နိုင်ငံတော်သမ္မတ ပေးအပ်သည့် မာရဝိဇယပုံစံတူ ဗုဒ္ဓရုပ်ပွားတော်မြတ်အား တူဗာပြည်နယ်အကြီးအကဲ ရိုသေစွာလက်ခံ

ကီဇီးလ်၊ ဩဂုတ် ၂၂ ရုရှားဖက်ဒရေးရှင်းနိုင်ငံ၊ တူဗာပြည်နယ်သို့ ရောက်ရှိနေသည့် မြန်မာနိုင်ငံတော်သမ္မတ ဦးမင်းအောင်လှိုင်နှင့် တူဗာပြည်နယ်အကြီးအကဲ မစ္စတာ ဗလာဒီစလပ် ခိုဗာလစ်ဂ် (Vladislav Khovalyg) တို့သည် ကီဇီးလ်မြို့ရှိ ပြည်နယ်အစိုးရအဖွဲ့အိမ်တော်၌ တွေ့ဆုံဆွေးနွေးခဲ့ကြပြီး မြန်မာနိုင်ငံနှင့် တူဗာပြည်နယ်အကြား ဘာသာရေးနှင့် ယဉ်ကျေးမှုကဏ္ဍအပါအဝင် ကဏ္ဍစုံတွင် ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ ပိုမိုမြှင့်တင်သွားရေး ဆွေးနွေးခဲ့ကြသည်။ တွေ့ဆုံဆွေးနွေးပွဲအပြီးတွင် နိုင်ငံတော်သမ္မတ ဦးမင်းအောင်လှိုင်က တူဗာပြည်နယ်အကြီးအကဲအား နေပြည်တော်ရှိ မာရဝိဇယဗုဒ္ဓရုပ်ပွားတော်မြတ်ကြီး၏ ပုံစံတူ စကျင်ကျောက်ဆစ် ဗုဒ္ဓရုပ်ပွားတော်မြတ် တစ်ဆူကို အမှတ်တရလက်ဆောင်အဖြစ် ပေးအပ်ခဲ့ရာ တူဗာပြည်နယ်အကြီးအကဲက ရိုသေလေးစားစွာ လက်ခံခဲ့သည်။ တူဗာပြည်နယ်အကြီးအကဲကလည်း နိုင်ငံတော်သမ္မတအား ကီဇီးလ်မြို့ရှိ တိဗက်ဗုဒ္ဓဘာသာ ဗိသုကာဟန်ဖြင့် ခန့်ညားထည်ဝါစွာ တည်ဆောက်ထားသည့် သုဘတန်ရှီဒရပ်လင်း (Thubten Shedrub Ling) ဗုဒ္ဓဘာသာဘုန်းတော်ကြီးကျောင်း ပန်းချီကားကို အမှတ်တရလက်ဆောင်အဖြစ် ပြန်လည်ပေးအပ်ခဲ့သည်။ မြန်မာနိုင်ငံနှင့် တူဗာပြည်နယ်တို့တွင် ဗုဒ္ဓဘာသာဆိုင်ရာ ယဉ်ကျေးမှုအမွေအနှစ်များ အသီးသီးတည်ရှိနေသည့်အတွက် ယခုကဲ့သို့ ဗုဒ္ဓဘာသာဆိုင်ရာ အထိမ်းအမှတ်လက်ဆောင်များ အပြန်အလှန်ပေးအပ်မှုသည် နှစ်ဖက်အကြား ဘာသာရေးနှင့် ယဉ်ကျေးမှုဆိုင်ရာ ချစ်ကြည်ရင်းနှီးမှုကို ထင်ဟပ်စေသည့် အမှတ်တရအစီအစဉ်တစ်ရပ် ဖြစ်ခဲ့သည်။