မေလအတွင်း ပြည်ပသို့ မြန်မာ့ဆန်နှင့် ဆန်ကွဲ တန်ချိန် တစ်သိန်းကျော် တင်ပို့နိုင်ခဲ့၊ ကမ္ဘာ့နိုင်ငံပေါင်း ၃၀ ကျော်သို့ ဈေးကွက်ဖြန့်ကြက်ပြီးခဲ့သည့် မေလအတွင်း မြန်မာနိုင်ငံမှ ပြည်ပနိုင်ငံအသီးသီးသို့ ဆန်နှင့် ဆန်ကွဲ စုစုပေါင်း တန်ချိန် ၁၃၀,၀၀၀ (၁ သိန်း ၃ သောင်း) ကျော် တင်ပို့နိုင်ခဲ့ကြောင်း မြန်မာနိုင်ငံဆန်စပါးအသင်းချုပ် (MRF) ၏ ထုတ်ပြန်ချက်စာရင်းဇယားများအရ သိရသည်။

ယခုကဲ့သို့ ပြည်ပသို့ ဆန်နှင့် ဆန်ကွဲ တင်ပို့ရာတွင် ကုန်ကျစရိတ်သက်သာပြီး ကုန်ပစ္စည်းအမြောက်အမြား သယ်ယူနိုင်သည့် ပင်လယ်ရေကြောင်း ကုန်သွယ်မှုလမ်းကြောင်းကို အဓိကအားပြု၍ တင်ပို့ခဲ့ခြင်းဖြစ်ပြီး ရရှိခဲ့သည့် ကုန်သွယ်မှုပမာဏ အသေးစိတ်မှာ အောက်ပါအတိုင်း ဖြစ်သည်။

ဆန် တင်ပို့မှု: စုစုပေါင်း တန်ချိန် ၅၇,၈၅၈ တန်
ဆန်ကွဲ တင်ပို့မှု: စုစုပေါင်း တန်ချိန် ၇၈,၄၀၄ တန်

ကမ္ဘာ့ဈေးကွက်သို့ မြန်မာ့ဆန် ဖြန့်ကြက်နိုင်မှု အခြေအနေ

မြန်မာ့ဆန်နှင့် ဆန်ကွဲများကို အာရှဒေသတွင်းနိုင်ငံများသာမက ဥရောပ၊ အာဖရိကနှင့် ဗြိတိန် အပါအဝင် အနောက်နိုင်ငံများအထိပါ ဈေးကွက်ကျယ်ကျယ်ပြန့်ပြန့် တင်ပို့နိုင်ခဲ့သည်။

ဆန်တင်ပို့သည့် နိုင်ငံများမှာ

မဒါဂတ်စကာ၊ တရုတ်၊ စပိန်၊ ဖိလစ်ပိုင်၊ ပိုလန် အပါအဝင် ကမ္ဘာ့နိုင်ငံပေါင်း ၃၀ ကျော် သို့ တင်ပို့နိုင်ခဲ့သည်။

ဆန်ကွဲတင်ပို့သည့် နိုင်ငံများမှာ

တရုတ်နိုင်ငံသို့ တန်ချိန် ၄၀,၆၈၉ တန် ဖြင့် အများဆုံး တင်ပို့ခဲ့ပြီး ဘယ်လ်ဂျီယံ၊ နယ်သာလန်၊ ပိုလန်နှင့် စပိန် အပါအဝင် နိုင်ငံပေါင်း ၁၁ နိုင်ငံ သို့ ဖြန့်ကြက် တင်ပို့နိုင်ခဲ့သည်။

ပြည်ပက အဝယ်လိုက်နေသည့် မြန်မာ့ဆန်အမျိုးအစားများမှာ

လက်ရှိတွင် ပြည်ပနိုင်ငံများသို့ တင်ပို့ရာ၌ ပြည်တွင်း၌ အထွက်နှုန်းကောင်းမွန်သည့် ဆန်ကြမ်းအမျိုးအစားများကို အဓိကထား တင်ပို့နေရသလို၊ မြန်မာ့အဆင့်မြင့် ပေါ်ဆန်းမွှေးဆန်များကိုလည်း တင်ပို့လျက်ရှိသည်။

အဓိက တင်ပို့နေသည့် ဆန်အမျိုးအစားများမှာ
ဆင်းသုခ၊ သီးထပ်ရင်၊ ရတနာတိုး၊ ငစိန်၊ ရာကျော်၊ ကရင်မ၊ ထွန်းပု၊ ဇီယာ၊ ငွေတိုး၊ မင်းဧရာ၊ ရွှေမန်း နှင့် ပေါ်ဆန်းဆန်တို့ဖြစ်သည်။