ယနေ့ နံနက်ပိုင်း ကြေညာခဲ့သည့် နိုင်ငံ့ဝန်ထမ်း ထောက်ပံ့ငွေ ၃၀၀၀၀ ကျပ် တိုးမြှင့်မည့်အစီအစဉ်ကို လာမည့် အောက်တိုဘာလတွင် စတင်ပေးအပ်သွားမည်ဖြစ်ကြောင်း သိရသည်။
စီမံကိန်းနှင့် ဘဏ္ဍာရေးဝန်ကြီးဌာနက အမိန့်ကြော်ငြာစာအမှတ် ၇၀/၂၀၂၃ဖြင့် ထုတ်ပြန်ထားခြင်း ဖြစ်ပြီး ယင်းအမိန့်သည် အောက်တိုဘာ (၁) ရက်တွင် စတင်အသက်ဝင်မည်ဖြစ်ကြောင်း သိရသည်။
ထို့ကြောင့် တပ်မတော်သားများအပါအဝင်နိုင်ငံ့ဝန်ထမ်းများအနေဖြင့် အောက်တိုဘာလကုန်တွင် ရရှိမည့် လစာနှင့်အတူ အပိုထောက်ပံ့ငွေ ၃၀၀၀၀ ကျပ် ထပ်ဆောင်းရရှိမည်ဖြစ်သည်။
“နိုင်ငံဝန်ထမ်းများအား ၂၀၂၃ခုနှစ်၊ အောက်တိုဘာလအတွက် ပေးရန်ရှိသော လစာနှင့်အတူ အပိုထောက်ပံ့ကြေးကို ထုတ်ပေးနိုင်အောင် ဆောင်ရွက်ပေးရပါမည်” ဟု စီမံကိန်းနှင့် ဘဏ္ဍာရေးဝန်ကြီးဌာန၏ အမိန့်ကြေညာချက်၌ ဖော်ပြထားခြင်း ဖြစ်သည်။
အဆိုပါ အပိုထောက်ပံ့ငွေကို နိုင်ငံဝန်ထမ်းများအပြင် အစိုးရဌာနများနှင့်အဖွဲ့အစည်များတွင် နေ့စားဝန်ထမ်းအဖြစ် လုပ်ကိုင်နေသည့် အလုပ်သမားများလည်း ခံစားခွင့်ရှိပြီးလက်ရှိသတ်မှတ်ထားသည့် တစ်ရက်လုပ်ခလစာ ၄၈၀၀ ကျပ်အပြင် အပိုထောက်ပံ့ကြေး ၁၀၀၀ ကျပ်ထပ်မံခံစားခွင့်ပြုသွားမည်ဖြစ်ကြောင်း သိရသည်။
ယခုထောက်ပံ့သည့် အပိုထောက်ပံ့ကြေးကို ပြည်ပနိုင်ငံများ၌ သွားရောက် တာဝန်ထမ်းဆောင်နေရသည့် နိုင်ငံ့ဝန်ထမ်းများ၊ ပြည်ပတွင် သွားရောက်ပညာသင်ကြားနေသည့် နိုင်ငံ့ဝန်ထမ်းများလည်း ခံစားခွင့်မရှိကြောင်း စီမံကိန်းနှင့် ဘဏ္ဍာရေးဝန်ကြီးဌာန၏ အမိန့်စာတွင် ဖော်ပြထားသည်။
သို့သော် ပြည်တွင်းရှိ တက္ကသိုလ်၊ကောလိပ်၊ သိပ္ပံတစ်ခုခုတွင်လည်းကောင်း၊ စက်မှုစိုက်ပျိုးနှင့် သက်မွေးပညာဆိုင်ရာသိပ္ပံ သို့မဟုတ် အထက်တန်းကျောင်းတစ်ခုခုတွင် အစိုးရခွင့်ပြုချက်ဖြင့် ပညာသင်ကြားနေသည့် ဝန်ထမ်းများအနေဖြင့် အဆိုပါ အပိုထောက်ပံ့ကြေးဆို ခံစားခွင့် ရှိကြောင်း သိရသည်။
အဆိုပါ နိုင်ငံအတွင်း တာဝန်ထမ်းဆောင်နေသည့် နိုင်ငံဝန်ထမ်းများအား အပိုထောက်ပံ့ကြေးခံစားခွင့်ပြုခြင်း အမိန့်ကြေညာစာကို ယနေ့ စက်တင်ဘာ (၃၀) ရက်တွင် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန်က လက်မှတ်ရေးထိုး ထုတ်ပြန်ထားခြင်း ဖြစ်သည်။