ရန်ကုန်တိုင်းဒေသကြီး အင်းစိန်မြို့နယ်ရှိ ရန်ကုန်-ပြည် မီးရထားလမ်းနှင့် ခရေပင်လမ်းဆုံတွင် လေးလမ်းသွား ခုံးကျော်တံတားတစ်စင်း တည်ဆောက်သွားမည်ဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။
အဆိုပါ ခုံးကျော်တံတားကို PC Girder နှင့် Steel Box Girder အမျိုးအစား လေးလမ်းသွားအဖြစ် တည်ဆောက်သွားမည်ဖြစ်ပြီး ပြီးစီးပါက အဆိုပါဧရိယာအတွင်း ယာဉ်ကြောပိတ်ဆို့မှုများကို ထိရောက်စွာ ဖြေရှင်းပေးနိုင်မည်ဖြစ်သည်။
ယင်းလမ်းဆုံတွင် AADT စာရင်းစစ်ဆေးချက်များအရ ၆ ဘီးအထက် ယာဉ်ကြီးများနှင့် အိမ်စီးကား ပေါင်း ၃,၀၀၀ ကျော် နေ့စဉ်ဖြတ်သန်းနေပြီး ရန်ကုန်-ပြည် မီးရထားလမ်းပေါ်တွင်လည်း မြို့ပတ်ရထား အပါအဝင် အစုံ/အဆန် ရထား ၂၃ စင်းအထိ ပြေးဆွဲနေသောကြောင့် ယာဉ်ကြောကျပ်တည်းမှုကို လျှော့ချရန် ယခုစီမံကိန်းကို အကောင်အထည်ဖော်ခြင်း ဖြစ်သည်။
တံတားတည်ဆောက်နေစဉ် ကာလအတွင်း ယာဉ်သွားလာမှု အဆင်ပြေစေရန် ကြိုတင်ပြင်ဆင် ဆောင်ရွက်သွားမည်ဖြစ်ကြောင်း သိရသည်။
ထို့ပြင် စီမံကိန်းနယ်မြေအတွင်းရှိ လျှပ်စစ်နှင့် ဆက်သွယ်ရေးတိုင်များ ရွှေ့ပြောင်းခြင်း၊ တညင်းကုန်းဈေးအဝင် လမ်းလွှဲဖန်တီးခြင်းတို့ကိုလည်း သက်ဆိုင်ရာဌာနများနှင့် ပူးပေါင်းညှိနှိုင်း ဆောင်ရွက်သွားမည်ဖြစ်သည်။