မြန်မာ့ရိုးရာနှစ်သစ်ကူးသင်္ကြန်ပွဲတော်အား နိုင်ငံအဆင့်အမျိုးသားအဆင့် တွဲဖက်ယဥ်ကျေးမှုအမွေအနှစ်အဖြစ် ထိန်းသိမ်းစောင့်ရှောက်ထားပြီး ကမ္ဘာ့အမွေအနှစ်စာရင်းတင်သွင်းနိုင်ရန်ဆောင်ရွက်လျက်ရှိသည်ဟု ရှေးဟောင်းသုတေ သနနှင့်အမျိုးသားပြတိုက်ဦးစီးဌာနမှ သိရသည်။
ထိုသို့ ကမ္ဘာ့အမွေအနှစ်စာရင်းတင်သွင်းနိုင်ရန် ယခုနှစ်ကျင်းပမည့် မြန်မာ့ရိုးရာနှစ်သစ်ကူးသင်္ကြန်ပွဲတော်တွင် သင်္ကြန်ပွဲတော်နှင့်ပတ်သက်သည့် ပုံရိပ်များအားလုံးကို Documentary ရိုက်ကူး၍ မှတ်တမ်းတင်ထားမည်ဖြစ်ကြောင်း သိရသည်။
“သင်္ကြန်ကို ကမ္ဘာ့အမွေအနှစ်စာရင်းတင်သွင်းရာမှာ ဗီဒီယိုဖိုင်တွေတင်ပြဖို့လိုတယ် ဒါ့ကြောင့်အခုထဲကစပြီးစုဆောင်းထားတာပါ သင်္ကြန်ဆိုတာက ရေပက်လောင်းတဲ့အဆင့်တင်မဟုတ်ဘဲ သင်္ကြန်ပွဲတော်နဲ့အတူ ဘာသာရေးပွဲတော်တွေလုပ်ဆောင်ကြတယ်။ ဇီဝိတဒါနငါးလွှတ်ပွဲတွေလုပ်ကြတယ်” ဟု ရှေးဟောင်းသုတေသနနှင့်အမျိုးသားပြတိုက်ဦးစီးဌာန၏ ဒု-ညွှန်ကြားရေးမှူးချုပ်ဒေါက်တာသိန်းလွင်ကပြောသည်။
ထို့ပြင် သင်္ကြန်မဏ္ဍပ်များဆောက်ခါအလှပြယာဥ်များဖြင့် ယိမ်းအကများ၊သီဆိုဖျော်ဖြေမှုများ၊စတုဒိသာကျွေးမွေးလှူဒါန်းမှုများ၊အလှူ အတန်းပြုလုပ်ခြင်းများလည်းရှိခြင်း၊ နှစ်ဆန်းတစ်ရက်နေ့တွင်လည်း အန္တရာယ်ကင်းပရိတ်ရွတ်ခြင်းများအား တစ်နိုင်ငံလုံးအတိုင်းအတာဖြင့် ဘုန်းတော်ကြီးများအားပင့်ဖိတ်၍ ပရိတ်ရွတ်ဖတ်ခြင်းများကိုလည်း Documentary ရိုက်ကူး၍မှတ်တမ်းတင်ထားမည်ဟု သိရသည်။
“သင်္ကြန်ဆိုတာ ရေပက်တဲ့အဆင့်မဟုတ်ဘဲနဲ့ သင်္ကြန်နဲ့ပတ်သက်တာတွေကိုပါ မှတ်တမ်းရိုက်ကူးရမှာပါ သင်္ကြန်ပွဲတော်ဟာ တိုင်းနဲ့ပြည်နယ်အသီးသီးမှာရှိတဲ့ တိုင်းရင်းသားပြည်သူတွေရဲ့ ရိုးရာဓလေ့ထုံးစံအတိုင်းကျင်းပတယ်ဆိုတဲ့ မှတ်တမ်းတွေကိုလည်းပြရမှာပါ”ဟု ရှေးဟောင်း သုတေသနနှင့်အမျိုးသားပြတိုက်ဦးစီးဌာန၏ ဒု- ညွှန်ကြားရေးမှူးချုပ်ဒေါက်တာသိန်းလွင်ကဆိုသည်။
မြန်မာ့ရိုးရာနှစ်သစ်ကူးသင်္ကြန်ပွဲတော်အား တကောင်းခေတ်မှစတင်ကျင်းပခဲ့ခြင်းဖြစ်ပြီး မြန်မာ နိုင်ငံအပြင် လန်ချန်း-မဲခေါင်ဒေသများဖြစ်သည့် တရုတ်၊လာအို၊ကမ္ဘောဒီးယား၊ထိုင်းနှင့်ဗီယက်နမ်နိုင်ငံတို့တွင်ပါ ကျင်းပလေ့ရှိ၍ ကမ္ဘာ့အမွေအနှစ်စာရင်းတင်သွင်းနိုင်ရန် ဆောင်ရွက်လျက်ရှိကြောင်း သိရသည်။
Photo Credit- Internet
