ရန်ကုန်၊ စက်တင်ဘာ ၁၆
စက်တင်ဘာ ၁၅ ရက် ညနေပိုင်းက နေပြည်တော်သို့ ရောက်ရှိလာခဲ့သည့် အမေရိကန်ပြည်ထောင်စုမှ ကိုယ်စားလှယ်အဖွဲ့သည် ယနေ့ စက်တင်ဘာ ၁၆ ရက် ညနေပိုင်းတွင် နေပြည်တော်မှ ပြန်လည်ထွက်ခွာသွားကြောင်း သိရသည်။
အမေရိကန်ကိုယ်စားလှယ်အဖွဲ့၏ ယခုခရီးစဉ်မှာ တစ်ရက်ခန့်သာ ကြာမြင့်ခဲ့ပြီး ခရီးစဉ်အတွင်း မည်သူများနှင့် တွေ့ဆုံခဲ့သည်၊ မည်သည့်အကြောင်းအရာများ ဆွေးနွေးခဲ့သည်ဆိုသည့် အသေးစိတ်အချက်အလက်များကို လက်ရှိအချိန်အထိ အတည်ပြုနိုင်ခြင်း မရှိသေးပေ။
ယခုခရီးစဉ်တွင် အမေရိကန်လေတပ် (United States Air Force) ၏ Beech C-12D Huron အမျိုးအစား၊ မှတ်ပုံတင်အမှတ် 83-0498 လေယာဉ်ကို အသုံးပြုခဲ့ကြောင်း လေကြောင်းပျံသန်းမှုဆိုင်ရာ မှတ်တမ်းများတွင် ဖော်ပြထားပြီး အဆိုပါလေယာဉ်သည် SPAR14 Call Sign ဖြင့် ပျံသန်းခဲ့ခြင်းဖြစ်သည်။
စက်တင်ဘာ ၁၆ ရက် ပြန်လည်ထွက်ခွာသည့် ပျံသန်းမှုမှတ်တမ်းအရ အဆိုပါလေယာဉ်သည် နေပြည်တော် (NYT) မှ ထိုင်းနိုင်ငံ ဘန်ကောက်မြို့ရှိ ဒွန်မောင်းလေဆိပ် (DMK) သို့ ထွက်ခွာသွားခဲ့ကြောင်း တွေ့ရသည်။
အမေရိကန်ကိုယ်စားလှယ်အဖွဲ့တွင် ပါဝင်သူများနှင့် ယခုနေပြည်တော်ခရီးစဉ်၏ ရည်ရွယ်ချက်ကိုမူ လက်ရှိရရှိထားသည့် အချက်အလက်များအရ မသိရှိရသေးပေ။