လာအိုနိုင်ငံတွင် ရောက်ရှိနေသည့် အထောက်အထားမဲ့ မြန်မာအလုပ်သမားများအား Certificate of Identity (CI) ထုတ်ပေးရေးနှင့် အလုပ်သမားအခွင့်အရေးများ ပိုမိုရရှိစေရေးအတွက် မြန်မာနှင့် လာအို အလုပ်သမားဝန်ကြီးများ တွေ့ဆုံဆွေးနွေးခဲ့ကြောင်း သိရသည်။
လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့်အတူ လိုက်ပါလာသော အလုပ်သမားဝန်ကြီးဌာန ပြည်ထောင်စုဝန်ကြီး ဦးခင်မောင်စိုးသည် ဇူလိုင် ၄ ရက်က လာအိုနိုင်ငံ အလုပ်သမားနှင့် လူမှုဝန်ထမ်းဝန်ကြီး Mr. Phoxay Sayasone နှင့် တွေ့ဆုံဆွေးနွေးခဲ့ခြင်း ဖြစ်သည်။
ဆွေးနွေးပွဲတွင် လာအိုနိုင်ငံ၌ ရောက်ရှိနေသည့် အထောက်အထားမဲ့ မြန်မာအလုပ်သမားများအား CI ထုတ်ပေးနိုင်ရေး၊ မြန်မာအလုပ်သမားများ ရသင့်ရထိုက်သည့် အလုပ်သမားအခွင့်အရေးများနှင့် ဥပဒေအရ အကာအကွယ်များ အပြည့်အဝရရှိစေရေးတို့အတွက် နှစ်နိုင်ငံ ဝန်ကြီးဌာနများအကြား ပူးပေါင်းဆောင်ရွက်မှုများ ဆက်လက်မြှင့်တင်ရေးကို အဓိကထား ဆွေးနွေးခဲ့ကြသည်။
ထို့ပြင် နှစ်နိုင်ငံအကြား လက်မှတ်ရေးထိုးထားသော အလုပ်သမားဆိုင်ရာ နားလည်မှုစာချွန်လွှာ (MoU) ပါ သဘောတူညီချက်များကို အကောင်အထည်ဖော်ဆောင်ရွက်ရေး၊ မြန်မာအလုပ်သမားများအား ပိုမိုထိရောက်သော ကာကွယ်စောင့်ရှောက်မှုများ ပေးနိုင်ရေးနှင့် အဆင့်မြင့်အရာရှိများအကြား ပုံမှန်ညှိနှိုင်းအစည်းအဝေးများ ဆက်လက်ကျင်းပနိုင်ရေးတို့ကိုလည်း ရင်းနှီးပွင့်လင်းစွာ အမြင်ချင်းဖလှယ်ဆွေးနွေးခဲ့ကြကြောင်း သိရသည်။