ပင်လောင်း ၊ စက်တင်ဘာ ၁၅
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၌ ၂၀၂၆-၂၀၂၇ ဘဏ္ဍာနှစ်အတွင်း ဘိန်းအစားထိုး သီးနှံအဖြစ် ပဲပုပ်သီးနှံ ဧက ၂,၉၀၀ ကျော် ပန်းတိုင်ကျော်လွန် စိုက်ပျိုးနိုင်ခဲ့ကြောင်းပင်လောင်းမြို့နယ် စိုက်ပျိုးရေးဦးစီးဌာနမှ သိရသည်။
အဆိုပါ ပဲပုပ်သီးနှံကို မိုးနှင့် ဆောင်း ၂ ရာသီ ပေါင်းစပ်၍ စိုက်ပျိုးခဲ့ခြင်းဖြစ်ပြီး မြို့နယ်စိုက်ပျိုးရေးဦးစီးဌာနအနေဖြင့် တောင်သူများ မျိုးကောင်းမျိုးသန့် ရရှိရေး၊ စိုက်နည်းစနစ် မှန်ကန်ရေးနှင့် ပိုးမွှားအန္တရာယ် ကင်းရှင်းရေးတို့အတွက် သင်တန်းများနှင့် ကွင်းသရုပ်ပြပွဲများကို စဉ်ဆက်မပြတ် ဆောင်ရွက်ပေးခဲ့ကြောင်း သိရသည်။
“ပဲပုပ်ကတော့ တကယ်ကို စိုက်ပျိုးသင့်တဲ့ ရာသီသီးနှံတစ်ခု ဖြစ်ပါတယ်။ ဧပြီလမှာ တစ်ကြိမ်၊ ဩဂုတ်နဲ့ စက်တင်ဘာလမှာ တစ်ကြိမ် စိုက်ပျိုးလို့ရသလို လယ်စပါးသီးထပ်အနေနဲ့လည်း တစ်နှစ်ကို သုံးကြိမ်အထိ စိုက်ပျိုးနိုင်ပါတယ်” ဟု ဦးစီးမှူးက ပြောသည်။
ယင်းအပြင် ပြည်ပမှ စားသုံးဆီနှင့် တိရစ္ဆာန်အစာ တင်သွင်းနေရမှုကို လျှော့ချနိုင်ရန်နှင့် သွင်းကုန်အစားထိုးနိုင်ရန် ရည်ရွယ်၍ အဓိကထား စိုက်ပျိုးခြင်းဖြစ်ကာ တောင်သူများအနေဖြင့်လည်း မျိုးသန့်ပွားများ ရောင်းချနိုင်သဖြင့် စီးပွားရေးအရ အကျိုးအမြတ် ပိုမိုရရှိလာကြောင်း သိရသည်။
ပင်လောင်းမြို့နယ်မှ ထွက်ရှိသည့် ပဲပုပ်များကို ပဲနို့၊ ပဲငါးပိနှင့် ပဲပုပ်ဆီ စသည့် တန်ဖိုးမြင့် ထုတ်ကုန်များအဖြစ်လည်း ထုတ်လုပ်လျက်ရှိကြောင်း သိရသည်။