ကျန်းမာရေးဝန်ကြီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာန လက်အောက်ရှိ ဆေးတက္ကသိုလ်(၁) ရန်ကုန်က ၂၀၂၇ ပညာသင်နှစ်အတွက် ဆေးပညာဒီပလိုမာ (Diploma in Medical Science) နှင့် ဆေးပညာမဟာသိပ္ပံ (Master of Medical Science – M.Med.Sc) ဘွဲ့လွန်သင်တန်းများသို့ တက်ရောက်လိုသည့် သတ်မှတ်အရည်အချင်းပြည့်မီသော နိုင်ငံ့ဝန်ထမ်းဆရာဝန်များအား လျှောက်လွှာခေါ်ယူထားကြောင်း ထုတ်ပြန်သည်။
ဖွင့်လှစ်မည့် သင်တန်းများတွင် တီဘီနှင့်ရင်ခေါင်းရောဂါကုပညာ၊ ကာလသားရောဂါနှင့် HIV ကူးစက်ရောဂါပညာ၊ သွေးသွင်းကုသခြင်းဆိုင်ရာဆေးပညာ၊ ဆေးလက်တွေ့ဆိုင်ရာဆေးဝါးဗေဒ၊ အထူးကြပ်မတ်ကုသမှုပညာနှင့် အခြေခံအရေးပေါ်ကုသမှုပညာ (Online) ဒီပလိုမာသင်တန်းများအပြင် ခန္ဓာဗေဒ၊ ကမ္မဗေဒ၊ ဆေးဝါးဗေဒ၊ ကာကွယ်ရေးနှင့်အပူပိုင်းဆေးပညာ၊ ရောဂါဗေဒ၊ မေ့ဆေးပညာ၊ အရေပြားရောဂါပညာ၊ မျက်စိရောဂါပညာ၊ ဆေးပညာ၊ ခွဲစိတ်ကုပညာ၊ သားဖွားနှင့်မီးယပ်ပညာ၊ ကလေးကျန်းမာပညာ၊ အရိုးရောဂါပညာ၊ ဓာတ်မှန်ပညာ၊ ဦးနှောက်နှင့်အာရုံကြောခွဲစိတ်ကုပညာ၊ နှလုံးနှင့်သွေးကြောခွဲစိတ်ပညာ စသည့် M.Med.Sc ဘွဲ့လွန်သင်တန်းများ ပါဝင်ကြောင်း သိရသည်။
လျှောက်ထားသူများသည် ပြည်ထောင်စုသမ္မတမြန်မာနိုင်ငံသားဖြစ်ရမည်ဖြစ်ပြီး MBBS ဘွဲ့ (သို့မဟုတ်) မြန်မာနိုင်ငံဆေးကောင်စီက အသိအမှတ်ပြုထားသည့် အလားတူဘွဲ့ရရှိထားသော နိုင်ငံ့ဝန်ထမ်းဆရာဝန်ဖြစ်ရမည်။ ထို့ပြင် သင်တန်းအမျိုးအစားအလိုက် သတ်မှတ်ထားသည့် လုပ်သက်၊ အသက်နှင့် အခြားအရည်အချင်းသတ်မှတ်ချက်များကိုလည်း ပြည့်မီရမည်ဖြစ်ကြောင်း ဖော်ပြထားသည်။
လျှောက်လွှာများကို ၂၀၂၆ ခုနှစ် ဩဂုတ် ၃၁ ရက် နောက်ဆုံးထား တင်သွင်းရမည်ဖြစ်ပြီး ဝင်ခွင့်ရေးဖြေစာမေးပွဲကို ၂၀၂၆ ခုနှစ် အောက်တိုဘာ ၃၀ ရက် တွင် ကျင်းပမည်ဖြစ်သည်။ ဝင်ခွင့်စာမေးပွဲကြေးမှာ ကျပ် ၁,၀၀၀ ဖြစ်ပြီး ဆေးတက္ကသိုလ်(၁) ရန်ကုန်၏ မြန်မာ့စီးပွားရေးဘဏ် ငွေစာရင်းသို့ ပေးသွင်းရမည်ဖြစ်ကြောင်း သိရသည်။
သင်တန်းနှင့်ပတ်သက်သည့် အသေးစိတ်အချက်အလက်များကို ဆေးတက္ကသိုလ်(၁) ရန်ကုန် ဘွဲ့လွန်/စာမေးပွဲဌာနစုတွင် ရုံးချိန်အတွင်း ဆက်သွယ်စုံစမ်းနိုင်ပြီး တက္ကသိုလ်၏ တရားဝင်ဝက်ဘ်ဆိုက်မှတစ်ဆင့်လည်း ကြည့်ရှုနိုင်ကြောင်း ထုတ်ပြန်ထားသည်။
