နစက ဥက္ကဋ္ဌသည် မန္တလေးမြို့သို့ ရောက်ရှိနေစဉ် စည်ရှည်တံတားဆောက်လုပ်ရေးဆောင်ရွက်နေမှု၊ မဟာအတုလဝေယန် (အတုမရှိ)ကျောင်းတော်ကြီး၊ ရွှေနန်းတော်ကျောင်း(ရွှေကျောင်း)၊ မဟာဓမ္မိကာရာမ ရွှေကျင်တိုက်မကြီး၊ မြနန်းစံကျော် ရွှေနန်းတော်ကြီးတို့ကို သွားရောက်ကြည့်ရှုစစ်ဆေးခဲ့သည်။
စည်ရှည်တံတားပြန်ဆောက်နေမှုနှင့်ပတ်သက်၍ ရှေးမူမပျက်ရန်၊ တံတားနှင့်ဆက်စပ်နေသည့် လမ်း များကိုလည်း စနစ်တကျဆောင်ရွက်ရန်တို့မှာကြားခဲ့သည်ဟု သိရသည်။
ထိုနည်းတူ မဟာအတုလဝေယန် (အတုမရှိ)ကျောင်းတော်ကြီးရှိ စူဠာမုနိရုပ်ရှင်တော်ဘွဲ့ အမည်ခံရုပ်ပွားဆင်းတုတော်ကြီးအား ဖူး မြော်ကြည်ညိုကာ ကျောင်းတော်ကြီး ရေရှည်တည်တံ့ခိုင်မြဲရေး၊မူလရှေးဟောင်းထိန်းသိမ်းရေးတို့ကိုမှာကြားခဲ့သည်။
ရွှေနန်းတော်ကျောင်း (ရွှေကျောင်း) သို့ ရောက်ရှိကြစဉ်တွင်လည်း နစကဥက္ကဋ္ဌသည် ကျောင်းတော်ကြီးအတွင်းအပြင်ရှိ မြန်မာမှုသစ်သားပန်းပုအခြေခံ ခြူးပန်း၊ ခြူးနွယ် အပြောက်အမွမ်းများ၊ ရုပ်လုံးရုပ်ကြွများ၊ ကျေးငှက်တိရစ္ဆာန်ရုပ်များ၊ နံရံကပ်ရုပ်ကြွများ၊ အတွင်းမာရဘင်အရှေ့ပိုင်းကွန်း စင်တိုင်အခြေတွင် ထုဆစ်ပူဇော်ထားသည့် ဇာတ်ကြီးဆယ်ဘွဲ့၊ တောထွက်ခန်း၊ မဟာပဒုမဇတ်၊ ဥတေနဇာတ်တော် တို့ကို အနုစိတ်ထုဆစ်ပူဇော်ထားရှိမှုများ ကို ကြည့်ရှုပြီး တန်ဖိုးမဖြတ်နိုင်သည့် ရှေးဟောင်းသမိုင်းဝင်အမွေအနှစ်လက်ရာများဖြစ်သည့်အတွက် စနစ်တကျဖြင့် လက်ဆင့်ကမ်းထိန်းသိမ်းစောင့်ရှောက်သွားကြရမည်ဖြစ်ကြောင်း ပြောကြားခဲ့သည်။
ထို့အပြင် မဟာဓမ္မိကာရာမ ရွှေကျင်ကျောင်းတိုက်ကြီးတွင်လည်း နစကဥက္ကဋ္ဌနှင့် အဖွဲ့ဝင်များသည် သက်တမ်း ၁၆၂ နှစ်ကျော်သက်တမ်းရှိ ကျွန်းကျောင်းတော်ကြီးရှိ ဗုဒ္ဓရုပ်ပွားတော်မြတ်အား ဖူးမြော်ကြည်ညိုခြင်း၊ကျွန်းကျောင်းတော်ကြီးအတွင်းရှိ ရွှေကျင်သာသနာပိုင် ဆရာတော်ကြီးများ၏ ပုံတူရုပ်တုတော်များကို ဖူးမြော်ကြည့်ရှုပြီး ကျောင်းတော်ကြီး ရေရှည်တည်တံ့ခိုင်မြဲစေရေးအတွက်ထိန်းသိမ်းဆောင်ရွက်ရန်နှင့် အခြားလိုအပ်သည်များကိုဆွေးနွေးမှာကြားခဲ့သည်။
မြနန်းစံကျော် ရွှေနန်းတော်ကြီး ထိန်းသိမ်းထား ရှိမှု အခြေအနေများကို သွားရောက်ကြည့်ရှုစစ်ဆေးရာသာသနာရေးနှင့်ယဉ်ကျေးမှုဝန်ကြီးဌာန ဒုတိယဝန်ကြီး ဒေါ်နုမြဇံ နှင့် တာဝန်ရှိသူများက ယခင်နှစ်က နိုင်ငံတော်ဝန်ကြီးချုပ် လာရောက်စဉ်လမ်းညွှန်မှာကြားချက်များအားဆောင်ရွက်ထားရှိမှုအခြေ အနေများကို ရှင်းလင်းတင်ပြခဲ့ကြသည်။
အဆိုပါ ခရီးစဉ်ကို နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင် သည် ယနေ့နံနက်ပိုင်းတွင် ဇနီး ဒေါ်ကြူကြူလှ၊ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး နှင့်ဇနီး၊ ကောင်စီဝင် ဗိုလ်ချုပ်ကြီးမောင်မောင်အေး နှင့်ဇနီး၊ ဒုတိယဗိုလ်ချုပ်ကြီး ရာပြည့်၊ဗိုလ်ချုပ်ကြီး ညိုစောနှင့်ဇနီး၊ ပြည်ထောင်စုဝန်ကြီးများဖြစ်ကြသည့် ဦးမင်းနောင်၊ ဦးမျိုးသန့်၊ ကာကွယ်ရေးဦးစီးချုပ်ရုံးမှ အဆင့်မြင့်တပ်မတော်အရာရှိကြီးများ၊ အလယ်ပိုင်းတိုင်း စစ်ဌာနချုပ်တိုင်းမှူးနှင့်တာဝန်ရှိသူများလိုက်ပါခဲ့ကြောင်းသိရသည်။
