လတ်တလောတွင် ဖွင့်လှစ်ဖို့အစီစဉ်မရှိကြောင်းနှင့် ပြည်တက္ကသိုလ်တွင် သွားရောက်တက်ရောက်နိုင်ဟု ဝန်ကြီးဌာနဆို
သာယာဝတီခရိုင်မြို့တွင် ဝိဇ္ဇာ၊ သိပ္ပံ တက္ကသိုလ်တစ်ခု ဆောက်လုပ်ပေးရန်နှင့် မည်သည့်ဘဏ္ဍာနှစ်တွင်ဆောက်လုပ်ပေးမည်ကို သိရှိလိုကြောင်းကို တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး ၁၆ ရက်မြောက်နေ့ ကျင်းပသည့်အချိန်တွင် သာယာဝတီ ကိုယ်စားလှယ် ဦးဝင်းဇော်ဦး က မေးမြန်းခဲ့ခြင်း ဖြစ်စည်။
ပဲခူးတိုင်းဒေသကြီး(အနောက်ပိုင်း)၊ သာယာဝတီခရိုင်၊ သာယာဝတီမြို့သည် အင်္ဂလိပ်-မြန်မာ ဒုတိယစစ်ပွဲနောက်ပိုင်း အင်္ဂလိပ်အစိုးရ လက်ထက် ၁၈၇၈ ခုနှစ်ကတည်းက ခရိုင်ရုံးစိုက်ရာမြို့ ဖြစ်သည်။
ပဲခူးတိုင်းရှိ အခြားသောခရိုင်မြို့များတွင် တက္ကသိုလ်ကောလိပ်များ ချထား ဖွင့်လှစ်ပေးခဲ့သော်လည်း သာယာဝတီခရိုင်မြို့တွင် ချထားဖွင့်လှစ်ပေးခဲ့ခြင်းမရှိကြောင်းလည်း ဦးဝင်းဇော်ဦးက ပြောကြားခဲ့သည်။
သာယာဝတီခရိုင်တွင် မြို့နယ် ၆ ခုပါဝင်ပြီး အထက်တန်း ကျောင်းပေါင်း ၄၄ ကျောင်း၊ အ.ထ.က(ခွဲ)ကျောင်း ၄၉ ကျောင်း စုစုပေါင်း ၉၃ ကျောင်းရှိပြီး အ.လ.ကကျောင်း ၆၈ ကျောင်း၊ အ.လ.က(ခွဲ)ကျောင်း ၄၅ ကျောင်း၊ မူလတန်းလွန်ကျောင်း ၁၁၂ ကျောင်း၊ အလယ်တန်းအဆင့် စုစုပေါင်း၂၂၅ ကျောင်း၊ မူလတန်းအဆင့် အ.မ.ကကျောင်း ၇၂၈ ကျောင်း၊ အ.မ.က(ခွဲ)ကျောင်း ၁၆ ကျောင်း စုစုပေါင်း မူလတန်းအဆင့် ၇၄၄ ကျောင်းနဲ့ မူလယ်ထက်၃ မျိုးပေါင်း ၁၀၆၂ ကျောင်းရှိပါကြောင်း၊
၂၀၂၆ ခုနှစ် တက္ကသိုလ်ဝင်စာမေးပွဲတွင် ဖြေဆိုသူပေါင်း ၄၅၄၅ ယောက်ရှိခဲ့ပြီး ဖြေဆိုသည့်ရာခိုင်နှုန်းမှာ ၉၃.၃၈ ရာခိုင်နှုန်းရှိခဲ့ပါကြောင်း၊ အောင်မြင်သူပေါင်း ၂,၆၅၁ ဦး ရှိခဲ့ပြီး အောင်မြင်မှုရာခိုင်နှုန်းမှာ ၅၈.၂၆ ရာခိုင်နှုန်း အောင်မြင်ခဲ့ကြောင်း သိရသည်။
သို့သော် တက္ကသိုလ်ဝင် စာမေးပွဲအောင်မြင်ကြသော ကျောင်းသူ ကျောင်းသားများသည် အဆင့်မြင့်တက္ကသိုလ်ပညာရေးကို မိုင် ၈၀ ခန့်ဝေးသော ရန်ကုန်မြို့နှင့် မိုင် ၁၀၀ ခန့်ဝေးသော ပြည်မြို့တို့တွင် သွားရောက်သင်ကြားနေကြရပါကြောင်း၊ ထို့ကြောင့် တက္ကသိုလ်ဝင်တန်းအောင်မြင်သူထဲမှ ကျောင်းသားအနည်းငယ်သာ တက္ကသိုလ်ပညာရေး ကို ဆက်လက်သင်ကြားနိုင်ကြပါကြောင်းလည်း လွှတ်တော်ကိုယ်စားလှယ်က ထောက်ပြခဲ့သည်။
ပညာရေးဝန်ကြီးဌာန၊ ဒုတိယဝန်ကြီး၊ ဒေါက်တာဇော်မြင့် က ပြန်လည်ဖြေကြားခဲ့ပြီး သာယာဝတီခရိုင်မြို့တွင် ဝိဇ္ဇာ၊ သိပ္ပံ တက္ကသိုလ်တစ်ခုခု ချထား ဆောက်လုပ်ရန် ပညာရေးဝန်ကြီးဌာနအနေဖြင့် လတ်တလောမှာတော့ အစီအစဉ်မရှိသေးပါ ကြောင်း ကို ဖြေကြားခဲ့ခြင်းလည်း ဖြစ်သည်။
ထိုပြင် နောင်လိုအပ်သောအချိန်မှာ ဖွင့်လှစ်နိုင်ရေးအတွက် သာယာဝတီ ခရိုင်တွင် အဆင့်မြင့် ပညာဆည်းပူးသူ ကျောင်းသား/ ကျောင်းသူများစွာ ပေါ်ထွက်လာရေးကို မိဘပြည်သူများက တိုက်တွန်းပေးပါရန် မေတ္တာရပ်ခံလိုပါကြောင်းနှင့် သာယာဝတီခရိုင်မှ ပြည်တက္ကသိုလ် တက်ရောက် လိုသော ကျောင်းသား/ ကျောင်းသူတစ်ဦးတိုင်း၊ တစ်ယောက်တိုင်းအတွက်ကို အစိုးရအိပ်ဆောင် (Hostel) ချထားပေးနိုင်မည်ဖြစ်ကြောင်းလည်း ဒုတိယဝန်ကြီးက ပြောကြားခဲ့သည်။
သာယာဝတီမြို့နှင့် ပြည်မြို့သည် ၁၀၂ မိုင်ကွာဝေးပြီး မော်တော်ယာဉ်ဖြင့် ၃ နာရီ ခရီးအကွာတွင်တည်ရှိပြီး လမ်းပန်းဆက်သွယ်ရေးကောင်းမွန်ကြောင်း ထို့အတူ သာယာဝတီမြို့နှင့် ရန်ကုန်မြို့သည်လည်း ၇၃ မိုင်ကွာဝေးပြီး မော်တော်ယာဉ်ဖြင့် ၂ နာရီခွဲခရီး တွင် ရှိကြောင်း သိရသည်။