နေပြည်တော်၊ ဇူလိုင်-၁၈
နေပြည်တော်မြို့တွင်း ခရီးသွားပြည်သူများ၊ ဝန်ထမ်းများနှင့် ကျောင်းသား၊ ကျောင်းသူများ သွားလာရေး ပိုမိုအဆင်ပြေစေရန်အတွက် လက်ရှိပြေးဆွဲနေသည့် EV ဘတ်စ်ကားလမ်းကြောင်းများအပြင် အသစ်လမ်းကြောင်းများ တိုးချဲ့ပြေးဆွဲမည်ဟု သိရသည်။
ယင်းလမ်းကြောင်းများမှာ တပ်ကုန်း၊ လယ်ဝေး၊ ရွာတော်နှင့် မြို့တွင်း လိုအပ်သော နေရာများသို့ လမ်းကြောင်းသစ်များ ထပ်မံတိုးချဲ့ပြေးဆွဲရန် စီစဉ်နေခြင်း ဖြစ်သည်။
အဆိုပါ လမ်းကြောင်းတိုးချဲ့ပြေးဆွဲနိုင်ရေးအတွက် သက်ဆိုင်ရာဌာနများနှင့် ပူးပေါင်းဆောင်ရွက်လျက်ရှိကြောင်း နေပြည်တော်ဂိတ်တာဝန်ခံ ဦးအောင်သူမိုးက ပြောကြားသည်။
လက်ရှိတွင် ရာဇာမင်းယာဉ်လိုင်းမှ EV ဘတ်စ်ကားများကို နေပြည်တော် မြို့မဈေးမှ စတင်ထွက်ခွာ၍ ခုတင် (၁၀၀၀) ဆေးရုံရှေ့၊ ကံ့ကော်အိမ်ရာ၊ သပြေကုန်းဈေး၊ စည်ပင်ဧည့်ရိပ်သာ၊ ဇမ္ဗူသီရိဆေးရုံရှေ့၊ ပြန်ကပြေးအဝိုင်း၊ ဆင်ရုပ်နှင့် နှင်းဆီအဝိုင်းမှတစ်ဆင့် ဘောဂသီရိဂိတ်အထိ ပြေးဆွဲပေးလျက်ရှိသည်။
ယာဉ်စီးခနှုန်းထားကိုမူ ဂိတ်စဂိတ်ဆုံး မည်သည့်နေရာအထိ စီးနင်းသည်ဖြစ်စေ တစ်ဦးလျှင် ၁,၀၀၀ ကျပ်ဖြင့် ပြေးဆွဲပေးနေခြင်းဖြစ်ပြီး ယာဉ်စီးခပေးချေရာတွင် သတ်မှတ်ထားသည့် ပုံးအတွင်း ကိုယ်တိုင်ထည့်သွင်းပေးရကာ မိမိဆင်းလိုသည့်နေရာရောက်မှသာ Stop Alarm ခလုတ်ကို နှိပ်ရသည့်စနစ်ဖြင့် ပြေးဆွဲပေးနေကြောင်း သိရသည်။