ထရမ့်ပ်က အီရန်ကိုပိတ်ဆို့မှုများကို သက်တမ်းတိုးရန် စီစဉ်နေ

ဝါရှင်တန်၊ ဧပြီ ၂၈ ရက်

အပ-စ်အခတ်ရပ်စဲရေးသည် ဆက်လက်၍တည်ရှိနေသော်လည်း ဆွေးနွေးပွဲများ ရပ်တန့်နေစဉ်အတွင်း အီရန်နိုင်ငံကို ကာလရှည်ကြာ ပိတ်ဆို့မှုများကို ပြုလုပ်ရေးအတွက် ပြင်ဆင်ထားရန် အမေရိကန်သမ္မတ ဒေါ်နယ်ထရမ့်ပ်က ၎င်း၏အစိုးရအဖွဲ့ကို ညွှန်ကြားထားကြောင်း ဝေါ်စထရိ ဂျာနယ် က အမေရိကန်အရာရှိများကို ကိုးကား၍ အင်္ဂါနေ့တွင် ဖော်ပြခဲ့သည်။

တနင်္လာနေ့က အိမ်ဖြူတော်တွင် ပြုလုပ်သည့် လုံခြုံရေးဆိုင်ရာ အဆင့်မြင့်အရာရှိများနှင့် ဆွေးနွေးပွဲ အပါအဝင် မကြာသေးမီက ပြုလုပ်ခဲ့သော အစည်းအဝေးများတွင် ထရမ့်ပ်သည် အီရန်၏ ဆိပ်ကမ်းများသို့ သင်္ဘောများ၏ အဝင်အထွက်ကို တားဆီးခြင်းဖြင့် အီရန်၏ စီးပွားရေးနှင့် ရေနံတင်ပို့မှုကို ဆက်လက်ဖိအားပေးရန် ရွေးချယ်ခဲ့ကြောင်း အဆိုပါအစီရင်ခံစာက ဆိုသည်။

အီရန်ကို နျူကလီးယားလက်နက်ကိစ္စကို အညံ့ခံရေးအတွက် အတင်းအကျပ် လုပ်ဆောင်သည့် “အန္တရာယ်များသော ကြိုးပမ်းမှု” ဖြစ်သည့် ဤပိတ်ဆို့မှုသည် ဗုံးကြဲမှုများကို ပြန်လည်စတင်ရန် သို့မဟုတ် ပဋိပက္ခမှ နုတ်ထွက်ရန်ဟူသော အခြားရွေးချယ်စရာများထက် အန္တရာယ်ပိုနည်းသည်ဟု သမ္မတက သုံးသပ်ခဲ့ကြောင်း အရာရှိများက ပြောကြားခဲ့သည်။

အီရန်အနေဖြင့် အနည်းဆုံးအားဖြင့် နျူကလီးယား သန့်စင်မှုကို အနှစ် ၂၀ ကြာ ရပ်ဆိုင်းထားရန်နှင့် ထိုကာလနောက်ပိုင်းတွင်လည်း ကန့်သတ်ချက်များကို လက်ခံရန်ဟူသော ထရမ့်ပ်၏ တောင်းဆိုချက်ကို လက်လျှော့ရန် လောလောဆယ်တွင် ဆန္ဒမရှိကြောင်း ၎င်းတို့က သတင်းစာသို့ ပြောကြားခဲ့သည်။

ဟော်မုဇ် ရေလက်ကြားကို ပြန်လည်ဖွင့်လှစ်ရန်နှင့် နျူကလီးယားဆွေးနွေးပွဲများကို နောက်ပိုင်းမှ ဆွေးနွေးရန်ဟူသော အီရန်၏ အဆင့်သုံးဆင့်ပါ ကမ်းလှမ်းချက်သည် အီရန်အနေဖြင့် သဘောထားမှန်ဖြင့် ညှိနှိုင်းနေခြင်း မဟုတ်ကြောင်း သက်သေပြနေသည်ဟု ထရမ့်ပ်က လက်ထောက်များကို ပြောကြားခဲ့ကြောင်း သိရသည်။

အိမ်ဖြူတော် ပြောရေးဆိုခွင့်ရှိသူ Anna Kelly က အမေရိကန်သည် အီရန်နှင့်ဖြစ်ပွားသော စစ်ပွဲတွင် ၎င်း၏ စစ်ရေးရည်မှန်းချက်များကို ပြည့်မီခဲ့ပြီး “အီရန်ဆိပ်ကမ်းများကို အောင်မြင်စွာ ပိတ်ဆို့နိုင်မှုကြောင့် တေရန်မှ နျူကလီးယားလက်နက် မပိုင်ဆိုင်နိုင်စေရေး ညှိနှိုင်းမှုများတွင် အမေရိကန်သည် အစိုးရအပေါ် အမြင့်ဆုံးသော အသာစီးရယူမှုကို ရရှိထားသည်” ဟု ပြောကြားခဲ့သည်။

သို့သော် ပိတ်ဆို့မှုကို သက်တမ်းတိုးခြင်းသည် ဓာတ်ဆီဈေးနှုန်းများကို မြင့်တက်စေပြီး ထရမ့်ပ်၏ လူထုထောက်ခံမှုနှုန်းကို ထိခိုက်စေကာ ကြားဖြတ်ရွေးကောက်ပွဲတွင် ရီပတ်ဘလစ်ကန်များ၏ အလားအလာကို ပိုမိုမှေးမှိန်စေသည့် ပဋိပက္ခကို ရှည်ကြာစေကြောင်း အစီရင်ခံစာက ဆိုသည်။ ထို့အပြင် ဖေဖော်ဝါရီလ ၂၈ ရက် နေ့တွင် အမေရိကနှင့် အစ္စရေးတို့က အီရန်ကို အကြီးအကျယ် တို-က်ခိုက်ခဲ့ပြီးနောက်ပိုင်း ဟော်မုဇ် ရေလက်ကြားကို ဖြတ်သန်းသွားလာမှုမှာ အနည်းဆုံးအဆင့်သို့ ရောက်ရှိသွားစေခဲ့သည်။

ရှင်းလင်းပြတ်သားသော လမ်းစမရှိခြင်းကြောင့် ရှစ်ပတ်ကြာ ပဋိပက္ခသည် နျူကလီးယား သဘောတူညီချက်လည်း မရရှိသကဲ့သို့ စစ်ပွဲပြန်လည်စတင်ခြင်းလည်း မရှိဘဲ အဆုံးသတ်သွားနိုင်သည်ဟု အမေရိကန်အရာရှိအချို့က ကောက်ချက်ချနေကြကြောင်း Axios သတင်းဌာနက ပထမဆုံး ဖော်ပြခဲ့သည်။

Ref: ရှင်းဟွာ