တိုက်ပွဲများကြောင့် ယာယီပိတ်ထားရသော မြဝတီ-မဲဆောက်အမှတ် (၂) ချစ်ကြည်ရေးတံတားကို ယနေ့ ဧပြီလ(၃၀)ရက်နေ့ နံနက်ပိုင်း ပြန်လည်ဖွင့်လှစ်ခဲ့ကြောင်း ဒေသခံသတင်းအရင်းအမြစ်များထံက သိရသည်။
” ကုန်သွယ်မှုဆိုင်ရာ ကုန်တင်ယာဥ်တွေ ပြန်ဝင်ထွက် ခွင့်ပြုလိုက်ပြီ။ U-turn လို အလုပ်သမားများ ပြည်ပထွက်ခွာမှုအတွက်ကိုလည်း ဆောင်ရွက်နိုင်နေတယ်လို့သိရတယ်”ဟု ကုန်သွယ်ရေးအသိုင်းအဝိုင်းနှင့် နီးစပ်သူတစ်ဦးက ပြောသည်။
ကုန်သွယ်မှုများအတွက် အာရှလမ်းမှ ပြန်လည်ဖြတ်သန်းခွင့်ရရှိရန် တပ်မတော်ဘက်က နယ်မြေရှင်းလင်းရေးနှင့် လုံခြုံရေးလုပ်ငန်းများဆောင်ရွက်လျှက်ရှိသည်ကို သိရကြောင်း ဒေသခံတစ်ဦးက ပြောသည်။
” အခုသင်္ဃန်းညီနောင်အထိတော့ သွားလို့ရပြီ။ ဟိုဘက်မှာက နယ်မြေလုံခြုံရေးလုပ်နေတယ်လို့ကြားတယ်။ လောလောဆယ် ထို့ကော်ကိုးလမ်းဘက်ကပဲ လာရမှာပဲ။ လမ်းကမပိတ်ဘူး။ တိုက်ပွဲကြောင့် ကုန်ကားတွေ မဆင်းကြတာပဲရှိပါတယ်။ အခု ကျုံးဒိုးဘက် လည်း နယ်မြေရှင်းလင်းရေး လုပ်နေတယ်လို့ကြားပါတယ်”ဟု ၎င်းက ဆို သည်။
မြဝတီဒေသတွင်းတိုက်ပွဲကြောင့် ယာယီပိတ်ထားရသော ထိုင်း-မြန်မာ အမှတ်(၁)ချစ်ကြည်ရေးတံတားအား ဧပြီ (၂၇)ရက် နံနက် (၁၀)နာရီအချိန်တွင် ပြန်လည်ဖွင့်လှစ်ပေးပြီးနောက် (၃)ရက်အကြာတွင် အမှတ် (၂)ချစ်ကြည်ရေးတံတားကိုလည်း ထပ်မံဖွင့်လှစ်ခဲ့ခြင်းဖြစ်သည်။
မြဝတီမြို့ တိုက်ပွဲကြောင့် ပြီးခဲ့သော ဧပြီ (၂၁) ရက်မှစတင်ကာ မြဝတီ-မဲဆောက် အမှတ် (၁) ၊ အမှတ်(၂)တံတားများကို ယာယီ သွားလာဖြတ်သန်းခွင့်များ ပိတ်ထားခဲ့ရခြင်းဖြစ် သည်။
အဆိုပါ ထိုင်း-မြန်မာ အမှတ် (၂) တံ တားသည် နှစ်နိုင်ငံ ကုန်စည်သယ်ယူပို့ ဆောင်ခြင်း အပါအဝင် ထိုင်းနိုင်ငံသို့ မြန်မာ MoU လုပ်သားများ စေလွှတ်ခြင်း၊ ထိုင်းနိုင်ငံ၌ အကြောင်းအမျိုးမျိုးကြောင့် ပြစ်ဒဏ်ကျခံပြီး လွတ်မြောက်လာသည့် မြန်မာနိုင်ငံသားများနှင့် မြန်မာ နိုင်ငံတွင် ရာဇဝတ်မှုကျူးလွန်ခြင်းကြောင့် ပြစ်ဒဏ်ကျခံပြီး လွတ်မြောက်လာသည့် ထိုင်းနိုင်ငံသားများအား နေရပ်သို့ပြန်ပို့ရာတွင် အသုံးပြုသော တံတားဖြစ်သည်ဟု ဒေသတွင်းသတင်းများအရ သိရသည်။
