“ဒေါ်အောင်ဆန်းစုကြည်အား ချက်ချင်းနှင့် ခြွင်းချက်မရှိလွှတ်ပေးရန်” တောင်းဆိုမှုသည် တရားစီရင်ရေးနှင့် ဥပဒေစိုးမိုးရေး အခြေခံမူများအပေါ် သက်ရောက်မှုရှိဟု မြန်မာသံရုံး တုံ့ပြန်

ဝါရှင်တန်၊ ဩဂုတ် ၁၅

ဒေါ်အောင်ဆန်းစုကြည်အား “ချက်ချင်းနှင့် ခြွင်းချက်မရှိ လွှတ်ပေးရန်” တောင်းဆိုမှုသည် နိုင်ငံတစ်နိုင်ငံ၏ သက်ဆိုင်ရာတရားစီရင်ရေးလုပ်ငန်းစဉ်နှင့် ဥပဒေစိုးမိုးရေးဆိုင်ရာ အခြေခံမူများအပေါ် သက်ရောက်မှုရှိစေကြောင်း မြန်မာသံရုံး (ဝါရှင်တန်) က ဩဂုတ် ၁၄ ရက်တွင် ထုတ်ပြန်သည်။

အမေရိကန်နိုင်ငံခြားရေးဝန်ကြီးဌာန အရှေ့အာရှနှင့် ပစိဖိတ်ရေးရာဗျူရိုနှင့် အမေရိကန်အထက်လွှတ်တော် နိုင်ငံခြားဆက်ဆံရေးကော်မတီဥက္ကဋ္ဌတို့က ဩဂုတ် ၃ ရက်တွင် ဒေါ်အောင်ဆန်းစုကြည်နှင့် အပြည်ပြည်ဆိုင်ရာကြက်ခြေနီကော်မတီ (ICRC) ဌာနေကိုယ်စားလှယ်တို့ တွေ့ဆုံခဲ့မှုကို ကြိုဆိုကြောင်း X လူမှုကွန်ရက်၌ ဖော်ပြခဲ့ကြပြီး ဒေါ်အောင်ဆန်းစုကြည်အား ချက်ချင်းနှင့် ခြွင်းချက်မရှိ လွှတ်ပေးရန်လည်း တောင်းဆိုခဲ့ကြောင်း သိရသည်။

ယင်းဖော်ပြချက်များအနက် တွေ့ဆုံမှုအပေါ် ကြိုဆိုသည့်အချက်ကို အသိအမှတ်ပြုသော်လည်း ခြွင်းချက်မရှိလွှတ်ပေးရန် တောင်းဆိုမှုမှာ တရားစီရင်ရေးလုပ်ငန်းစဉ်နှင့် ဥပဒေစိုးမိုးရေး အခြေခံမူများအပေါ် သက်ရောက်မှုရှိကြောင်း မြန်မာသံရုံးက တုံ့ပြန်ထားသည်။

ထို့ပြင် ဒေါ်အောင်ဆန်းစုကြည်အား ပြစ်မှုဆိုင်ရာဥပဒေအရ စိစစ်အရေးယူထားခြင်းဖြစ်ပြီး အစိုးရအနေဖြင့် လူသားချင်းစာနာထောက်ထားမှုဆိုင်ရာ ရှုထောင့်မှ ပြစ်ဒဏ်များ လျှော့ပေါ့ပေးထားသော်လည်း ခြွင်းချက်မရှိ လွှတ်ပေးရေးကိစ္စကို တရားဥပဒေနှင့်အညီသာ ဆောင်ရွက်နိုင်မည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

နိုင်ငံတော်အစိုးရအနေဖြင့် ပြစ်ဒဏ်ကျခံနေရသူများကို လူသားချင်းစာနာထောက်ထားမှုဖြင့် လွတ်ငြိမ်းချမ်းသာခွင့်နှင့် ပြစ်ဒဏ်လျှော့ပေါ့မှုများ အကြိမ်ကြိမ်ဆောင်ရွက်ပေးခဲ့ပြီး ၂၀၂၁ ခုနှစ်မှ လက်ရှိအချိန်အထိ အကျဉ်းသား ၁၂၆,၉၆၄ ဦးကို လွတ်ငြိမ်းချမ်းသာခွင့်ပြုခဲ့ကာ ဦးဝင်းမြင့်ကိုလည်း ပြစ်ဒဏ်များမှ လွတ်ငြိမ်းချမ်းသာခွင့်ပြုခဲ့ကြောင်း မြန်မာသံရုံး (ဝါရှင်တန်) ၏ ထုတ်ပြန်ချက်အရ သိရသည်။