ပြည်သူ့လွှတ်တော်က အဆိုကို လက်ခံဆွေးနွေးရန် ကြေညာ
နေပြည်တော်၊ စက်တင်ဘာ ၂၂
ဧရာဝတီမြစ်အတွင်း ရေယာဉ်များ တစ်နှစ်ပတ်လုံး လုံခြုံချောမွေ့စွာ သွားလာနိုင်ရေးအတွက် မြစ်ကြောင်းစီမံခန့်ခွဲမှုလုပ်ငန်းများကို အမျိုးသားအဆင့်စီမံကိန်းတစ်ရပ်အဖြစ် ဆောင်ရွက်ပေးရန် ပြည်ထောင်စုအစိုးရအား တိုက်တွန်းကြောင်းအဆိုကို ကသာမဲဆန္ဒနယ် ပြည်သူ့လွှတ်တော်ကိုယ်စားလှယ် ဦးတင်ဌေးက တင်သွင်းခဲ့သည်။
စက်တင်ဘာ ၂၂ ရက်က ကျင်းပသည့် တတိယအကြိမ် ပြည်သူ့လွှတ်တော် တတိယပုံမှန်အစည်းအဝေး ဒုတိယနေ့တွင် ယင်းအဆိုကို တင်သွင်းခဲ့ခြင်းဖြစ်ပြီး လွှတ်တော်က လက်ခံဆွေးနွေးရန် ကြေညာခဲ့သည်။
ဧရာဝတီမြစ်သည် ကချင်ပြည်နယ်မှ မြန်မာနိုင်ငံအလယ်ပိုင်းဒေသများကို ဖြတ်သန်းကာ ဧရာဝတီတိုင်းဒေသကြီးမှတစ်ဆင့် ပင်လယ်ပြင်သို့ စီးဝင်သည့် အဓိကရေကြောင်းလမ်းမကြီးဖြစ်ပြီး ခရီးသည်နှင့် ကုန်စည်ပို့ဆောင်ရေးအတွက် နှစ်ပေါင်းများစွာ အသုံးပြုလာခဲ့ကြောင်း ဦးတင်ဌေးက အဆိုတင်သွင်းရာတွင် ပြောကြားခဲ့သည်။
မြစ်အတွင်း တစ်နှစ်ပတ်လုံး ရေကြောင်းသွားလာနိုင်ရေးအတွက် မြစ်ကြောင်းတူးဖော်ထိန်းသိမ်းခြင်း၊ ရေကြောင်းအမှတ်အသားများ တပ်ဆင်ခြင်း၊ ခေတ်မီရေကြောင်းလမ်းညွှန်စနစ်များ အသုံးပြုခြင်းနှင့် ရေရှည်စီမံကိန်းများ ချမှတ်အကောင်အထည်ဖော်ခြင်းတို့ ဆောင်ရွက်သင့်ကြောင်း အဆိုတွင် တင်ပြထားသည်။
ဧရာဝတီမြစ်အတွင်း ရေယာဉ်များ တစ်နှစ်ပတ်လုံး လုံခြုံချောမွေ့စွာ သွားလာနိုင်ပါက ကုန်စည်ပို့ဆောင်ရေးစရိတ်များ လျော့ကျစေပြီး ဒေသခံပြည်သူများ၏ လူမှုစီးပွားဘဝနှင့် နိုင်ငံ၏ စီးပွားရေးလုပ်ငန်းများကို အထောက်အကူပြုနိုင်မည်ဟု အဆိုတင်သွင်းသူက ပြောကြားခဲ့သည်။
အဆိုနှင့်ပတ်သက်၍ ဆွေးနွေးလိုသည့် လွှတ်တော်ကိုယ်စားလှယ်များအနေဖြင့် စက်တင်ဘာ ၂၄ ရက် နောက်ဆုံးထား၍ အမည်စာရင်းတင်သွင်းရန် ပြည်သူ့လွှတ်တော်က သတ်မှတ်ထားကြောင်း သိရသည်။