွားမည်ဖြစ်ကြောင်း သိရသည်။
စက်တင်ဘာ ၁၄ ရက် မွန်းလွဲပိုင်းက ယဉ်ကျေးမှူ၊ဟိုတယ်နှင့် ခရီးသွားလာရေးဝန်ကြီးဌာန၌ ကျင်းပသည့် မြန်မာ-ဗီယက်နမ် ခရီးသွားလုပ်ငန်းမြှင့်တင်ရေး ညှိနှိုင်းအစည်းအဝေးတွင် ပြည်ထောင်စုဝန်ကြီး ဦးမောင်မြင့်က ထိုသို့ ထည့်သွင်းပြောကြားခဲ့ခြင်းဖြစ်သည်။ ထိုသို့ FAM Trip များ စီစဉ်ပေးခြင်းဖြင့် ဗီယက်နမ်ခရီးသွားများ မြန်မာနိုင်ငံသို့ ယုံကြည်စိတ်ချစွာ လာရောက်လည်ပတ်နိုင်မည်ဖြစ်ကြောင်း ၎င်းက အသိပေးခဲ့သည်။
အဆိုပါ အစည်းအဝေးတွင် ဒုတိယဝန်ကြီး ဦးဖြိုးဇော်စိုးက နှစ်နိုင်ငံ ခရီးသွားလုပ်ငန်းရှင်များအကြား ပူးပေါင်းဆောင်ရွက်နိုင်မည့် အခွင့်အလမ်းများနှင့် ဗီယက်နမ်ဧည့်သည်များ ပိုမိုလာရောက်ရေး နည်းလမ်းများကို ဆွေးနွေးခဲ့သည်။
ထို့ပြင် အွန်လိုင်းမှ တက်ရောက်လာသည့် မြန်မာနိုင်ငံဆိုင်ရာ ဗီယက်နမ်သံရုံး ဂုဏ်ထူးဆောင်ကောင်စစ်ဝန် Ms. LE NGUYEN NGOC TRINH၊ ဗီယက်နမ် ခရီးသွားကုမ္ပဏီများနှင့် လေကြောင်းလိုင်း တာဝန်ရှိသူများ၊ လေကြောင်းပို့ဆောင်ရေးညွှန်ကြားမှုဦးစီးဌာန၊ မြန်မာနိုင်ငံ ခရီးသွားလုပ်ငန်းအဖွဲ့ချုပ်၊ MAI လေကြောင်းလိုင်းနှင့် မြန်မာ-ဗီယက်နမ် ချစ်ကြည်ရေးအသင်းတို့မှ တာဝန်ရှိသူများက သက်ဆိုင်ရာ ကဏ္ဍအလိုက် ခရီးသွားကဏ္ဍ မြှင့်တင်ရေး အကြံပြုဆွေးနွေးခဲ့ကြကြောင်း သိရသည်။