အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နှင့် NCA လက်မှတ်ရေး ထိုးထားသည့် တိုင်းရင်းသားလက်နက်ကိုင်အဖွဲ့အစည်းများ၏ 7 EAO Alliance တို့အကြား နှစ်ရက်တာ ကျင်းပခဲ့သည့် အလွတ်သဘောတွေ့ဆုံဆွေးနွေးပွဲသည် အပြန်အလှန်နားလည်မှုများနှင့် ရလဒ်ကောင်းများရရှိကာ အောင်မြင်စွာပြီးဆုံးခဲ့ကြောင်း သိရသည်။
ဆွေးနွေးပွဲ၏ နိဂုံးချုပ်အမှာစကားတွင် 7 EAO Alliance ဆွေးနွေးညှိနှိုင်းရေးအဖွဲ့ ခေါင်းဆောင် ဗိုလ်မှူးကြီး စိုင်းငင်းက နှစ်ဦးနှစ်ဖက် ခေါင်းဆောင်များနှင့် ကိုယ်စားလှယ်များအကြား ပွင့်ပွင့်လင်းလင်းနှင့် အသေးစိတ်ကျကျ ဆွေးနွေးနိုင်ခဲ့သဖြင့် သဘောထားစုစည်းချက်များနှင့် မှတ်တမ်းကောင်းများရရှိခဲ့သည်ဟု ဆိုသည်။
ယခုဆွေးနွေးပွဲသည် နှစ်ဦးနှစ်ဖက် ကြိုတင်ညှိနှိုင်းပြင်ဆင်ခဲ့ကြသဖြင့် ပူးတွဲကျင်းပသည့် ဆွေးနွေးပွဲတစ်ခု၏ ပုံရိပ်ကောင်းကို ဖော်ပြနိုင်ခဲ့ကြောင်း ဆိုသည်။
NSPNC ၏ ငြိမ်းချမ်းရေးမူဝါဒ၊ အဆိုပြုအစီအစဉ်များနှင့် 7 EAO Alliance ၏ ရည်မှန်းချက်၊ သဘောထားများကို ကျေကျေလည်လည် မေးမြန်းရှင်းလင်းနိုင်ခဲ့ကြသဖြင့် ရှေ့လုပ်ငန်းစဉ်များအတွက် များစွာအထောက်အကူဖြစ်စေကြောင်းနှင့် ဆွေးနွေးပွဲမှရရှိလာသည့် ရလဒ်များကို မကြာမီကျင်းပမည့် 7 EAO Alliance ၏ ဦးဆောင်အစည်းအဝေးသို့ တင်ပြသွားမည်ဖြစ်ကာ လမ်းညွှန်ချက်များနှင့်အညီ ငြိမ်းချမ်းရေးလုပ်ငန်းစဉ်များကို ဆက်လက်ဆောင်ရွက်သွားမည်ဖြစ်ကြောင်း အသိပေးချက်တွင်ဖော်ပြထားသည်။
ဗိုလ်မှူးကြီး စိုင်းငင်းက 7 EAO Alliance ၏ ငြိမ်းချမ်းရေးဖော်ဆောင်ရေး ရည်မှန်းချက် (၃) ရပ်ဖြစ်သည့် လက်ရှိအခြေအနေနှင့်အညီ ငြိမ်းချမ်းရေးလုပ်ငန်းစဉ် ပြန်လည်ဖော်ဆောင်ရေး၊ ပါဝင်သင့်ပါဝင်ထိုက်သော အဖွဲ့အစည်းများ ပါဝင်လာစေရေးနှင့် ရေရှည်တည်တံ့ခိုင်မြဲသော ငြိမ်းချမ်းရေး တည်ဆောက်နိုင်ရေးတို့အတွက် သက်ဆိုင်ရာအဖွဲ့အစည်းအားလုံးနှင့် ဆက်လက်ညှိနှိုင်းဆွေးနွေးသွားမည်ဖြစ်ကြောင်း ပြောကြားခဲ့သည်။
7 EAO Alliance ဆိုသည်မှာတစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများထဲမှ (၇) ဖွဲ့ဖြင့် စုဖွဲ့ထားသည့် မဟာမိတ်အဖွဲ့အစည်းဖြစ်သည်။
RCSS – သျှမ်းပြည်ပြန်လည်ထူ ထောင်ရေးကောင်စီ၊ PNLO – ပအိုဝ်းအမျိုးသားလွတ်မြောက်ရေးအဖွဲ့ချုပ်၊ DKBA – ဒီမိုကရေစီအကျိုးပြုကရင့်တပ်မတော်
KNU/KNLA-PC -ကရင်အမျိုး သားအစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ၊ ALP – ရခိုင်ပြည်လွတ်မြောက်ရေးပါတီ၊LDU – လားဟူဒီမိုကရက်တစ်အဖွဲ့ချုပ်
NMSP – မွန်ပြည်သစ်ပါတီတို့ပါဝင်သည်။