ဒေါ်အောင်ဆန်းစုကြည်အနေဖြင့် လက်ရှိပြစ်ဒ-ဏ်ကာလပြီးဆုံးပြီး ဥပဒေလုပ်ထုံးလုပ်နည်းများနှင့်အညီ ပြစ်ဒ-ဏ်များကို ကျခံပြီးပါက နိုင်ငံဖွံ့ဖြိုးတိုးတက်ရေးလုပ်ငန်းများတွင် နိုင်ငံသားတစ်ဦးအဖြစ် မည်သည့်အခက်အခဲ၊ အတားအဆီးမျှမရှိဘဲ ပါဝင်ဆောင်ရွက်နိုင်ကြောင်း နိုင်ငံတော်သမ္မတရုံး ပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားသည်။
ယင်းကို ဇွန် ၃၀ ရက်က နေပြည်တော်ရှိ နိုင်ငံတော်သမ္မတရုံးတွင် ကျင်းပသည့် သတင်းစာရှင်းလင်းပွဲ၌ မီဒီယာများ၏ မေးမြန်းမှုကို ဖြေကြားရာတွင် ဒေါက်တာခိုင်ခိုင်စိုးက ပြောကြားခဲ့ခြင်းဖြစ်သည်။
ဒေါက်တာခိုင်ခိုင်စိုးက ဒေါ်အောင်ဆန်းစုကြည်သည် လက်ရှိတွင် ပြစ်မှုဆိုင်ရာဥပဒေများအရ ပြစ်ဒ-ဏ်ကျခံနေရသူဖြစ်ကြောင်း၊ ဥပဒေ၊ လုပ်ထုံးလုပ်နည်းများနှင့်အညီ ပြစ်ဒ-ဏ်ကာလပြီးဆုံးပြီးနောက် နိုင်ငံဖွံ့ဖြိုးတိုးတက်ရေးလုပ်ငန်းများတွင် နိုင်ငံသားတစ်ဦးအဖြစ် ပါဝင်ဆောင်ရွက်နိုင်မည်ဖြစ်ကြောင်း ပြောကြားသည်။
“ပြင်ပမှာ ပြောဆိုနေကြသလို ဒေါ်အောင်ဆန်းစုကြည်ဟာ နိုင်ငံရေးပုဒ်မ၊ နိုင်ငံရေးပြစ်မှုတွေနဲ့ အရေးယူခံထားရတာ မဟုတ်ပါဘူး။ ပြစ်မှုဆိုင်ရာဥပဒေတွေနဲ့ အရေးယူခံထားရတာပါ။ ဒါကြောင့် ဥပဒေ၊ လုပ်ထုံးလုပ်နည်းနဲ့အညီ ဥပဒေဘောင်အတွင်းက ပြစ်ဒ-ဏ်တွေ ကျခံပြီးရင် ဖွံ့ဖြိုးရေးလုပ်ငန်းတွေမှာ ပါဝင်နိုင်မှာဖြစ်ပါတယ်” ဟု ဒေါက်တာခိုင်ခိုင်စိုးက ပြောကြားသည်။
ထို့ပြင် တိုင်းရင်းသားလက်နက်ကိုင်အဖွဲ့အစည်းများ (EAOs) ကို ငြိမ်းချမ်းရေးဆွေးနွေးရန် ဖိတ်ခေါ်ထားပြီး၊ ငြိမ်းချမ်းရေးသဘောတူညီချက်များ ရရှိလာပါက ၎င်းတို့အနေဖြင့်လည်း နိုင်ငံဖွံ့ဖြိုးတိုးတက်ရေးနှင့် တိုင်းရင်းသားလူမျိုးများ၏ ဖွံ့ဖြိုးတိုးတက်ရေးအတွက် ရည်မှန်းချက်များချမှတ်ကာ ဆောင်ရွက်သွားမည်ဖြစ်ကြောင်း၊ တစ်နိုင်ငံတည်း၏ နိုင်ငံသားများဖြစ်သည့်အတွက် အားလုံးပူးပေါင်းဆောင်ရွက်သွားမည်ဖြစ်ကြောင်း ၎င်းက ပြောကြားသည်။
ထို့အတူ အတိုက်အခံပါတီများသည်လည်း ရွေးကောက်ပွဲများတွင် ပါဝင်ယှဉ်ပြိုင်ခဲ့ကြပြီး လွှတ်တော်ကိုယ်စားလှယ်အဖြစ် ရွေးချယ်ခံရသူများနှင့် မရွေးချယ်ခံရသူများ ရှိသော်လည်း နိုင်ငံဖွံ့ဖြိုးတိုးတက်ရေးအတွက် ကျရာကဏ္ဍမှ အားလုံးပူးပေါင်းပါဝင်ဆောင်ရွက်နိုင်ကြောင်း ဒေါက်တာခိုင်ခိုင်စိုးက ပြောကြားခဲ့သည်။
