Grade-12 အောင်မြင်ထားသူများ တက်ရောက်နိုင်သည့် မြန်မာသတင်းအချက်အလက် နည်းပညာတက္ကသိုလ် (MIIT) ၏ ၂၀၂၆-၂၀၂၇ ပညာသင်နှစ် ပထမနှစ် ဘွဲ့ကြိုသင်တန်းများအတွက် ဝင်ခွင့်လျှောက်လွှာများကို စတင်ခေါ်ယူနေပြီဖြစ်ကြောင်း သိရသည်။
လျှောက်လွှာများကို ၂၀၂၆ ခုနှစ်၊ စက်တင်ဘာလ ၁၁ ရက်နေ့မှစ၍ MIIT ကျောင်းသားရေးရာဌာနတွင်လည်းကောင်း၊ တက္ကသိုလ် ဝဘ်ဆိုက်ဖြစ်သည့် www.miitmdy.edu.mm မှလည်းကောင်း ဒေါင်းလုဒ်ရယူ၍ အောက်တိုဘာလ ၁၂ ရက်နေ့ နောက်ဆုံးထားကာ ကျောင်းသို့ တိုက်ရိုက် လျှောက်ထားရမည်ဖြစ်သည်။
သတ်မှတ်ချက်များနှင့် ကိုက်ညီသည့် လျှောက်လွှာရှင်များသည် နိုဝင်ဘာလ ၃ ရက်နှင့် ၄ ရက်နေ့တို့တွင် ကျင်းပမည့် အရည်အချင်းစစ် ဝင်ခွင့်စာမေးပွဲကို ဖြေဆိုရမည်ဖြစ်သည်။ အဆိုပါ စာမေးပွဲသည် ၂ နာရီကြာ ဖြေဆိုရမည်ဖြစ်ပြီး တက္ကသိုလ်ဝင်တန်းအဆင့် အင်္ဂလိပ်စာ၊ သင်္ချာနှင့် ရူပဗေဒ ဘာသာရပ်များကို မေးမြန်းသွားမည် ဖြစ်သည်။
ဝင်ခွင့်ရွေးချယ်ရာတွင် တက္ကသိုလ်ဝင်တန်း ရမှတ်နှင့် အရည်အချင်းစစ် စာမေးပွဲ ရမှတ်တို့ကို ပေါင်းစပ်တွက်ချက်၍ ရွေးချယ်သွားမည်ဖြစ်သည်။ ဖြေဆိုခွင့် ကတ်ပြားများကို အောက်တိုဘာလ ၃၀ ရက်နှင့် နိုဝင်ဘာလ ၂ ရက်နေ့တို့တွင် ထုတ်ပေးမည်ဖြစ်ပြီး စာမေးပွဲဖြေဆိုခွင့် ကတ်ပြား မပါရှိပါက စာမေးပွဲ ဝင်ရောက်ဖြေဆိုခွင့် ပြုမည်မဟုတ်ကြောင်း သိရသည်။