ရန်ကုန်၊ ဩဂုတ် ၁၅
ရန်ကုန်မြို့အတွင်း ဖြစ်ပွားနေသည့် ဝမ်းပျက်ဝမ်းလျှောရောဂါ ကာကွယ်ထိန်းချုပ်ရေးနှင့် မိုးရာသီ သောက်သုံးရေသန့်ရှင်းရေးအတွက် မြို့နယ် ၈ ခုရှိ ရေပေးဝေရေးပိုက်လိုင်းကွန်ရက် ၂၁ နေရာတွင် ကလိုရင်းဆေးထပ်မံခတ်ခြင်း (Chlorine Booster Dosing) လုပ်ငန်းများ ဆောင်ရွက်လျက်ရှိကြောင်း ရန်ကုန်မြို့တော်စည်ပင်သာယာရေးကော်မတီ၊ အင်ဂျင်နီယာဌာန (ရေနှင့်သန့်ရှင်းမှု) ထံမှ သိရသည်။
ရန်ကုန်မြို့သို့ သောက်သုံးရေဖြန့်ဖြူးပေးနေသည့် ရေသန့်စင်စက်ရုံများတွင် ကမ္ဘာ့ကျန်းမာရေးအဖွဲ့ (WHO) ၏ စံချိန်စံညွှန်းများနှင့်အညီ ကလိုရင်းခတ်ပေးလျက်ရှိပြီး လက်ရှိရောဂါဖြစ်ပွားမှုကို ထိန်းချုပ်နိုင်ရေးအတွက် ရေပေးဝေရေးကွန်ရက်အတွင်း ပိုးသတ်နိုင်စွမ်းရှိသည့် ကလိုရင်းကျန်ရှိမှုပမာဏ (Residual Chlorine) သတ်မှတ်ပမာဏရရှိစေရန် ထပ်မံဖြည့်စွက်ဆောင်ရွက်နေခြင်းဖြစ်သည်။
ကလိုရင်းထပ်မံခတ်ပေးနေသည့်နေရာများမှာ လသာမြို့နယ် ၈ နေရာ၊ လမ်းမတော်မြို့နယ် ၅ နေရာ၊ ကျောက်တံတားနှင့် ပန်းဘဲတန်းမြို့နယ်တို့တွင် ၂ နေရာစီ၊ အလုံ၊ ပုဇွန်တောင်၊ မင်္ဂလာတောင်ညွန့်နှင့် ဒဂုံမြို့နယ်တို့တွင် ၁ နေရာစီဖြင့် စုစုပေါင်း ၂၁ နေရာဖြစ်သည်။
အင်ဂျင်နီယာဌာန (ရေနှင့်သန့်ရှင်းမှု) ဒုတိယဌာနမှူး ဒေါ်သွဲ့နိုင်ဦးက ရေပေးဝေရေးကွန်ရက်အတွင်းမှ ရေနမူနာများရယူ၍ ရေအရည်အသွေးကို တိုင်းတာစောင့်ကြည့်လျက်ရှိပြီး စစ်ဆေးချက်များအရ ကလိုရင်းဓာတ် အထိုက်အလျောက်ရှိနေကြောင်း ပြောကြားသည်။
ထို့ပြင် ရောဂါဖြစ်ပွားမှု ထိန်းချုပ်နိုင်ရေးအတွက် စည်ပင်သာယာရေးကော်မတီနှင့် ကျန်းမာရေးဌာနမှ တာဝန်ရှိသူများ ပူးပေါင်း၍ ရေဖြန့်ဖြူးရေးပိုက်လိုင်းများအတွင်း ကလိုရင်းခတ်ထားမှုအခြေအနေများကို ကွင်းဆင်းစစ်ဆေးလျက်ရှိပြီး ပြည်သူများအနေဖြင့်လည်း သောက်သုံးရေကို သန့်ရှင်းစွာ ထိန်းသိမ်းသုံးစွဲကြရန် အသိပေးထားကြောင်း သိရသည်။