လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့် ဇနီးတို့သည် ယနေ့ ဇူလိုင် ၅ ရက် မွန်းတည့်ပိုင်းက လွန်ပရာဘန်မြို့ရှိ Souphattra Hotel ၌ ကျင်းပသော လာအိုရိုးရာ ဘာစီ (Baci) ဆုတောင်းပွဲသို့ တက်ရောက်ခဲ့ကြသည်။
အခမ်းအနားကို နိုင်ငံတော်သမ္မတ ဦးမင်းအောင်လှိုင်က မင်္ဂလာဆီမီးညှိပူဇော်၍ ဖွင့်လှစ်ပေးခဲ့သည်။
ထို့နောက် နိုင်ငံတော်သမ္မတနှင့် ဇနီးတို့၏ ကံကောင်းခြင်း၊ ဂုဏ်ကျက်သရေ တိုးပွားခြင်းနှင့် နိုင်ငံတော်တာဝန်များကို အောင်မြင်စွာ ထမ်းဆောင်နိုင်စေရန် ရည်ရွယ်၍ လာအိုနိုင်ငံမှ ဘာသာရေးဆိုင်ရာတာဝန်ခံတစ်ဦးက လာအိုရိုးရာဓလေ့အတိုင်း ဆုမွန်ကောင်းများ တောင်းပေးခဲ့သည်။
ယင်းနောက် နိုင်ငံတော်သမ္မတနှင့် ဇနီး၊ လွန်ပရာဘန်ပြည်နယ် ပါတီကော်မတီ အတွင်းရေးမှူးနှင့် ဇနီးတို့သည် လာအိုရိုးရာ ဘာစီမင်္ဂလာကြိုးဖြူ ကို အပြန်အလှန် ချည်နှောင်ပေးကာ ကောင်းချီးမင်္ဂလာများ ဆုတောင်းပေးခဲ့ကြသည်။
လာအိုရိုးရာဓလေ့အရ ဘာစီမင်္ဂလာကြိုးဖြူချည်နှောင်ခြင်းသည် နှစ်သစ်ကူးအချိန်၊ အဝေးရောက် မိသားစုဝင်များ ပြန်လည်ဆုံတွေ့ချိန်နှင့် ဂုဏ်သရေရှိ ဧည့်သည်တော်များကို ကြိုဆိုဧည့်ခံချိန်များတွင် အန္တရာယ်ကင်းရှင်းစေရန်၊ ကံကောင်းခြင်းများ ရောက်ရှိစေရန်နှင့် မကောင်းမှုများ ကင်းဝေးစေရန် ရည်ရွယ်၍ ဆောင်ရွက်လေ့ရှိသည့် လာအိုလူမျိုးတို့၏ အစဉ်အလာ ရိုးရာဓလေ့တစ်ရပ်ဖြစ်ကြောင်း သိရသည်။