Category: Movies

ဟောင်ကောင်မိုးလေဝသဌာနက ဇွန် ၁၈ ရက် မွန်းလွဲပိုင်းတွင် မိုးရွာသွန်းမှုဆိုင်ရာ အမြင့်ဆုံးအဆင့်ဖြစ်သည့် အနက်ရောင် (Black Rainstorm Warning) သတိပေးချက်ကို ထုတ်ပြန်ခဲ့ပြီး စာသင်ကျောင်းများပိတ်ထားရန်နှင့် လုပ်ငန်းအချို့ကို ယာယီရပ်နားထားရန် ညွှန်ကြားခဲ့ကြောင်း သိရသည်။ မိုးလေဝသဌာန၏ ထုတ်ပြန်ချက်အရ တစ်နာရီလျှင် မိုးရေချိန် ၇၀ မီလီမီတာကျော် ရွာသွန်းနေပြီး ဆက်လက်၍ မိုးသည်းထန်စွာ ရွာသွန်းနိုင်သေးကြောင်း သိရသည်။ ယခုသတိပေးချက်သည် ၂၀၂၆ ခုနှစ်အတွင်း ဒုတိယအကြိမ်မြောက် အနက်ရောင်သတိပေးချက် ထုတ်ပြန်ခြင်းဖြစ်ပြီး ပထမအကြိမ်ကို ဇွန် ၈ ရက်တွင် ထုတ်ပြန်ခဲ့သည်။ အနောက်တောင်မုတ်သုံလေအားကောင်းစွာ တိုက်ခတ်နေခြင်းနှင့် လေဖိအားနည်းရပ်ဝန်းများ ဆက်တိုက်ဖြစ်ပေါ်နေခြင်းကြောင့် ဟောင်ကောင်နှင့် တရုတ်နိုင်ငံတောင်ပိုင်းဒေသများတွင် ရက်အတော်ကြာ မိုးကြီးနေခဲ့ကြောင်း သိရသည်။ ထို့ပြင် လေပြင်းတိုက်ခတ်မှုများလည်း ဖြစ်ပေါ်နိုင်ပြီး ဟောင်ကောင်အနောက်တောင်ပိုင်းရှိ ထိုင်အို (Tai O) ဒေသတွင် တစ်နာရီလျှင် ၈၀ ကီလိုမီတာခန့်အထိ လေတိုက်နှုန်းမြင့်တက်နိုင်ကြောင်း မိုးလေဝသဌာနက သတိပေးထားသည်။ ယခုကဲ့သို့ သတိပေးချက်ထုတ်ပြန်ခြင်းမှာ သုံးရက်ကြာအားလပ်ရက်နှင့် နဂါးလှေပွဲတော်မတိုင်မီ ဖြစ်ပေါ်လာခြင်းဖြစ်ပြီး ဒေသခံအများအပြား၏ ခရီးသွားအစီအစဉ်များအပေါ် သက်ရောက်မှုရှိနိုင်ကြောင်း သိရသည်။ တစ်ဖက်တွင်လည်း ဟောင်ကောင်နှင့် နယ်နိမိတ်ချင်းထိစပ်နေသည့် ရှန်ကျန်းဒေသအပါအဝင် တရုတ်ပြည်မကြီးတောင်ပိုင်း၌ အနီရောင်အဆင့် မိုးကြီးသတိပေးချက်များ ထုတ်ပြန်ထားပြီး မြေနိမ့်ပိုင်းဒေသများ၊ ရေဝပ်နိုင်သည့်နေရာများနှင့် ဘေးအန္တရာယ်ဖြစ်နိုင်သည့် ဒေသများသို့ မသွားရောက်ကြရန် အာဏာပိုင်များက တိုက်တွန်းထားသည်။ မိုးသည်းထန်စွာရွာသွန်းမှုကြောင့် တောင်ကျရေစီးဆင်းမှု၊ မြေပြိုမှုနှင့် ရေကြီးရေလျှံမှုများ ဖြစ်ပေါ်နိုင်သည့် အန္တရာယ် မြင့်မားနေကြောင်းလည်း သက်ဆိုင်ရာတာဝန်ရှိသူများက...