ရုရှားကနာဇီစစ်အောင်ပွဲနေ့အခမ်းအနားကိုလက်နက်ပစ္စည်းများမပါဘဲ ကျင်းပမည်

ရုရှားနိုင်ငံသည် နာဇီဂျာမနီတို့အပေါ် အောင်နိုင်မှုကို လာမည့်လတွင် ရင်ပြင်နီ၌ စစ်ရေးပြပွဲအခမ်းအနားဖြင့် အောင်ပွဲခံကျင်းပမည်ဖြစ်သော်လည်း ယူကရိန်းစစ်ပွဲကာလအတွင်း စစ်ဆင်ရေးအခြေအနေအရ စစ်ရေးပစ္စည်းများကို ထုတ်ဖော်ပြသမည်မဟုတ်ကြောင်း ကာကွယ်ရေးဝန်ကြီးဌာနက အင်္ဂါနေ့အနှောင်းပိုင်းတွင် ပြောကြားခဲ့သည်။

ဂျာမနီ၏ လက်နက်ချမှုကို ဆိုဗီယက်ပြည်ထောင်စုက လက်မှတ်ရေးထိုးခဲ့သည့်နေ့ဖြစ်သော မေလ ၉ ရက်နေ့တွင် အစဉ်အလာအတိုင်း ကျင်းပသော စစ်ရေးပြအခမ်းအနားသည် ယခုနှစ်တွင် ၈၁ နှစ်မြောက် အောင်ပွဲနေ့အထိမ်းအမှတ်ဖြစ်ကာ ရုရှားလူမျိုးများက မဟာမျိုးချစ်စစ်ပွဲဟု ခေါ်ဆိုကြသည်။

ရုရှားပြက္ခဒိန်တွင် ထိပ်တန်းအားလပ်ရက်များထဲမှ တစ်ခုဖြစ်ပြီး အရေအတွက်လျော့နည်းလာသော စစ်ပြန်များကို လမ်များပေါ်တွင် ဆုံတွေ့ကြရစေပြီး ရုပ်ရှင်များ၊ မှတ်တမ်းရုပ်ရှင်များနှင့် စစ်ပွဲကာလတေးဂီတများဖြင့် အမှတ်အသားပြုထားသည့် စိတ်လှုပ်ရှားဖွယ်ရာများ ထွက်ပေါ်စေမည်ဖြစ်သည်။

သို့သော် ယခုနှစ်တွင် မည်သည့်စစ်ဘက်ဆိုင်ရာပစ္စည်းကိုမျှ ရင်ပြင်မှတဆင့် ဖြတ်သန်းပြသမည်မဟုတ်ကြောင်း ဝန်ကြီးဌာနက ပြောကြားခဲ့သည်။

ရုရှားဖက်ဒရေးရှင်း၏ လက်နက်ကိုင်တပ်ဖွဲ့များဆိုင်ရာ အဆင်မြင့်ပညာရေးအဖွဲ့အစည်းများနှင့် သီးခြားဌာနခွဲများမှ စစ်သားများသည် စစ်ရေးပြပွဲတွင် ပါဝင်ကြမည်ဖြစ်သည်ဟု ကြေညာချက်တွင် ဖော်ပြထားသည်။

ခရမ္မလင်က အထူးစစ်ဆင်ရေးအဖြစ် သုံးနှုန်းသော ယူကရိန်းပဋိပက္ခတွင် ပါဝင်နေသည့် စစ်တပ်၏ ဌာနခွဲအားလုံးမှ စစ်သားများ၏ လုပ်ဆောင်ချက်များကို ပြသသွားမည်ဟု ဖော်ပြထားသည်။

၎င်းတွင် ရုရှား၏ မဟာဗျူဟာမြောက်ဒုံးကျည်တပ်ဖွဲ့များ၊ အာကာသတပ်ဖွဲ့များနှင့် ရေတပ်သင်္ဘောများပေါ်ရှိ စစ်သည်များ ပါဝင်မည်ဟု ဆိုခဲ့သည်။ လေတပ်လေယာဉ်များသည် ပျံသန်းသရုပ်ပြမည်ဖြစ်ပြီး စစ်ရေးပြပွဲအဆုံးတွင် နိုင်ငံတော်အလံ အဖြူ၊ အပြာနှင့် အနီရောင်များကို သရုပ်ဖော်ပြသသွားမည်ဟု ပြောကြားခဲ့သည်။

Ref: အင်တာနာဇီယွန်နား