အာရေဗျပင်လယ်တွင် ဆိုးရွားသော နည်းပညာပိုင်းဆိုင်ရာ ချို့ယွင်းမှု ဖြစ်ပွားခဲ့သည့် အိန္ဒိယသင်္ဘောတစ်စင်း၏ အကူအညီတောင်းခံမှုကို ပါကစ္စတန်ရေတပ်က ကူညီခဲ့ကြောင်း ပါကစ္စတန်စစ်တပ်က မေလ ၅ ရက်နေ့တွင် ပြောကြားခဲ့သည်။
“အမ်ဗီဂူတမ်” အမည်ရှိ သင်္ဘောသည် အိန္ဒိယနိုင်ငံသား ခြောက်ဦးနှင့် အင်ဒိုနီးရှားနိုင်ငံသား တစ်ဦး အပါအဝင် သင်္ဘောသား ခုနစ်ဦးကို တင်ဆောင်လာခဲ့ပြီး အိုမန်မှ အိန္ဒိယသို့ ဦးတည် ခုတ်မောင်းနေစဉ် ကြီးမားသော နည်းပညာပိုင်းဆိုင်ရာ ချို့ယွင်းမှု ဖြစ်ပွားခဲ့သဖြင့် ပင်လယ်ထဲတွင် သောင်တင်နေခဲ့ကြောင်း ပါကစ္စတန်စစ်တပ်၏ ထုတ်ပြန်ချက်တွင် ဖော်ပြထားသည်။
ပါကစ္စတန်ရေတပ်သည် “ကက်ရှ်မီးယား” အမည်ရှိ သင်္ဘောတစ်စင်းကို စေလွှတ်ခဲ့ပြီး သင်္ဘောကို တည်ငြိမ်စေရန်နှင့် သင်္ဘောသားများ၏ ဘေးအန္တရာယ်ကင်းရှင်းရေးအတွက် အစားအစာ၊ ဆေးဘက်ဆိုင်ရာ အကူအညီများနှင့် နည်းပညာပိုင်းဆိုင်ရာ အထောက်အပံ့များကို ပံ့ပိုးပေးခဲ့ကြောင်း သတင်းထုတ်ပြန်ချက်တွင် ဖော်ပြထားသည်။
ထို့ပြင် ဧပြီလအတွင်း မြောက်ပိုင်း အာရေဗျပင်လယ်တွင် ခုတ်မောင်းနေသော ကုန်တင်သင်္ဘောတစ်စင်းက အကူအညီတောင်းခံခဲ့သဖြင့် ပါကစ္စတန်ရေတပ်က သင်္ဘောသား ၁၈ ဦးကို ကယ်တင်ပြီး ဘေးလွတ်ရာသို့ ရွှေ့ပြောင်းပေးခဲ့ကြောင်းလည်း ပြောကြားခဲ့သည်။
Ref: သယ်စထရိတ်တိုင်းမ်စ်