အသက် ၁၈ နှစ်မှ ၂၅ နှစ်ကြား အမျိုးသားများအတွက် စစ်မှုထမ်းဥပဒေဥပဒေမူကြမ်းကို ကမ္ဘောဒီးယားဝန်ကြီးအဖွဲ့ အတည်ပြု

အိမ်နီးချင်း ထိုင်းနိုင်ငံနှင့် ပြီးခဲ့သည့်နှစ်အတွင်း လူသေဆုံးမှုများရှိခဲ့သည့် တိုက်ပွဲနှစ်ကြိမ် ဖြစ်ပွားခဲ့ပြီးနောက်၊ အသက် ၁၈ နှစ်မှ ၂၅ နှစ်ကြား ကမ္ဘောဒီးယားအမျိုးသားများအနေဖြင့် စစ်တပ်တွင် နှစ်နှစ်ကြာ စစ်မှုထမ်းရန် လိုအပ်သည့် ဥပဒေမူကြမ်းကို ဝန်ကြီးအဖွဲ့က အတည်ပြုလိုက်ပြီဖြစ်သည်။

ယခု စစ်မှုထမ်းဥပဒေမူကြမ်းသစ်သည် ၂၀၀၆ ခုနှစ်ကတည်းက ရှိခဲ့သော်လည်း တစ်ခါမျှ အကောင်အထည်မဖော်ခဲ့သည့်အပြင်၊ လက်ရှိနှင့် အနာဂတ် လိုအပ်ချက်များကို ဖြည့်ဆည်းပေးနိုင်ခြင်း မရှိတော့သည့် ဥပဒေဟောင်းကို အစားထိုးသွားမည်ဖြစ်ကြောင်း အစိုးရပြောရေးဆိုခွင့်ရှိသူတစ်ဦးက သောကြာနေ့တွင် ပြောကြားခဲ့သည်။

ဥပဒေဟောင်းတွင် စစ်မှုထမ်းရမည့် အမြင့်ဆုံးအသက်ကို ၃၀ နှစ်ဟု သတ်မှတ်ထားခဲ့သည်။ အမျိုးသမီးများမှာမူ မိမိတို့၏ ဆန္ဒအလျောက် စစ်မှုထမ်းခွင့် ရရှိမည်ဖြစ်သည်။

အခန်း ၈ ခန်းနှင့် ပုဒ်မ ၂၀ ပါဝင်သော ဥပဒေမူကြမ်းကို ကြာသပတေးနေ့တွင် ပြုလုပ်သည့် ဝန်ကြီးအဖွဲ့အစည်းအဝေး၌ အတည်ပြုခဲ့ကြောင်း ပြောရေးဆိုခွင့်ရှိသူ ပန်ဘိုနာက ဆိုသည်။

ကမ္ဘောဒီးယားနှင့် ထိုင်းနိုင်ငံတို့အကြား နယ်စပ်တစ်လျှောက် ပိုင်နက်အငြင်းပွားမှုများနှင့် ပတ်သက်၍ ပြီးခဲ့သည့်နှစ်အတွင်း တိုက်ပွဲများ နှစ်ကြိမ်တိုင်တိုင် ပြင်းထန်ခဲ့သည်။

ယင်းတိုက်ပွဲများကြောင့် နှစ်နိုင်ငံစလုံးမှ လူပေါင်းသိန်းချီ အိုးအိမ်စွန့်ခွာ ထွက်ပြေးခဲ့ရပြီး ကမ္ဘောဒီးယားစစ်သားနှင့် အရပ်သား ၁၀၀ ခန့် အသက်ဆုံးရှုံးခဲ့သည်။ ဒီဇင်ဘာလတွင် အပစ်အခတ်ရပ်စဲရေး ပြုလုပ်ခဲ့ပြီးနောက်ပိုင်း အသစ်ထပ်မံဖြစ်ပွားသည့် တိုက်ပွဲများ မရှိသေးသော်လည်း တင်းမာမှုများကမူ မြင့်တက်နေဆဲဖြစ်သည်။

ကမ္ဘောဒီးယားအစိုးရ၏ ထုတ်ပြန်ချက်တွင် စစ်မှုထမ်းခြင်းသည် မရှိမဖြစ်လိုအပ်သော တာဝန်တစ်ခုဖြစ်ပြီး၊ ကမ္ဘောဒီးယားပြည်သူများအနေဖြင့် အမျိုးသားဖွံ့ဖြိုးတိုးတက်ရေးတွင် ပါဝင်ကူညီရန်နှင့် မိခင်နိုင်ငံတော်ကို ကာကွယ်ရန် ရရှိသည့် ကြီးမြတ်သော ဂုဏ်ယူဖွယ်ရာအခွင့်အရေးဖြစ်ကြောင်း ဖော်ပြထားသည်။

ဝန်ကြီးချုပ် ဟွန်မာနက်က ထိုင်းနိုင်ငံနှင့် ဆက်ဆံရေးဆိုးရွားနေသည့် ပြီးခဲ့သည့်နှစ် ဇူလိုင်လအတွင်းက ပြောကြားရာတွင် ကမ္ဘောဒီးယားအနေဖြင့် ယခုနှစ်အတွင်း စစ်မှုထမ်းဥပဒေကို စတင်ကျင့်သုံးမည်ဖြစ်ကြောင်း ပြောဆိုခဲ့သည်။ စစ်မှုထမ်းဥပဒေမှတစ်ဆင့် ဝင်ရောက်လာသော စစ်သားများသည် ဆန္ဒအလျောက် ဝင်ရောက်လာသူများထက် ပိုမိုထိရောက်ပြီး ကျွမ်းကျင်မှုရှိကြောင်း၊ စစ်မှုထမ်းစနစ်ကို လိုအပ်ချက်များ ဖြည့်ဆည်းရန်နှင့် စစ်တပ်၏ စွမ်းဆောင်ရည်ကို မြှင့်တင်ရန် အသုံးပြုသွားမည်ဖြစ်ကြောင်း ၎င်းက ပြောကြားခဲ့သည်။

ယခု အတည်ပြုလိုက်သည့် ဥပဒေကြမ်းကို ကမ္ဘောဒီးယား အမျိုးသားလွှတ်တော်နှင့် ဥပဒေပြုအထက်လွှတ်တော်တို့သို့ ပေးပို့၍ အတည်ပြုချက် ရယူရမည်ဖြစ်ပြီး၊ ဘုရင် နိုရိုဒွန် သီဟာမုနိက လက်မှတ်ရေးထိုးပြီးသည်နှင့် ဥပဒေအဖြစ် စတင်အသက်ဝင်လာမည် ဖြစ်သည်။