စင်ကာပူရေပိုင်နက် မလက္ကာရေလက်ကြားကို ဖြတ်သန်းရန် မလိုဘဲ အာရှနှင့် ဥရောပအကြား ဆက်သွယ်ပေးမည့် ထိုင်းနိုင်ငံ၏ ကရားကျွန်းဆွယ်ဒေသ KraIsthmus ၌ ကုန်းလမ်းချိတ်ဆက်မှု စီမံကိန်း (Land Bridge) ပြန်လည်စတင်ရန် ထိုင်းအစိုးရက ကြိုးပမ်းလျက်ရှိကြောင်း သိရသည်။
ပြီးခဲ့သည့် သီတင်းပတ်အတွင်း ဆန်ဖရန်စစ္စကို၌ ကျင်းပခဲ့သည့် အာရှ-ပစိဖိတ်စီးပွားရေးပူးပေါင်းဆောင်ရွက်မှု (APEC) ထိပ်သီးအစည်းအဝေး (APEC) အတွင်း ထိုင်းဝန်ကြီးချုပ် ဆရီထာသာဗီဆင်က ကီလိုမီတာ ၉၀ သာ ရှည်လျားမည့် ကုန်းလမ်းချိတ်ဆက်မှုစီမံကိန်း ကုန်းမြေတံတားကို တည်ဆောက်ရန် မျှော်လင့်ထားကြောင်း ပြောကြားခဲ့သည်ဟု Port News ၏ သတင်းတစ်ရပ်က ဖော်ပြသည်။
ကုန်းမြေတံတားစီမံကိန်းက ရင်းနှီးမြှုပ်နှံသူများကို ဆွဲဆောင်နိုင်ပြီး ထိုင်းနိုင်ငံ၏ စီးပွားရေးဖွံ့ဖြိုးတိုးတက်မှုကို နောက်ထပ်အဆင့်တစ်ခုသို့ မြှင့်တင်နိုင်မည်ဟု ယုံကြည့်ထားကြောင်း ဝန်ကြီးချုပ် ဆရီထာသာဗီဆင်က ဆိုသည်။
ထိုင်းအစိုးရ၏ Land Bridge စီမံကိန်းသည် အက်ဒမန်ကမ်းရိုးတန်းရှိ ရနောင်းမြို့နှင့် ထိုင်းနိုင်ငံ ပင်လယ်ကွေ့ရှိ ချွန်ဖွန်တို့တွင် ရေနက်ဆိပ်ကမ်းတစ်ခုစီ ထားရှိပြီး ၎င်းဆိပ်ကမ်းနှစ်ခုကို ရထားလမ်း၊ ကားလမ်းတို့ဖြင့် ချိတ်ဆက်ရန် ဒီဇိုင်းထုတ်ထားသည်။
အဆိုပါ ကုန်းမြေတံတားစီမံကိန်းသည် မလက္ကာရေလက်ကြားနှင့် စင်ကာပူနှင့် မလေးရှားရှိ အဓိကဆိပ်ကမ်းများကို ဖြတ်ကျော်ကာ ကွန်တိန်နာ စုစုပေါင်းအလုံးရေ သန်း ၂၀ ခန့် သယ်ယူနိုင်စွမ်းရှိမည်ဖြစ်သည်။
Mahanakorn Partners Group (MPG) ၏ အဆိုအရ အဆိုပါ ကုန်မြေတံတားစီမံကိန်းအတွက် ယခုနှစ် အောက်တိုဘာလ (၁၆)ရက်တွင် ထိုင်းအစိုးရအဖွဲ့၏ ခွင့်ပြုချက် ရရှိခဲ့သည်။
ထိုင်းဝန်ကြီးချုပ်က စီမံကိန်းအတွက် ရင်းနှီးမြှုပ်နှံမှုများကို ရှာဖွေနေပြီး စီမံကိန်းအတွင်း တရုတ်နိုင်ငံမှ ရင်းနှီးမြှုပ်နှံမှုများ ပါဝင်လာနိုင်ရေးကို ကြိုဆိုလျက်ရှိကြောင်း သိရှိရသည်။
စီမံကိန်း၏ အကြီးမားဆုံးသော ရင်းနှီးမြှုပ်နှံမှုအပိုင်းက အမေရိကန်ဒေါ်လာ (၁၈) ဘီလီယံခန့် အသုံးပြုမည့် ရနောင်းမြို့နှင့် ချွန်ဖွန်တို့တွင် တည်ဆောက်မည့် ရေနက်ဆိပ်ကမ်းစီမံကိန်း နှစ်ခုဖြစ်ကြောင်း သိရသည်။
ထိုင်းဝန်ကြီးချုပ်က မလက္ကာရေလက်ကြားကို ဖြတ်သန်းမည့်ကြာချိန်ထက် (၆) ရက်မှ (၉) ရက်အထိ အချိန်ကုန်သက်သာစေနိုင်ကြောင်း ခန့်မှန်းပြောကြားထားသည်။
မလက္ကာရေလက်ကြားက နှစ်စဉ် သင်္ဘောအစင်းရေ ၇၀၀၀၀ မှ ၈၀၀၀၀ အကြား ဖြတ်သန်းသွားလာလျက်ရှိသည်။
Ref : Port News