သဲအိတ်နှင့် Geo-bag များဖြည့်၍ Sheet Pile Wall ခိုင်ခံ့ရေး ဆက်လက်ဆောင်ရွက်မည်
လေးမျက်နှာ၊ စက်တင်ဘာ ၂၂
ငဝန်မြစ်မှ ရေကျော်စီးဝင်နေမှုကို တားဆီးနိုင်ရေး ဆောင်ရွက်နေသည့် Sheet Pile ရို-က်သွင်းခြင်းလုပ်ငန်းအားလုံး ယနေ့ စက်တင်ဘာ ၂၂ ရက် မွန်းလွဲ ၁၂ နာရီခွဲခန့်တွင် ပြီးစီးခဲ့ကြောင်း ဆောက်လုပ်ရေးဝန်ကြီးဌာန၊ တံတားအထူးအဖွဲ့ (၁၆) မှ ဒုတိယညွှန်ကြားရေးမှူး (မြို့ပြ) ဦးကျော်မျိုးက ပေါ်ပြူလာနယူးစ်သို့ ပြောသည်။
ရေစီးသန်သည့်အခြေအနေများကြားမှ Sheet Pile များဖြင့် ရေဝင်လမ်းကြောင်းကို ကာရံတားဆီးနိုင်ခဲ့ပြီး လက်ရှိတွင် ရို-က်သွင်းထားသည့် Sheet Pile Wall နှင့် တာတမံ ရေရှည်ခိုင်မာတောင့်တင်းရေးအတွက် လိုအပ်သည့်လုပ်ငန်းများကို ဆက်လက်ဆောင်ရွက်နေကြောင်း သိရသည်။
“ရေဝင်လမ်းကြောင်းကို Sheet Pile Wall နဲ့ အပြီးကာရံတားဆီးပြီးတဲ့နောက် မြစ်ဘက်ခြမ်းက ရေ Level ဟာ မူလအတိုင်း ဆက်လက်ရှိနေမှာဖြစ်ပြီး မြို့ဘက်ခြမ်းမှာရှိတဲ့ ရေအမြင့်ကတော့ တဖြည်းဖြည်း လျော့နည်းကျဆင်းသွားမှာ ဖြစ်ပါတယ်” ဟု ဦးကျော်မျိုးက ပြောသည်။
မြို့ဘက်ခြမ်းရှိ ရေထုလျော့ကျလာချိန်တွင် မြစ်ဘက်ခြမ်းမှ ရေထုဖိအားကို Sheet Pile Wall က ဆက်လက်ခံနေရမည်ဖြစ်သဖြင့် Wall ၏ နောက်ကျောဘက်၌ သဲအိတ်နှင့် Geo-bag များကို အမြန်ဆုံးဖြည့်တင်း၍ ခိုင်ခံ့အောင် ဆောင်ရွက်ရမည်ဖြစ်ကြောင်း ၎င်းက ရှင်းပြသည်။
ယင်းသို့ ဖြည့်တင်းမှသာ မြစ်ရေထုဖိအားကြောင့် Sheet Pile Wall ကျိုးပေါက်ခြင်း၊ လဲကျခြင်းမရှိဘဲ ရေဝင်ရောက်မှုကို ဆက်လက်တားဆီးနိုင်မည်ဖြစ်၍ သဲအိတ်နှင့် Geo-bag ဖြည့်တင်းခြင်းအပါအဝင် ကျန်ရှိသည့် ရေတား၊ ရေပိတ်လုပ်ငန်းများကို ဆက်လက်အရှိန်မြှင့် ဆောင်ရွက်သွားမည်ဖြစ်ကြောင်း သိရသည်။