သစ်တောသယံဇာတ ပတ်ဝန်းကျင်ဖွံ့ဖြိုးတိုးတက်ရေးနှင့် ထိန်းသိမ်းရေးအသင်း (FREDA) မှ ကြီးမှူး၍ ငှက်ဝါသနာရှင်များနှင့် သဘာဝပတ်ဝန်းကျင် ချစ်မြတ်နိုးသူများအတွက် ရည်ရွယ်ကာ “ပထမအကြိမ်မြောက် ငှက်ကြည့်ခြင်းသင်တန်း (Bird Watching Course)” ကို လာမည့် ဇွန်လ ၂၇ ရက်နေ့မှ စတင်၍ ဖွင့်လှစ်သွားမည်ဖြစ်ကြောင်း သိရသည်။
အဆိုပါသင်တန်းတွင် FREDA အသင်း၏ ဗဟိုကော်မတီဝင် ဝါရင့်ပညာရှင် ဆရာဒေါက်တာသိန်းအောင် ကိုယ်တိုင် အနီးကပ်သင်ကြားပြသပေးမည်ဖြစ်ပြီး၊ ငှက်မျိုးစိတ်များအကြောင်းကို စနစ်တကျနှင့် ပျော်ရွှင်စွာ လေ့လာနိုင်ရန် စာတွေ့သင်ခန်းစာများအပြင် လက်တွေ့ကွင်းဆင်းလေ့လာခြင်း (Field Trip) ခရီးစဉ်များကိုပါ ထည့်သွင်းစီစဉ်ထားကြောင်း သိရသည်။
စာတွေ့သင်တန်းကို လာမည့် ဇွန်လ ၂၇ ရက်၊ ၂၈ ရက်နှင့် ဇူလိုင်လ ၄ ရက်၊ ၅ ရက် (စနေ၊ တနင်္ဂနွေနေ့များ) တွင် ညနေ ၇ နာရီမှ ည ၉:နာရီအထိ Zoom Online စနစ်ဖြင့် သင်ကြားပို့ချသွားမည် ဖြစ်သည်။
လက်တွေ့ကွင်းဆင်းလေ့လာခြင်း (Field Trip) အဖြစ် ဇူလိုင်လ ဒုတိယပတ်အတွင်း လှော်ကားသဘာဝဥယျာဉ်နှင့် တိုင်းရင်းသားကျေးရွာများသို့ နေ့ချင်းပြန် (၂) ရက် ခရီးစဉ်အဖြစ် သွားရောက်ရန် လျာထားပြီး၊ အသင်းမှ နေ့လည်စာ ကျွေးမွေးဧည့်ခံသွားမည် ဖြစ်ကြောင်း သိရသည်။
သင်တန်းကြေးအဖြစ် တစ်ဦးကို ကျပ် နှစ်သိန်း သတ်မှတ်ထားပြီး စာရင်းပေးသွင်းနိုင်ပြီးဖြစ်ပြီး စာရင်းပေးသွင်းပြီးသူများအတွက် သင်တန်းမစတင်မီ (၅) ရက်အလိုတွင် Zoom Meeting ID နှင့် Passcode တို့ကို ကြိုတင်ပေးပို့သွားမည်ဖြစ်ကြောင်း FREDA အသင်းထံမှ သိရသည်။