ရန်ကုန်၊ စက်တင်ဘာ ၁၁
ဂျပန်နိုင်ငံ၌ ကျင်းပမည့် (၂၀) ကြိမ်မြောက် အာရှအားကစားပြိုင်ပွဲ (20th Asian Games 2026) အမျိုးသမီး ဘောလုံးပြိုင်ပွဲတွင် ဝင်ရောက်ယှဉ်ပြိုင်မည့် မြန်မာ့လက်ရွေးစင် အမျိုးသမီး ဘောလုံးအသင်း၌ တိုက်စစ်မှူး စန်းသော်သော် အပါအဝင် ကစားသမား ၄ ဦးသည် ဒ-ဏ်ရာပြဿနာများကြောင့် ပါဝင်နိုင်ခြင်း မရှိကြောင်း သိရသည်။
ရန်ကုန်ယူနိုက်တက် ကွင်းလယ်တောင်ပံကစားသမား ယွန်းဝတီလှိုင်၊ သစ္စာအားမာန် ကွင်းလယ်ကစားသမား ခင်မိုမိုထွန်းနှင့် ဧရာဝတီအက်ဖ်စီ နောက်ခံကစားသမား နန်းဖြူဖွေးတို့သည် ဒဏ်ရာပြဿနာများကြောင့် ပဏာမလူစာရင်း ရွေးချယ်စဉ်ကတည်းက ပါဝင်နိုင်ခဲ့ခြင်း မရှိပေ။
ထို့ပြင် ဧရာဝတီအက်ဖ်စီ တိုက်စစ်မှူး စန်းသော်သော်သည် အာရှအမျိုးသမီး ချန်ပီယံလိဂ် ခြေစစ်ပွဲများအပြီး လက်ရွေးစင်အသင်းနှင့် ပြန်လည်ပူးပေါင်း လေ့ကျင့်ခဲ့သော်လည်း ကာလအတန်ကြာ ရရှိထားသည့် ဒ-ဏ်ရာ မသက်သာသဖြင့် ဆေးကုသမှု ခံယူရန် ပြန်လည်စေလွှတ်ခဲ့ရသည်။
အဆိုပါ အခြေအနေများကြောင့် နည်းပြချုပ် ကောလင်းဘဲလ် ရွေးချယ်ထားသည့် အာရှအားကစားပြိုင်ပွဲဝင် အပြီးသတ် ကစားသမား ၂၃ ဦး စာရင်းတွင် ထိုကစားသမား ၄ ဦး ပါဝင်နိုင်ခဲ့ခြင်း မရှိတော့ပေ။
မြန်မာ့လက်ရွေးစင် အမျိုးသမီး ဘောလုံးအသင်းသည် ယမန်နေ့ စက်တင်ဘာ ၁၀ ရက် ညနေပိုင်းတွင် ပြိုင်ပွဲကျင်းပရာ ဂျပန်နိုင်ငံသို့ ထွက်ခွာသွားခဲ့ပြီး ပြိုင်ပွဲတွင် အုပ်စု (B) ၌ တောင်ကိုရီးယား၊ မြောက်ကိုရီးယား၊ ဘင်္ဂလားဒေ့ရှ် အသင်းတို့နှင့်အတူ ကျရောက်နေသည်။
အုပ်စုပွဲစဉ်များကို Osaka မြို့ရှိ Nagai Stadium ၌ ယှဉ်ပြိုင်ကစားမည်ဖြစ်ပြီး မြန်မာအသင်းသည် စက်တင်ဘာ ၁၄ ရက်တွင် တောင်ကိုရီးယား၊ စက်တင်ဘာ ၁၇ ရက်တွင် မြောက်ကိုရီးယားနှင့် စက်တင်ဘာ ၂၁ ရက်တွင် ဘင်္ဂလားဒေ့ရှ် အသင်းတို့နှင့် အသီးသီး ယှဉ်ပြိုင်ကစားသွားမည်ဖြစ်သည်။